Pe Sesē le Faaaogā o le Suafa o le Atua?

I TUSITUSIGA Eperu, lea e fai ma taʻua o le “Feagaiga Tuai,” pe ā ma le 7,000 taimi e aliaʻe mai ai le suafa o le Atua faapenei יהוה (faitau mai le taumatau i le agavale). O lona uiga, o loo faaata mai le suafa o le Atua i mataʻitusi Eperu e fā o le Yohdh, He, Waw, ma le He, lea e masani ona tusia YHWH.

I aso anamua, na iai se talitonuga faanuupō a tagata Iutaia, faapea e sesē le faaaogā o le suafa o le Atua. Ma na latou filifili ai, o le a lē faaleoina, ma i a latou tusitusiga, ua amata ona latou faaaogā faaupuga ese e sui ai. Peitaʻi, e toʻatele tagata faaliliu o le Tusi Paia ua latou faaaogāina le suafa “Yahweh,” po o “Ieova.” O se tasi o faaliliuga o loo faaaogā ai lenā suafa o le Jerusalem Bible a le Katoliko. E tusa ai ma lenei faaliliuga, ina ua fesili atu Mose i le Atua, pe faapefea ona ia tali atu i tagata Isaraelu pe a latou fesiligia o ia, po o ai na auina atu o ia, ona fetalai mai lea o le Atua: “Ia faapea ona e fai atu i le fanauga a Isaraelu: ‘⁠Ua auina mai aʻu iā te outou e Yahweh, le Atua o outou tamā, o le Atua o Aperaamo, o le Atua o Isaako, ma le Atua o Iakopo.’ O loʻu igoa lenā e faavavau, o laʻu faamanatuga lenā i lea tupulaga ma lea tupulaga.”—Esoto 3:15.

A o ia tatalo, na faapea mai Iesu i lona faaaogāina o lenei suafa paia: “Ua ou faailoa atu foʻi lou suafa iā te i latou, ma o le a faaauau ona ou faailoa atu.” Ae na faapea mai Iesu i le tatalo a le Alii: “Lo matou Tamā e o i le lagi, ia faapaiaina lou suafa.”—Ioane 17:26 JB; Mataio 6:9.

E ono faateʻia ai la i lana tusi Jesus of Nazareth lea na tusia lata mai nei, lea na faapea mai ai Pope Penetito XVI e tusa ma le faaaogāina o lenā suafa paia: “E saʻo le māfuaaga na lē faaaogā ai e tagata Isaraelu lenā suafa, auā o le suafa lenā e faaaogā e le Atua mo ia lava, lea e taʻua o le YHWH, ina ia ʻalofia ai le taʻufaatauvaa o lenā suafa faatasi ma igoa o atua faapaupau. I se auala talitutusa, ua sesē ai nisi faaliliuga fou o le Tusi Paia i le lē faaaogāina o lenei suafa, lea na manatu i ai Isaraelu o se mea lilo ma e lē mafai ona faaleoina, i le pei ua na o se isi igoa ua tuai.”

O le ā sou manatu? Pe saʻo pe sesē le faaaogā o le suafa o le Atua? Afai ua fetalai mai Ieova lava ia: “O loʻu igoa lenā e faavavau, o laʻu faamanatuga lenā i lea tupulaga ma lea tupulaga,” pe iai la se aiā a se tasi e tetee atu ai?

[Ata i le itulau 30]

Sa faaaogā e Iesu lenei suafa paia i tatalo