Ua Fesili Mai le ʻAufaitau

Pe na Aofia Moni le Lalolagi Atoa i le Lolo i Aso o Noa?

Na tupu le Lolo i le silia i le 4,000 tausaga ua tuanaʻi. O lea, e leai lava la ma se tasi o soifua i le lalolagi i le taimi nei, e mafai ona taʻu mai iā i tatou lenā mea na tupu. Ae peitaʻi, o loo iai se faamaumauga o lenā mea na tupu e faapea, e oo lava i le mauga aupito i maualuga, na lofia i le vai.

E faitau faapea faaupuga o loo iai: “Sa i ai foʻi le lolo i le lalolagi i ona aso e fagafulu . . . Ua matuā mālō tele lava le vai i le lalolagi; ma ua ufitia ai mauga maualuluga uma o i lalo o le lagi uma. E sefulu ma le lima kupita [pe tusa e 22 futu] na mālō ai le vai i luga, ma ua ufitia ai mauga.”—Kenese 7:17-20.

O loo taumānatu nisi i le tala i le lofia o le lalolagi uma i le lolo po o se tala fatu, po ua na o se tala ua soona faatelē. E leai! O le mea moni, o loo ufitia pea le tele o le lalolagi i le vai. Ua ufitia le pe tusa o le 71 pasene o le lalolagi i le vai. O lea o le tulaga moni lava la, o loo iai pea vai o le lolo i inei. Ma, pe afai ae liu suāvai aisa o loo iai i vaega e lata i pole o le lalolagi, o le a siitia le suāsami ma lofia ai aai e pei o Niu Ioka ma Tokyo.

E talitonu tagata suʻesuʻe o le eleele na latou suʻesuʻeina foliga o mātū i sisifo o le Iunaite Setete, mo se vaitaimi umi lava, pe tusa ma le 100 ni lolo mataʻutia na tutupu anamua ma lofia ai lea vaipanoa. O se tasi o ia lolo e faapea na oo atu i lea vaipanoa, e oo atu lona maualuga i le 2,000 futu (600 mita), ae e 65 maila (105 kilomita) i le itulā le saosaoa—o se lolo e 500 kupita maila (2000 kupita kilomita lona telē), ma e silia i le 2 tiliona tone le tele o le vai. E iai ni mea na maua na māfua ai ona talitonu nisi saienitisi faapea, sa mafai ona iai se lolo.

O i latou e talitonu o le Tusi Paia o le Afioga a le Atua, e latou te talitonu sa iai moni lava le lolo. O le mea moni lava na tupu. Na faapea atu Iesu i le Atua: “O lau afioga o le upu moni lea.” (Ioane 17:17) Na tusi le aposetolo o Paulo, o le finagalo o le Atua “ia faaolaina ituaiga uma o tagata, ma ia oo ina iloa lelei le upu moni.” (1 Timoteo 2:3, 4) E faapefea ona aʻoaʻo e Paulo soo o Keriso i le upu moni e faatatau i le Atua ma ana fuafuaga, pe a fai o loo iai i le Afioga a le Atua ni tala fatu?

E lē gata na talitonu Iesu na iai le Lolo, ae na ia talitonu foʻi na aofia ai le lalolagi atoa. I lana valoʻaga sili e faatatau i lona faatasi mai ma le faaiʻuʻiʻuga o lenei faiga o mea, na ia faatusa ai mea tutupu i le taimi lenā i mea na tutupu i le taimi o Noa. (Mataio 24:37-39) Na tusi foʻi le aposetolo o Peteru e faatatau i le lolo i aso o Noa: “O mea foʻi ia na oo ai le faaumatiaga i le lalolagi i lenā taimi, ina ua lofia i le vai.”—2 Peteru 3:6.

Pe a fai e lē o se tala moni le tala iā Noa ma le Lolo, o le a leai la se uiga o lapataʻiga a Peteru ma Iesu mo i latou o loo ola i aso e gata ai. Nai lo le avea o se lapataʻiga, o le a fenuninumiaʻi ai se tagata i lapataʻiga a le Tusi Paia ona o na tala, ma afāina ai lona avanoa e faasaoina ai i se puapuaga e sili atu i lo le Lolo i aso o Noa.—2 Peteru 3:1-7.

O le talanoa e faatatau i le faaauau pea ona ia alofa mutimutivale i ona tagata, na fetalai le Atua e faapea: “Na ou tauto . . . aʻu e lē toe lofia le lalolagi i le lolo iā Noa; e faapea ona ou tauto, ou te lē ita iā te oe, ou te lē aoaʻi atu foʻi iā te oe.” E pei lava ona lofia moni i le Lolo i aso o Noa le lalolagi, e faapena foʻi ona iai le alofa agalelei o le Atua iā i latou e faatuatua iā te ia.—Isaia 54:9.