Se Teineitiiti i Aso Nei e Pei o le “Teineitiiti Isaraelu”

I LE 2006 a o toe lua vaiaso oo i le Faamanatuga o le maliu o Iesu, na faia ai e sui taʻitoʻatasi o le aiga o Sale i Praia Grande, i Pasili, se lisi o tagata o le a latou valaauliaina mo le Faamanatuga. Ona avatu lea iā Apikaila lea e ono ona tausaga se tusi valaaulia, ma fai atu i ai po o ai e manaʻo e ave i ai.

Na ia tali mai: “O le tamāloa lea e ataata mai lava iā te aʻu i le tele o taimi.”

Na fesili atu ona mātua: “O ai lenā tamāloa?”

Na tali atu Apikaila: “Le tamāloa lea e i le nofoa faataavalevale.”

I le aso lona fā mulimuli ane ai, na faasino atu loa e Apikaila le tamāloa i ona mātua. O le tamāloa lenei o Walter, e nofo e latalata i le Maota mo Sauniga. I le silia i le 15 tausaga talu ai, ina ua 28 ona tausaga, na aafia ai i se faalavelave tau taavale ma pē ai lona tino e amata mai i lona sulugātiti agaʻi i lalo. E iai ana leoleo faapitoa e toʻalua e vaavaaia o ia, ona o ia o se tagata mauʻoa. Ma ina ua faataga Apikaila e talanoa iā Walter, ona faamalamalama lea e mātua o Apikaila iā Walter, e manaʻo le la tama teine e avatu se tusi valaaulia iā te ia.

Ina ua faaiʻu le faamatalaga a Apikaila na ia faapea atu: “O isi uma tagata i le Maota e fai ai a matou Sauniga e tele a latou tagata o loo valaaulia, ae na o le toʻatasi lava laʻu valaaulia. E na o oe lava laʻu valaaulia. Afai e te lē alu atu, o le a leai la saʻu valaaulia. Ae afai e te alu atu, o le a ou fiafia tele, ma o le a sili atu ona fiafia Ieova.”

I le aso o le Faamanatuga, na faamamā ai e Molimau lea e aofia ai ma Apikaila, le Maota mo Sauniga e sauniuni ai mo le polokalame o le Faamanatuga i le afiafi. O le aoauli lenā na pasi ane ai le taavale a Walter, ma ina ua vaai atu iā Apikaila, na ia fai atu i lana avetaavale e faatū le taavale. Na vili i lalo le faamalama, ma faapea atu Walter iā Apikaila po o le ā lana mea o fai. Na tali atu Apikaila, o loo faamamā le maota ina ia faamatagofie mo ia.

I lenā afiafi sa lē manofo Apikaila. Ua amata le lauga, ae o loo fai lava ma autilo solo e vaai po ua taunuu ane Walter. Ae teʻi loa ua atunuu ane Walter ma ana leoleo faapitoa e vaaia o ia. Ona ʻataʻata fiafia lea o Apikaila. Ina ua uma le lauga, na taʻutino mai e Walter o ia na tuu e malaga atu i se isi aai, ae ua toe suia lona mafaufau ma alu atu i le Faamanatuga, ona o ia. Ona ia toe faapea atu lea: “O le lauga lea na fai, o se lauga na manaʻomia ona ou faalogo i ai.” Na ia talosaga atu mo se Tusi Paia, ma amata loa ona ia suʻesuʻe ma auai i sauniga.

O le taimi lea, ua manaʻo le tuafafine o Walter e fia feiloaʻi iā Apikaila po o ai lenei teine, lea e taʻutaʻu soo e lona tuagane. Ma ina ua ia feiloaʻi iā Apikaila, na ia fiafia e iloa o ia o se teineitiiti lelei tele. Na faapea lana tala, “Ua ou iloa nei le māfuaaga e fiafia tele ai loʻu tuagane iā te ia.”

O loo faaauau pea ona suʻesuʻe ma auai Walter i sauniga. E fai foʻi ana tali ma taʻu atu i isi mea ua ia aʻoaʻoina. E mautinoa ua faamanatu mai iā i tatou e lenei teineitiiti laʻitiiti o Apikaila, le teineitiiti Isaraelu lea na fesoasoani iā Naamanu ina ia iloa le Atua moni e toʻatasi, o Ieova.—2 Tupu 5:2-14.