O Auala e Fiafia ai le Aiga

Fesootaʻiga ma Fanau Talavou

“Sa faigofie ona talanoa i laʻu tama tama, ae i le taimi lenei ua 16 ona tausaga, ua faigatā mo aʻu po o laʻu tane ona iloa mea o ia mafaufau i ai. E vavae ese o ia ma nofonofo na o ia i lona potu, ma e faigatā tele ona ia talanoa mai iā i maʻua!”—MIRIAMA, MEKISIKŌ.

“Na iai le taimi na naunau ai lava laʻu fanau e faalogo mai i so o se mea ou te fai atu ai. Ae i aso nei ua avea ma talavou, ua latou manatu e lē mafai ona ou malamalama iā i latou.”—SCOTT, AUSETALIA.

PE AFAI o loo e tausiaina sou alo talavou, atonu la e mafai ona tutusa oe ma mātua na taʻua i luga. I taimi ua mavae, sa sologa lelei a lua fetalanoaʻiga. Ae i le taimi nei, e foliga mai ua motusia a lua fesootaʻiga. Ua faapea mai se tinā i Italia e igoa iā Agela, “A o laʻitiiti laʻu tama tama, sa masani ona ia fesili mai iā te aʻu i le tele o taimi. Ae i le taimi lenei, o aʻu lea ua amataina talanoaga. Pe afai ou te lē amataina, e ono uma atu le tele o aso e leai ma sa ma talanoaga lelei e faia.”

I le pei o Agela, atonu ua e iloaina ua suia lau tama tautalatala lea sa iai, i le avea ma se talavou ua lē toe fiafia e talanoa. O so o se taimi lava e taumafai ai e fai se talanoaga, atonu e na ona tali mai lava i ni tali pupuu. E te fesili atu i lou atalii, “E ā mai lou aso?” Ua ia tali tuu taseʻi mai, “Lelei.” Ua e fesili atu i lou afafine, “O le ā se mea na tupu ana nei i le aʻoga?” E faamimigi ma fai mai, “Leai se mea.” O le taumafai e amata se talanoaga ma faapea atu, “o le ā ea le mea ua e lē toe talanoa mai ai?” e iʻu ai ina lē toe talanoa mai.

O le mea moni, o nisi talavou e leai se faafitauli o le talanoa mai. Peitaʻi, o a latou faamatalaga e fai mai e lē fia faalogo i ai o latou mātua. Ua taʻua e se tinā i Nigeria, e igoa iā Edna, “Pe a ou fai atu i laʻu tama teine e fai se mea, o lana tali masani e fai mai, ‘⁠Aua le faalavelave mai iā te aʻu.’” O le mea foʻi lenā ua mātauina e Rimoni, i Mekisikō, i lona atalii e 16 tausaga. Ua ia faapea mai, “E toetoe lava o aso uma e ma te finau ai. O so o se taimi lava ou te fai atu ai iā te ia e fai se mea, e amata ona ia taʻu mai iā te aʻu ni faamolemolega e lē mafai ai ona ia faia lenā mea.”

O le taumafai e fesootaʻi ma se talavou e lē talilelei mai, e mafai ona luʻia ai le onosai o se matua. Ua faaalia mai i le Tusi Paia e faapea, “e faalēaogāina mafaufauga pe a leai se filifiliga.” (Faataoto 15:22) Ua taʻutino mai e Ana, o se matua nofo toʻatasi i Rusia, “Pe a ou lē iloa le mea o loo mafaufau i ai laʻu tama tama, ou te ita tele ma ou manaʻo ai e ʻeʻē.” Aiseā e oo mai ai loa i taimi ua matuā tāua ai fesootaʻiga, ae foliga mai ai ua mou atu le tomai o talavou—ma o latou mātua—e fesootaʻi ai?

Ia Iloa Māfuaaga ua Lē Lelei ai Talanoaga

O fesootaʻiga e sili atu nai lo le tau ina talanoa. Na fetalai Iesu e faapea “o le tele o mea i le loto e tautala mai ai [le] gutu.” (Luka 6:45) O lea la, a lelei fesootaʻiga, o le a tatou aʻoaʻoina mai ai ni mea e uiga i isi ma faaalia atu ai mea e uiga iā i tatou. O le talanoa mai e faatatau i mea o loo i o latou loto ma mafaufau, o se tulaga e faigatā tele mo talavou auā ua oo atu i latou i suiga masani o  le tino, ma e oo ai lava foʻi i tamaiti sa fiafia e talanoa, ua faafuaseʻi ona filemu. Ua faapea mai tagata atamamai, e masani ona manatu talavou e faapea, o loo mātau mai e tagata uma lava a latou mea o fai ma mea latou te fai atu ai, e tai pei ua latou tutū i luga o se tulaga o loo susulu atu ai se molī iā i latou. Nai lo le manaʻo la e faasaga i tagata ma talanoa atu i ai, e ono manatu fanau talavou e ō i se isi mea e faaesea mai ai i latou.

O le isi vala e mafai ona taofia ai fesootaʻiga ona o le faanaunauga fia tutoʻatasi o fanau talavou. E lē mafai ona ʻalo ese mai ai i lenei mea—o loo tuputupu aʻe lau tama, ma o se vala o lenā tuputupu aʻe e aofia ai le vavae ese mai o ia mai le aiga. E lē o le uiga o lenei manatu ua sauni lau tama talavou e tuua le aiga. Ua sili atu nei ona ia manaʻomia oe i le tele o auala. Peitaʻi, o le faagasologa o lagona o le vavae ese, e amata ona iai a o leʻi avea ma tagata matua. I le avea ai ma vala o le tagata matua, o le toʻatele o fanau talavou e manatu e fai a le mea ua latou manatu i ai, a o leʻi faailoa atu o latou manatu i isi.

O le mea moni, e lē o natia e fanau talavou o latou manatu mai i a latou uō—o se mea na mātauina e se tinā i Mekisikō e igoa iā Jessica. Ua fai mai o ia, “A o laʻitiiti laʻu tama teine, e masani ona ia talanoa mai iā te aʻu i ona faafitauli. A o le taimi lenei, ua talanoa atu o ia i ana uō.” Pe afai o loo tupu lenei tulaga i lau tama talavou, aua neʻi e manatu e faapea ua ia “teena” oe o se matua. Nai lo lea, ua faaalia i suʻesuʻega e faapea, e tusa pe e lē taʻu saʻo mai e talavou, ae e sili atu ona latou faatāua fautuaga a o latou mātua nai lo o fautuaga a o latou uō. Peitaʻi, e mafai faapefea ona e faamautinoa o loo tatala pea le faitotoʻa o fesootaʻiga?

Aveesea Mea e Taofia ai Talanoaga

Seʻi faapea o lea e te avea se taavale i se saʻoga umi. Mo le tele o maila, e laiti lava ni nai fetuunaʻiga e te faia i lau foeuli. Ae faafuaseʻi loa ona e oo atu i se piʻoga tū i le auala. Ina ia alu pea lau taavale i luga o le auala tele, e leai se isi mea e te faia ae tatau ona fetuunaʻi pe mimilo lau foeuli. E faapena foʻi pe a oo ina avea lau tama ma talavou. I le tele o tausaga, atonu sa lē tele ni fetuunaʻiga na manaʻomia ona fai i lau auala e te lua fesootaʻi ai ma lau tama. Peitaʻi, o lea ua telē se suiga i le olaga o lau tama, ma e ao ona e ‘⁠fetuunaʻi atu i le suiga,’ e ala i le fetuunaʻi o au auala e fesootaʻi ai. Ia fesili ifo iā te oe lava i fesili o loo mulimuli mai.

‘Pe a fia talanoa mai laʻu tama, po o oʻu fia talanoa atu iā te ia?’

Ua faapea mai le Tusi Paia: “O le upu ua fai faatatauina, o moli auro ia i ato ario togitogi faamamanuina.” (Faataoto 25:11) E pei ona manino mai i lenei mau, o le taimi e fai ai le talanoaga, e masani lava o le ki lea i le taulau i lea tulaga. O se faataʻitaʻiga: E lē mafai e se faifaatoʻaga ona faavave pe tolopō le taimi e selesele ai lana faatoʻaga. E ao ona fai le mea e mafai ona ia fai pe afai ua oo i le taimi o le seleselega. Atonu o loo iai se taimi talafeagai mo lau tama talavou e faigofie ona ia talanoa mai ai. Ia aua neʻi misia lenā avanoa. Ua faapea mai Falanisisi, o se tinā nofo toʻatasi i Ausetalia, “O le tele o taimi e sau ai laʻu tama teine i loʻu potu moe i le pō, o nisi taimi e mo se itula. Ou te lē fiafia e ala umi i le pō, o lea e leʻi faigofie ai, ae a o faagasolo na pō e umi ai ona ou ala, sa ma talanoa ai e faatatau i mea uma.”

FAATAʻITAʻI LENEI MEA: Pe afai e foliga mai e lē fia talanoa mai lau tama talavou, ia fai faatasi se mea—fai sina savalivaliga, ō e tiʻetiʻe, fai se taaloga, pe fai foʻi se galuega i fafo o le fale. E masani lava, o tulaga faasamasamanoa faapena e fesoasoani i fanau talavou e fiafia ai e talatalanoa faatasi ma oe.

‘Po o oʻu iloa lagona o loo i tua o upu ua ia talanoa mai ai?’

Ua faapea mai le Iopu 12:11: “E lē faamasino ea e le taliga i upu? e lē tofotofo ea foʻi e le gutu i ana mea e ʻai?” O le taimi sili lenei e manaʻomia ai ona e “tofotofo” i mea o loo taʻu mai e lou alo. E masani lava ona tuu saʻo upu e talanoa mai ai fanau talavou.O se faaaʻoaʻoga, atonu e faapea mai lou atalii po o lou afafine, “E te faia lava aʻu e pei o se tamaʻi tamaitiiti!” pe “E lē taitai ona e faalogo mai iā te aʻu!” Nai lo le taumafai e puʻea na o upu ia o le “lava” ma le “lē taitai,” ia e iloa e lē faapea o talanoa mai lau tama i se tulaga moni lava. O se faataʻitaʻiga, a faapea mai, “E te faia lava aʻu e pei o se tamaʻi tamaitiiti,” e mafai ona uiga faapea, “Ou te lagona e te lē  faatuatuaina aʻu,” ae a faapea mai “E lē taitai ona e faalogo mai iā te aʻu,” e ono uiga faapea, “Ou te fia taʻu atu iā te oe oʻu lagona moni o loo i ai.” Ia taumafai e iloa lagona o loo i tua o upu ua ia talanoa mai ai.

FAATAʻITAʻI LENEI MEA: Pe a fai mai e lau tama talavou se faaupuga faatigā, ia fai atu i ai se faaupuga e pei o lenei: “Ua ou vaai atu lava i lou faanoanoa, ma ou te fia faalogo atu i le mea o loo e fai mai ai. Taʻu mai iā te aʻu pe aiseā ua e manatu ai, o loo oʻu faia oe pei o se tamaitiiti.” Ia ona faalogologo lea, ae aua e te faasalavei atu.

‘Po o oʻu taumafai e faamalosi laʻu tama talavou e talanoa mai?’

Ua faapea mai le Tusi Paia: “Ua lūlūina ma le filemu fua o le amiotonu, e i latou ua faatupuina le filemu.” (Iakopo 3:18) Ia faatupu le “filemu” e ala i au upu ma ou foliga vaaia, ona naunau ai lea o lau tama talavou e talanoa mai. Ia manatua, o oe e te lagolagosua i lau tama. O lea la, pe a talanoaina se mataupu, aua le talanoa atu e pei o se lōia o loo taumafai e taʻusesēina se molimau i le faamasinoga. Ua faapea mai se tamā i Korea e igoa iā Ahn, “O se matua atamai e na te lē faia ni faamatalaga e pei o le, ‘⁠O afea ea e te faatagata matua ai?’ po o le, ‘⁠Ua faafia ona ou fai atu iā te oe?’ Ina ua mavae le tele o taimi na ou sesē ai i lea tulaga, na ou mātauina ai le lē fiafia o laʻu fanau tama e lē gata o le auala na ou talanoa atu ai iā i latou, a o faamatalaga foʻi sa ou fai atu iā i latou.”

FAATAʻITAʻI LENEI MEA: Pe afai e lē tali mai lau tama talavou i fesili, ia faataʻitaʻi se isi auala e ese. O se faaaʻoaʻoga, nai lo le fesili atu i lou alo teine pe ā mai lona aso, faamatala atu iā te ia lou aso ma vaai pe tali mai. Ia, pe ina ia iloa se manatu o lau tama i se mataupu, ia fai ni fesili e mafai ona toe tali mai ai ma talanoa mai ai lou alo. Fesili atu iā te ia po o le ā se manatu o lana uō e faatatau i le mataupu. Ia ona fesili lea i ai po o le ā sana fautuaga o le a avatu i lana uō.

O le fesootaʻi ma fanau talavou e lē o se galuega faigofie, ae e mafai lava ona fai. Ia fetuunaʻi le auala e te fesootaʻi ai ma lau tama e tusa ma le manaʻoga o tulaʻi mai. Ia talanoa atu i isi mātua ua taulau i lenei tulaga. (Faataoto 11:14) Pe a fesootaʻi ma lou alo, “ia faalogologo lelei . . . , ae aua le vave ona tautala, ma aua foʻi le vave ona ita.” (Iakopo 1:19) Ae o le sili o na mea uma, ia aua neʻi faavaivai i au taumafaiga e tausia aʻe lau tama talavou i “aʻoaʻiga ma apoapoaʻiga a Ieova.”—Efeso 6:4.

[Pusa i le itulau 12]

FESILI IFO IĀ TE OE LAVA . . .

▪ O ā suiga ua ou mātauina i laʻu tama talu ona avea o ia ma talavou?

▪ O ā auala e mafai ai ona ou faaleleia oʻu tomai e fesootaʻi ai?

[Ata i le itulau 12]

Fautuaga Mai i Mātua

“E saʻoloto le talanoa mai a laʻu tama tama pe a matou faatasi ma isi. Ae mulimuli ane, pe a na o i maʻua, o le a ou faaauauina le ma talanoaga i mataupu ia sa matou talanoaina muamua.”—AGELA, ITALIA.

“Ua ma iloaina e masani ona faailoa mai lagona o la ma fanau iā i maʻua, pe afai e muamua ona ma taʻu atu i ai se mea lelei ua la faia, ma taʻu atu i ai lo ma alolofa tele iā i laʻua.”—DONIZETE, PASILI.

“Sa ou talanoa i tagata matutua na tausia aʻe e tusa ma tapulaa a le Tusi Paia, ma na ou fesili atu iā i latou po o ā ni o latou lagona a o talavou, ma pe na faapefea foʻi ona fesoasoani atu o latou mātua iā i latou. Sa matuā aogā tele lenā auala ma na maua mai ai isi manatu atili.”—DAWN, PERETANIA.