Po o Ōgatusa Au Fuafuaga ma le Finagalo o le Atua?

O LE manulele e taʻu o le Clark’s nutcracker, o se manulele efuefu paʻepaʻe e mafai ona vaaia o loo feleleaʻi solo i vaomatua i sisifo o Amerika i Mātū. E na te aoaoina ma tanu i tausaga taʻitasi ni fatu laau pe tusa ma le 33,000, e ala i le faaputu o na fatu i ni nofoaga eseese e tusa ma le 2,500, ina ia sauniuni ai mo masina e mālūlū ai le tau. O lea la, ua ‘sili ona poto’ lenei manulele i le faaputuina o meaʻai mo le lumanaʻi.—Faataoto 30:24.

Ua iai foʻi i tagata se tomai e sili ona mataʻina. I foafoaga uma a Ieova i le lalolagi, ua iai i tagata se uiga e lē mafaatusalia o le aʻoaʻoina mai i mea na tutupu i le taimi ua mavae, ma avea nei lesona e taaʻina ai a latou fuafuaga i le lumanaʻi. Na faapea mai le tupu poto o Solomona, “E tele mafaufau o loo i le loto o le tagata.”—Faataoto 19:21.

E ui i lea, e masani lava ona leai se filifiliga e faia e tagata, ae ua fua a latou fuafuaga i ni manatu i mea e latou te mafaufau o le a tutupu i le lumanaʻi. O se faaaʻoaʻoga, e te fuafuaina galuega o le aso ā taeao i le manatu e faapea, o le a oso aʻe le lā, ma o le a e soifua pea. O le manatu muamua e mautū lona faavae; a o le manatu lona lua e lē o mautinoa. O le mea moni, na faapea mai le tusitala o le Tusi Paia, o Iakopo: “Tou te lē iloa le mea o le a tupu iā te outou a taeao.”—Iakopo 4:13, 14.

E leai ni tapulaa o Ieova le Atua. E na te silafia “talu mai le amataga o mea e mulimuli.” E mautinoa o le a taunuu ana fuafuaga ua uma ona folafola mai. Ua ia folafola mai e faapea: “E tū laʻu pule, ou te faia foʻi mea uma ou te loto i ai.” (Isaia 46:10) O le ā la e tupu pe afai e feteenaʻi fuafuaga a le tagata ma le finagalo o le Atua?

Pe a Lē Amanaʻia e Tagata le Finagalo o le Atua

I le pe tusa o le 4,000 tausaga ua mavae, na taumafai ai tagata sa fauina le Olo o Papelu e taofia le taape solo atu o le fanau o tagata. Sa latou faapea atu: “Ō mai ia, inā tatou fai ia o se aai, ma se ʻolo, ia oo lona tumutumu i le lagi, ia tatou faia foʻi se mea e taʻua ai i tatou, neʻi faataapeapeina i tatou i le fogāeleele uma.”—Kenese 11:4.

 Peitaʻi, sa ese le fuafuaga a le Atua mo le lalolagi. Sa ia fetalai atu iā Noa ma ona atalii: “Ia outou fanafanau, ma ia uluola, ma ia tumu le lalolagi iā te outou.” (Kenese 9:1) Sa faapefea ona feutagaʻi le Atua ma faamoemoega o tagata fouvale o Papelu? Sa ia faafenumiaʻia la latou gagana ina ia lē mafai ona fesootaʻi le tasi i le isi. O le ā na iʻu i ai? “Ona faataapeape lea e Ieova iā te i latou ai lea mea i le lalolagi uma.” (Kenese 11:5-8) Sa tatau i tagata na fauina le olo o Papelu ona latou aʻoaʻoina mai ai i inā se lesona tāua. Pe afai e ese fuafuaga a le tagata ma le finagalo o le Atua, ‘e tumau lava le pule a Ieova.’ (Faataoto 19:21) Pe e te faatagaina ni lesona mai le taimi ua mavae, ina ia taaʻina ai lou olaga?

Se Tagata Mauʻoa e Lē Fuafua Lelei

Atonu e te lē o fuafua e fau se olo, peitaʻi o le toʻatele o tagata i aso nei ua fuafua e amata se teugātupe telē i le faletupe ma faateleina ʻoa faaletino, ina ia latou maua se olaga sologa lelei faaletino, i taimi e mālōlō litaea mai ai i galuega. O le natura lava o le tagata e manaʻo ia olioli i fua o ana galuega. Na tusi Solomona: “Ia taʻitasi le tagata ma ʻai, ma inu, ma fiafia i mea lelei i ana galuega uma; o le mea foaʻiina mai lea e le Atua.”—Failauga 3:13.

E tatou te tali atu iā Ieova i le auala e tatou te faaaogā ai lenei meaalofa. I le toetoe 2,000 tausaga ua mavae, na faamamafa atu ai e Iesu i ona soo lenei manatu, e ala i se talafaatusa. Na ia fetalai atu: “Ua fua tele mai le fanua o se tasi tagata mauʻoa. Ona manatu ifo lea o ia e faapea, ‘O le ā se mea ou te faia, auā o lenei ua leai se mea e tuu ai aʻu saito?’ Ona ia faapea lea, ‘O le mea lenei o le a ou faia: O le a ou tala i lalo oʻu fale saito, ma toe fau ni fale tetele, o i inā o le a ou teuina ai aʻu saito ma aʻu mea lelei uma. Ona ou faapea ifo lea iā te aʻu: “Ua ou maua le tele o mea lelei ua faaputuina mo le tele o tausaga; ia ou faifaimālie ai, ia ʻai ma inu, ma fiafia.”’” (Luka 12:16-19) Po o lona uiga sa leʻi talafeagai le fuafuaga a le tamāloa? I le pei o le manulele na taʻua i le amataga, o le Clark’s nutcracker, e foliga mai o loo sauniuni le tamāloa ua taʻua i le talafaatusa, mo mea na te manaʻomia i le lumanaʻi.

Peitaʻi, sa iai se faafitauli i mafaufauga o le tamāloa. Na toe fetalai atu Iesu: “A ua fetalai atu le Atua iā te ia, ‘O oe na le tagata lē faautauta, o le pō nei e latou te mananaʻo ai i lou ola. O ai la o le a fai mo ia mea na e faaputuina?’” (Luka 12:20) Pe na feteenaʻi le manatu o Iesu ma le faamatalaga a Solomona e faapea, o galuega ma iʻuga lelei e maua mai ai o ni meaalofa mai le Atua? E leai. O le ā le manatu sa faamamafa e Iesu? Na fetalai Iesu: “O lea, e faapena le tagata e faaputu ʻoa mo ia lava, ae e lē mauʻoa i le silafaga a le Atua.”—Luka 12:21.

 Na aʻoaʻo e Iesu lana ʻaufaalogologo e faapea, e finagalo Ieova ia tatou manatua o Ia a o fai a tatou fuafuaga. Sa mafai i le tagata mauʻoa ona mauʻoa i le silafaga a le Atua, e ala i le saʻilia o auala e faamalosia ai lona tuutoina atu i le Atua, lona atamai, ma le alofa. Ua faaalia i faaupuga a lenā tamāloa le leai o se naunau i ia mea, e na te leʻi tuua nisi fua o ana faatoʻaga mo tagata matitiva e latou te aoina, pe ofo atu foʻi ni taulaga o meaalofa iā Ieova. E leʻi avea na mea faaleagaga ma gaoioiga lē manatu faapito, ma vaega o le olaga o le tamāloa mauʻoa. Sa pau le mea na ia mafaufau i ai, o le faamalie o ona faanaunauga totino ma mea e lelei mo ia.

Po ua e mātauina ua toʻatele tagata i aso nei ua faamuamua i o latou olaga mea, e pei o mea sa faamuamua i le olaga o le tamāloa mauʻoa na faamatalaina i le talafaatusa a Iesu? E tusa pe tatou te mauʻoa pe matitiva, ae e faigofie lava ona aafia o tatou mafaufau i le manaʻo tele i meafaitino, e ala i le avea o manaʻoga ma faanaunauga o le olaga ma itū ua uunaʻi ese ai manaʻoga faaleagaga. O le ā e ao ona tatou fai ina ia ʻalofia ai lenā mailei?

Fuafuaina o se Olaga “Sologa Lelei”

E ese mai i le tamāloa mauʻoa i le talafaatusa a Iesu, atonu o loo e fesagaʻi ma faafitauli tautupe. Ae ui i lea, pe afai ua e faaipoipo, e lē taumatea ua e fuafua e saunia mea e manaʻomia e ola ai mo lou aiga, ma pe afai foʻi e mafai, ia lelei ni aʻoaʻoga faavae mo lau fanau. Pe afai o loo e nofofua, atonu o loo aofia i au fuafuaga le saʻilia o se galuega pe tumau pea i le galuega ua e galue ai, ina ia e lē faaee atu ni avega mamafa i isi. O nei sini o ni sini e tāua tele.—2 Tesalonia 3:10-12; 1 Timoteo 5:8.

Ae ui i lea, e ono mafai e le ola i se olaga masani—o le galue, ʻai, ma inu—ona taʻitaʻia atu ai se tagata e ola i se olaga e lē talafeagai ma le finagalo o le Atua. E faapefea ona tupu lenā tulaga? Na fetalai Iesu: “E pei lava o aso o Noa, e faapena foʻi le faatasi mai o le Atalii o le tagata. Auā e pei o aso a o leʻi oo i le lolo, na latou aai ma inu, na faaipoipo alii ma tamaʻitaʻi, seʻia oo lava i le aso na ulu atu ai Noa i le vaa, ma latou te leʻi ano i ai seʻia oo mai le lolo ma tafiesea ai i latou uma, e faapea foʻi le faatasi mai o le Atalii o le tagata.”—Mataio 24:37-39.

A o lumanaʻi le Lolo, e toʻatele tagata sa olioli i se olaga masani. Peitaʻi, o lo latou faafitauli, e latou te “leʻi ano” i le fuafuaga a le Atua e faapea, o le a tafiesea lenā lalolagi amioleaga e ala i se lolo tele. E lē taumatea sa latou manatu i le auala sa ola ai Noa o se olaga e lē sologa lelei. Peitaʻi, ina ua oo mai le Lolo, sa faamaonia le atamai o le auala na ola ai Noa ma lona aiga.

I aso nei, ua faamaonia i faamaoniga uma, ua tatou ola nei i taimi o le iʻuga. (Mataio 24:3-12; 2 Timoteo 3:1-5) Ua lata ona “tuʻimomomoina ma faaumatia” e le Malo o le Atua lenei faiga o mea. (Tanielu 2:44) I lalo o lenā Malo, o le a suia ai le lalolagi e avea ma parataiso. O le a aveesea e le Malo maʻi ma le oti. (Isaia 33:24; Faaaliga 21:3-5) O le a ola foafoaga ola uma i le lalolagi e tusa ai ma le finagalo o le Atua, ma o le a fau ma soloi meataumafa.—Salamo 72:16; Isaia 11:6-9.

Peitaʻi, a o ia leʻi faataunuuina lenā fuafuaga, e finagalo Ieova ia talaʻi atu le “tala lelei o le malo i le lalolagi atoa e fai ma molimau i atunuu uma.” (Mataio 24:14) I le ōgatusa ai ma le finagalo o le Atua, ua tusa ma le fitu miliona Molimau a Ieova o loo latou talaʻia lenei tala lelei i atunuu e 236 i le silia i le fā selau gagana.

I manatu o tagata o le lalolagi, o le auala o loo ola ai Molimau a Ieova e foliga mai e ese—ma e foliga mai o se mea valea iā i latou. (2 Peteru 3:3, 4) I le pei o tagata sa ola a o lumanaʻi ai le Lolo, o le toʻatele o tagata i aso nei o loo pisi i le faasologa o mea masani o le olaga. Atonu latou te manatu o so o se tasi e na te teena le ola i se olaga o loo manatu le lalolagi o se olaga masani, e lē o paleni la lenā tagata. Ae i manatu o i latou o ē e faatuatua i folafolaga a le Atua, o se olaga e faaautū i le auaunaga i le Atua, e mautinoa o se olaga paleni.

O lea la, e tusa lava pe e te mauʻoa pe mativa, o se mea atamai ona iloilo mai lea taimi i lea taimi au fuafuaga mo le lumanaʻi lata mai. A o e faia faapea, ia fesili ifo iā te oe lava, ‘⁠Po o ōgatusa aʻu fuafuaga ma le finagalo o le Atua?’

[Ata i le itulau 11]

Pe afai e ese fuafuaga a le tagata ma le finagalo o le Atua, e tumau lava le pule a Ieova

[Ata i le itulau 12]

Ina ua fai fuafuaga a le tamāloa mauʻoa na taʻua i le talafaatusa a Iesu, e leʻi taulaʻi o ia i le finagalo o le Atua