E Mafai e le Tusi Paia Ona Suia Olaga

O le ā na ono uunaʻia ai se sui o se kegi talavou Mekisikō lea na taʻua o le Satani Laiti, e fai se suiga ma avea o ia o se tagatānuu faamaoni toe galue malosi? Aiseā na taofia ai e se fafine faipisinisi taulau manuia le faamuamuaina o le saʻilia o le ʻoa i lona olaga, ma o ā ni ona faalogona i suiga na ia faia? O le ā sa uunaʻia ai se tamāloa Rusia e faatau auupega, e lafoaʻi lana pisinisi faasolitulafono ma tele le tamaoaiga na maua mai ai? Seʻi tagaʻi i faamatalaga a nei tagata.

FAAMATALAGA O LONA OLAGA

IGOA: ADRIAN PEREZ

TAUSAGA: 30

ATUNUU: MEKISIKŌ

TALAAGA: SUI O SE KEGI

O LOʻU OLAGA SA IAI: I le tusa ma le 13 o oʻu tausaga, na ō atu ai lo matou aiga ma nonofo i Ecatepec de Morelos, o se Setete o Mekisikō. I lenā taimi, na taatele i lenā vaipanoa soligatulafono na faia e talavou, faaleagaina o mea, ma tagata ua ola faalagolago i fualaau faasāina. E leʻi leva ae amata ona lē pulea loʻu faaaogāina o le ʻava malosi, faaleagaina meatotino, ma aafia i amioga lē mamā.

Mulimuli ane, na matou toe foʻi atu i San Vincente, o le taulaga lea na ou fanau ai. Peitaʻi, ua telē le faafitauli ua iai i inā o le ola faalagolago lea o tagata i fualaau faasāina. O se vaaiga masani le taatitia o talavou ua feoti i autafa o auala. Sa avea loa aʻu ma sui o le kegi e taʻua o le Satani Laiti. Sa matou gāoi ma faaaogā fualaau faasāina, ae o la matou masaniga o le sogisogi lea i vailaau po o kelū. E masani lava ona ou lē iloa pe na faapefea ona ou oo i le fale, ma o nisi taimi na ou taatia i tafāala ua ou lē iloa se mea. Sa falepuipui nisi o aʻu uō ona o le gaoi ma le fasioti tagata.

E ui i nei mea uma, sa ou talitonu pea i le Atua. Ina ia faaleleia oʻu faalogona, e fai ma ou alu i le lotu, ma fai ai saʻu vaega i le ifo i koluse a o faagasolo le Vaiaso Paia. Pe a māeʻa  lenei vaiaso paia, e matou te faatasitasi uma e aofia ai ma lē na faia le vaega a Iesu, ae fai sa matou inuga ʻava ma matou onanā uma ai.

LE AUALA NA SUIA AI E LE TUSI PAIA LOʻU OLAGA: Sa ou suʻesuʻeina le Tusi Paia ma Molimau a Ieova a o toeitiiti 20 oʻu tausaga. Na ou iloa e leai ma se fuafuaga o loʻu olaga, ma o le a leai ma se mea e lelei i loʻu olaga, pe a faaauau ai faapea. Sa ou fiafia ma tāmau i loʻu mafaufau le manatu o loo i le Kalatia 6:8: “O lē e lūlū e tusa ma le tino agasala, e na te selesele mai le tino ua pala, a o lē e lūlū e tusa ma le agaga, e na te selesele mai le ola e faavavau mai le agaga.” Sa toe faamanatu mai e le mau lenei iā te aʻu, a fia sologa lelei mea, e tatau ona ou lūlū ma tepa taulaʻi atu i le lumanaʻi.

A o oʻu suʻesuʻeina le Tusi Paia, na amata ai ona ou talisapaia o Ieova o se Atua soifua ma o loo ia naunau moni mai iā te aʻu, ma o loo ia nofosauni e faamagalo aʻu agasala na fai i taimi ua teʻa. Na ou iloa ai e faafofoga mai o ia ma taliina tatalo.

E leʻi faigofie ona faia suiga i loʻu olaga. Sa faigatā ona tuua le kegi na ou iai. Sa i ai oganuu na faailogaina, ma e lē mafai ona ou oo i ai, e ui e lē o toe avea aʻu ma se sui o lenā kegi. O nisi taimi, e fai ma ou lafi mai i aʻu uō na iai muamua, auā latou te taumafai e toe tataʻi aʻu i aʻu masaniga tuai.

O lea la, ina ua amata ona ou auaʻi i sauniga i le Maota mo Sauniga, na atagia mai ai uiga māfana ma le alofa. Sa ou amanaʻia nei tagata i le malosi o lo latou faatuatua, aemaise lo latou ola e tusa ma mea na latou aʻoaʻoina. E matuā ese lava lenei siʻomaga mai le mea sa ou masani ai.

LE AUALA NA AOGĀ AI IĀ TE AʻU: Ua sefulu nei tausaga talu ona ou papatiso o se Molimau a Ieova. Sa ou taumafai malosi e faatatau aʻoaʻoga a le Tusi Paia i loʻu olaga. O le iʻuga, ua amata ona faaaloalogia aʻu e lo matou aiga. Ua latou iloa nei o aʻu o se tagata e galue malosi, ma ua mafai foʻi ona ou fesoasoani atu i le tulaga tautupe. Sa amata foʻi ona suʻesuʻe e si oʻu tinā le Tusi Paia, ma ua avea nei o ia ma Molimau a Ieova. O loo faia foʻi e loʻu tamā suiga i lona olaga. O le toʻatele o loʻu aiga e lē o ni Molimau a Ieova, ae ina ua latou mātauina suiga iā te aʻu, ua latou iloa ai e mafai ona fesoasoani le Tusi Paia e faaleleia le olaga o se tagata.

FAAMATALAGA O LONA OLAGA

IGOA: YAYOI NAGATANI

TAUSAGA: 50

ATUNUU: IAPANI

TALAAGA: FAFINE FAIPISINISI TAULAU MANUIA

O LOʻU OLAGA SA IAI: Na ou ola aʻe i se nuu laʻitiiti maotua, ma e toʻatele ai tagata laufofoga fiafia. Sa iai se faleoloa telē a loʻu tamā i le taulaga ma e toʻasefulu lana ʻaufaigaluega. Sa tuaoi lo matou fale ma le faleoloa, e ui lava e pisi loʻu tamā ma loʻu tinā, ae ou te leʻi lagona le tuulafoaʻia o aʻu.

O aʻu o le ulumatua o teine e  toʻatolu, ma na amata mai lava o oʻu laʻitiiti, sa toleniina aʻu e vaaia le pisinisi a lo matou aiga. Sa ou faaipoipo laʻitiiti. Sa faamavae laʻu tane mai lana galuega i le faletupe ina ia fesoasoani i le pisinisi a lo matou aiga. Na vave lava ona ma maua se fanau e toʻatolu. Sa vaavaaia e loʻu tinā le ma fanau ma fai ana feʻau, ae ou faigaluega i le faleoloa mai le taeao seʻia oo i le pō. E ui i lea, sa maua pea taimi avanoa e faatasi ai o se aiga.

Ona aafia lea o pisinisi faleoloa i lenā vaipanoa i ni tulaga faigatā tau tamaoaiga, ma ua amata ona aafia ai la matou pisinisi. I le tali atu i na tulaga faigatā, na matou filifili loa e tatala se faleoloa e maua ai mea e faaleleia ma faatotoga ai fale, i autafa o le auala tele. I le aso a o leʻi amata le fausiaina o le faleoloa, ae aafia loa loʻu tamā lea na avea ma peresitene o le kamupani i se maʻi e fesootaʻi atu i le faiʻai. Na matuā aafia lana tautala i lenā maʻi, ma ua iā te aʻu nei le tiute tauave o le vaaia o le faleoloa fou. Ae sa faigaluega pea laʻu tane i le faleoloa tuai. Ua matuā pisi lava o ma olaga.

Sa matuā taulau lava la matou faleoloa fou. Sa ou mitamita i mea na ou faia ma ua afāina ai lava laʻu moe ona o laʻu galuega. E ui ou te alofa i laʻu fanau, ae na o le pau le mea sa i loʻu mafaufau o le galuega. Ua seāseā maua se taimi e ma te talanoa ai ma laʻu tane, ae a maua foʻi le taimi, e na o finauga lava le mea e fai. Ina ia gafatia nei popolega, sa amata ona ou alu e tafao ma ou inu i le tele o pō ma aʻu uō ma paaga faipisinisi. Na o le pau laʻu mea sa fai o le faigaluega, inu, ma moe. Sa ou taulau manuia i le tamaoaiga, ae faatupulaʻia pea loʻu lē fiafia ma ou te lē iloa pe aiseā.

LE AUALA NA SUIA AI E LE TUSI PAIA LOʻU OLAGA: Ina ua amata ona ou suʻesuʻeina le Tusi Paia ma Molimau a Ieova, e tolu ni mau na aafia tele ai loʻu loto. Sa ou tagi ina ua ou iloa le uiga o le Mataio 5:3: “E fiafia o ē naunau i mea faaleagaga, auā e fai mo i latou le malo o le lagi.” Na faamalamalama mai e lenei mau le māfuaaga ou te lē fiafia ai, e ui lava o loo tele le tamaoaiga ma amanaʻia aʻu e le ʻaufaipisinisi. Na ou iloa e faatoʻā ou fiafia lava pe afai ou te amanaʻia ma faamalieina oʻu manaʻoga faaleagaga.

I le taimi lea, na matuā faalētonu ai lava le tamaoaiga o Iapani, ma na ou iloa ai e faatatau i aʻu paaga faipisinisi le moni o le 1 Timoteo 6:9: “O ē fia mauʻoa, e paʻuʻū i latou i le faaosoosoga ma le mailei, ma le tele o tuʻinanauga valea ma le tigā, ia e oo atu ai tagata i le faaumatiaga ma fano ai.” Na ou iloa o loo faatatau iā te aʻu le fetalaiga a Iesu i le Mataio 6:24, “e lē mafai ona e pologa i le Atua atoa ma ʻoa,” ma na fai ai laʻu faaiʻuga e manaʻomia ni suiga i loʻu olaga.

Na ou iloa na ou tuulafoaʻia oʻu mātua, laʻu tane, ma laʻu fanau. Ua manino mai ai ma ni uiga lē lelei ua tutupu aʻe iā te aʻu. Ua ou faamaualuga. Ua lē lava loʻu onosai i tagata. Ua ou maitaita foʻi. Muamua lava, sa ou manatu e lē mafai ona suia aʻu e avea ma Kerisiano. Peitaʻi, na ou matuā alofa lava i laʻu fanau ma ou mātauina, a ou faatatauina fautuaga a le Tusi Paia pe a ou feagai ma loʻu aiga, e tali lelei mai laʻu fanau. Ua tele nei le taimi matou te mafuta ai, ma ou te alu ma ave i latou i sauniga faa-Kerisiano.

LE AUALA NA AOGĀ AI IĀ TE AʻU: O loʻu iloaina o le fuafuaga o lenei olaga ma mafai ona auauna i le Atua, ola i se olaga e tusa ma lona finagalo, ua ou maua ai le fiafia moni ma le faamalieina. Ua ou lē toe faataulagaina loʻu aiga ona o laʻu galuega, ma ua ou toe maua le faaaloalo lea sa iai muamua.

O le iloa mai o suiga i oʻu uiga ona o le faatatauina o taʻiala o loo i le Tusi Paia, ua uunaʻia ai si oʻu tinā e suʻesuʻe le Tusi Paia ma avea o ia ma Kerisiano. O se mea e fiafia ai, e leʻi tetee mai loʻu tamā po o laʻu tane i a ma faaiʻuga. Ua māfana atili laʻu faiā ma laʻu fanau, ma ua ou maua nei se olaga faaleaiga e fiafia moni.

 FAAMATALAGA O LONA OLAGA

IGOA: MIKHAIL ZUYEV

TAUSAGA: 51

ATUNUU: RUSIA

TALAAGA: FAATAU AUUPEGA FAASOLITULAFONO

O LOʻU OLAGA SA I AI: Sa ou fanau i Krasnogorsk, ma e lanumeamata le laufanua o lenei taulaga. E tafe i le itu i saute le Vaitafe o Moscow. E toetoe a lilofia atoa le itu i sisifo ma le itu i mātū i le vaomatua.

Sa ou fiafia ou te fusu a o oʻu laʻitiiti, aemaise foʻi le taalo i auupega. Ou te faaaluina le tele o le taimi e toleni ai. Sa ou faia foʻi ni fana, ututau, ma ni naifi i se auala solitulafono. Na faasolosolo ina fai ma aʻu pisinisi le faiga o nei mea. Sa lelei le auala na fuafua ai laʻu pisinisi ma na ou taulau i le faatauina atu o nei mea i tagata solitulafono.

LE AUALA NA SUIA AI E LE TUSI PAIA LOʻU OLAGA: I le amatamataga o tausaga mai le 1990, sa ou feiloaʻi ai i Molimau a Ieova, ae ou te leʻi talitonuina i latou i le taimi muamua. Ou te leʻi fiafia i le tele o a latou fesili.

I se tasi aso, na faitau mai ai e se tasi o i latou iā te aʻu le Roma 14:12: “E taʻitasi i tatou uma ma tala atu lana amio i le Atua.” Sa ou mafaufau po o le ā saʻu tala o le a fai atu i le Atua. Na uunaʻia aʻu e lenei mau e aʻoaʻo mea e manaʻomia e le Atua mai iā te aʻu.

Sa ou taumafai malosi e faatatau fautuaga a le Tusi Paia o loo i le Kolose 3:5-10: “O le mea lea, ia fasiotia tuʻinanauga i o outou itutino, o le faitaaga, o amioga lē mamā, le tuʻinanau i feusuaʻiga, o tuʻinanauga leaga ma le manaʻonaʻo fua i mea a isi, o le ifo i tupua lava lea. Ona o na mea uma e oo mai ai le toʻasā o le Atua. . . . Ia outou tuu ese mai iā te outou le toʻatamaʻi, le ita, le leaga, o upuleaga, ma e lē tatau ona sau se upu masoā mai i o outou gutu. Aua le pepelo le tasi i le isi. Ae ia toese le tagata tuai ma ana gaoioiga, a ia oofu outou i le tagata fou ua faafouina e ala i le iloa lelei o mea, ina ia foliga e pei o Lē na faia o ia.”

Sa faigatā tele ona ou faia nei suiga. Sa fai ma ofo mai e aʻu “paaga faipisinisi” tupe mo ni auupega, ma na faigatā foʻi ona pulea loʻu ita pe a faifai mai isi. E ui i ia tulaga, ae sa ou faatamaʻiaina laʻu faaputuga auupega telē ma taugatā sa iai. A o oʻu aʻoaʻoina le alofa o le Atua ma Keriso ua faaalia mai mo aʻu, na uunaʻia ai aʻu e alofa atu iā i laʻua. Sa ou tinoū e fai aʻu suʻesuʻega totino o le Tusi Paia, auai i sauniga a le faapotopotoga, ma tatalo atu i le Atua mo lana fesoasoani.

LE AUALA NA AOGĀ AI IĀ TE AʻU: A o oʻu agaʻigaʻi i luma, sa faigatā ae na fesoasoani mai le ʻauuso Kerisiano, ma ua ou atiaʻe ai ni uiga lelei. O loʻu iloa e naunau mai Ieova le Atua iā i tatou taʻitoʻatasi, e oo foʻi i tagata ua maliliu, na faafiafiaina ai aʻu. (Galuega 24:15) Ou te faatāuaina le faamaoni lea ou te mātauina i Molimau a Ieova. Ou te talisapaia le naunau moni latou te faaalia mai iā te aʻu, aemaise lo latou faamaoni i le Atua.

Sa lē fiafia muamua nisi o oʻu aiga ma aʻu uō i laʻu tapuaʻiga fou. Ona latou faapea mai lea, e sili atu ai loʻu aafia i se lotu nai lo le aafia i soligatulafono. Ua ou fiafia ua ou lē toe aafia i le faatauina atu o auupega mo taua, ae ua faaalu loʻu malosi e fesoasoani atu ai i isi ia iloa le Atua o le filemu.

[Ata i le itulau 27]

Sa ou auai i mea fai a le Katoliko e tau faaleleia ai loʻu lotofuatiaifo

[Ata i le itulau 28]

Sa ou taulau i le mauaina o le tele o le ʻoa ae sa ou matuā lē fiafia lava