Ia Mafuta Atu i le Atua

“E Lē o Mamao o Ia Mai iā i Tatou Taʻitoʻatasi”

Galuega 17:24-27

O LE mea moni, o tagata ua na o ni mea faatauvaa pe a faatusatusa atu i le telē o le vateatea. Atonu o loo e taumānatu, ‘⁠Pe mafai moni lava ona iai se faiā vavalalata a tagata ma le Atua e Ona le Malosi Uma Lava?’ E pau le auala e mafai ai, pe afai e finagalo le Atua, o lē o lona suafa o Ieova, iā i tatou ina ia faalatalata atu iā te ia. Po o lona finagalo ea lenā? E maua le tali faamāfanafanaloto i upu faagaeeloto a le aposetolo o Paulo, sa fai atu i tagata atamamai o Atenai, lea o loo faamauina i le Galuega 17:24-27. Seʻi mātau mea e fā o loo taʻua e Paulo e faatatau iā Ieova.

Muamua, ua taʻua e Paulo e faapea ‘o le Atua na faia le lalolagi ma mea uma ua iai.’ (Fuaiupu e 24) O le matagofie ma le anoanoaʻi o mea o loo maua ai le olioli i le olaga, ua faamaonia ai le manatu mamafa ma le alofa o Lē na faia i tatou. (Roma 1:20) E matuā lē talafeagai lava pe a faapea atu, e mafai e se Atua faapena ona filifili e taumamao mai i tagata o loo faaalia i ai lona alofa.

Lona lua, e “foaʻi mai lava [e Ieova] i tagata uma le ola, ma le mānava, ma mea uma lava.” (Fuaiupu e 25) O Ieova o Lē e Faatumauina le ola. (Salamo 36:9) O le ea, vai, ma meaʻai lea e tāua tele mo le ola, o meaalofa uma lava mai Lē na faia i tatou. (Iakopo 1:17) Pe e talafeagai ona talitonu o le a faaesea e lo tatou Atua limafoaʻi o ia lava, ma tatou lē maua ai le meaalofa o le iloaina lea o ia ma mafuta vavalalata atu iā te ia?

Lona tolu, na faia e le Atua “nuu uma mai le tagata e toʻatasi.” (Fuaiupu e 26) E lē faailoga tagata Ieova ma e matuā mamao o ia ma le faaituʻau. (Galuega 10:34) E faapefea ona faamaonia lenā tulaga? Na ia faia le “tagata e toʻatasi,” o Atamu, o lē ua tupuga mai ai atunuu uma ma ituaiga tagata eseese. E finagalo le Atua “ia faaolaina ituaiga uma o tagata.” (1 Timoteo 2:4) O lea ua tatou maua ai le avanoa e mafuta vavalalata atu ai iā te ia, e tusa lava po o le ā lo tatou lanu, le atunuu, po o le ituaiga tatou te tupuga mai ai.

Ma le manatu mulimuli, ua faailoa mai e Paulo se upu moni e sili ona faalaeiauina ai: ‘E lē mamao Ieova mai iā i tatou taʻitoʻatasi.’ (Fuaiupu e 27) E ui lava i lona tulaga malualii o loo i ai, ae e faafofoga mai pea Ieova iā i latou o ē e naunau moni e faalatalata atu iā te ia. Ua faamautinoa mai e Lana Afioga iā i tatou e faapea, e lē mamao o ia, ae e ‘latalata mai iā i latou uma o ē valaau iā te ia.’—Salamo 145:18.

Ua manino mai i upu a Paulo, e finagalo le Atua ia tatou faalatalata atu iā te ia. Peitaʻi, ua faamatala mai e Paulo e na o i latou o ē e naunau e “saʻili” ma “tautagotago” i le Atua, e tuu atu i ai e le Atua sea faiā vavalalata. (Fuaiupu e 27) Ua taʻua e se tusi mo galuega a le ʻaufaaliliu o le Tusi Paia, “e manino lelei nei veape e lua ina ia faamatala ai se mea e mafai ona maua . . . po o se moomooga e mafai ona taulau.” O se faataʻitaʻiga: I totonu o se potu pogisa ae ua e masani ai, atonu e te tautagotago e suʻe le ki o le molī po o le faitotoʻa foʻi, peitaʻi ua e iloa lelei lava o le a e mauaina le ki o le molī po o le faitotoʻa. O lea la, pe afai foʻi tatou te saʻili ma le faamaoni i le Atua ma tautagotago iā te ia, e tatou te mautinoa o le a tauia a tatou taumafaiga. Ua faamautinoa mai e Paulo o le a tatou “maua o ia.”—Fuaiupu e 27.

Po o e naunau e faalatalata atu i le Atua? Pe afai ua amata ona e “saʻili i le Atua” ma le faamaoni ma “tautagotago iā te ia ona o lou faatuatua,” o le a e lē faanoanoa la. E lē faigatā ona tatou mauaina Ieova, auā “e lē o mamao o ia mai iā i tatou taʻitoʻatasi.”