Ia Aʻoaʻo Lau Fanau

Sa Manaʻo Lenei Teineitiiti e Fesoasoani Atu

PE NA e iloa se tasi na matuā maʻi tigāina?— Pe sa e manatu e te ono mafai ona fai se mea e fesoasoani ai i lenā tagata?— Ae faapefea pe afai o lea tagata e ese lona atunuu pe e ese foʻi lana tapuaʻiga? Po o le a tumau pea lou manaʻo ia malosi lenā tagata?— Sa i ai se teineitiiti na ola i Isaraelu i le toetoe 3,000 tausaga ua mavae, sa manaʻo e fesoasoani atu i se tasi ina ia toe malosi. Seʻi o tatou talanoaina po o le ā le mea na tupu i tuā i lenā taimi.

Sa masani ona fetauaʻi Isaraelu anamua, lea sa ola ai lenei teineitiiti, ma le nuu tuaoi o Suria. (1 Tupu 22:1) I se tasi aso na ō mai ai tagata Suria i Isaraelu ma latou ave faapagota le teineitiiti lenei. Na ave le teine i Suria ma avea ai ma auauna a le avā a Naamanu le taʻitaʻiʻau o Suria. Sa maua Naamanu i le maʻi leaga o le lepela, lea e mafai ona pala ma paʻuʻū ese ai ni aano mai le tino o se tagata.

Sa taʻu atu e le auauna teine i le avā a Naamanu le auala e mafai ona faamālōlō ai lana tane. Sa ia faapea atu: ‘⁠Pe ana i ai Naamanu i Samaria, semanū e mafai e le perofeta a Ieova, o Elisaia, ona faamamā i lona lepela.’ Ona o le auala na talanoa ai le auauna teine e faatatau iā Elisaia, na faatalitonuina ai Naamanu e ono mafai moni lava e le perofeta ona faamālōlō lona maʻi. Ona sa faataga e Peniata le tupu o Suria, na alu ai loa le malaga umi pe tusa ma le selau maila a Naamanu ma nisi o auauna e suʻe Elisaia.

Na muamua latou ō atu iā Ioramo, le tupu o Isaraelu. Sa latou faaali atu iā te ia le tusi a le tupu o Peniata, lea sa talosaga atu ai mo se fesoasoani mo Naamanu. Peitaʻi e leʻi faatuatua Ioramo iā Ieova po o le perofeta foʻi o Elisaia. Na manatu Ioramo o loo taumafai Peniata e saʻili se auala e amata ai se taua ma ia. Ina ua faalogo Elisaia e faatatau i lenei tulaga, ona ia taʻu atu lea i le tupu o Ioramo e faapea: “Ia sau lava ia iā te aʻu.” Sa manaʻo Elisaia e faailoa atu e faapea, e i ai i le Atua le mana e faamālōlō ai le maʻi leaga o Naamanu.—2 Tupu 5:1-8.

Ina ua taunuu atu Naamanu ma ana solofanua ma kariota i le fale o Elisaia, sa auina atu e Elisaia se avefeʻau e taʻu atu iā te ia: ‘⁠Inā alu ia e taʻele faafitu i le vaitafe o Ioritana, ona e mālōlō ai lea.’ Na matuā ita tele Naamanu ina ua avatu i ai lenei faatonuga. Sa ia faatalitalia e sau i fafo Elisaia ma faaloaloa mai lona lima i luga o le lepela ina ia teʻa ese ai. Nai lo lea, sa na o le avefeʻau na ia  vaai atu i ai! Ona liliu lea o Naamanu ma le ita tele ma sauni e toe foʻi atu i lona nuu.—2 Tupu 5:9-12.

O le ā lau mea e fai pe ana faapea o oe o se tasi o auauna a Naamanu?— Ua fesili atu ana auauna iā te ia: ‘Pe ana fai atu Elisaia iā te oe e fai se mea faigatā, e te lē faia ea? Aiseā la e te lē fai ai lenei mea faigofie—o le tau lava ina taʻele ma mamā ai?’ Sa faalogo Naamanu iā i latou. “Ona alu ifo ai lea o ia, ua fufui faafitu i Ioritana . . . , ona foʻi mai ai lea o lona tino tuai pei o le tino o le tama itiiti.”

Na toe foʻi atu Naamanu iā Elisaia ma faapea atu: “Faauta mai, ua ou iloa nei e leai se atua i le lalolagi uma, ua na o i Isaraelu lava.” Sa ia tautō atu iā Elisaia o le a ia lē toe faia se “taulaga mū po o se isi taulaga i atua ese, na o Ieova lava.”—2 Tupu 5:13-17.

Pe e te fia fesoasoani i se tasi ia iloa Ieova ma mea e mafai ona ia fai, e pei ona sa faia e lenā teineitiiti?— A o i ai Iesu i le lalolagi, sa talitonu se tamāloa lepela iā te ia, ma faapea atu: ‘⁠Pe afai e te finagalo moni lava e fesoasoani mai iā te aʻu, e te mafaia lava.’ Pe e te iloa o le ā le tali atu a Iesu?— “Ou te loto i ai.” Ma na faamālōlō e Iesu le tamāloa, e pei ona sa faamālōlō e Ieova Naamanu.—Mataio 8:2, 3.

Po ua e iloa le lalolagi fou lea o le a saunia e Ieova, o le a ola mālōlōina ai tagata uma ma ola ai e faavavau?— (2 Peteru 3:13; Faaaliga 21:3, 4) O lea la, e mautinoa o le a e manaʻo e taʻu atu i isi nei mea matagofie!

Fesili:

• Na faapefea ona fesoasoani se teineitiiti iā Naamanu, o lē e ana fitafita ia na puʻeina mai o ia?

• Aiseā na lē manaʻo ai Naamanu i le taimi muamua e usitai iā Elisaia, ae o le ā na suia ai lona manatu?

• O le ā e tatau ona e manaʻo moni lava e fai, ina ia faaaʻoaʻo ai i lenā teineitiiti?

• O le ā na finagalo Iesu e fai, ma aiseā o le a matagofie ai le olaga i le lalolagi fou a le Atua?