O Lesona Tatou te Aʻoaʻoina Mai iā Iesu

I le Auala e Feagai ai ma Isi

Aiseā e agalelei ai?

Po o e agalelei atu e tusa lava pe e lē agalelei mai tagata iā te oe? Pe afai tatou te mananaʻo e faaaʻoaʻo iā Iesu, e ao ona tatou agalelei atu e oo lava foʻi iā i latou e ʻinoʻino mai iā i tatou. Na fetalai Iesu: “Afai tou te alolofa atu i ē e alolofa mai iā te outou, o le ā se aogā iā te outou? Auā e oo foʻi i tagata agasala, latou te alolofa atu i ē e alolofa mai iā i latou. . . . Nai lo lea, ia alolofa atu pea i o outou fili . . . , E fai foʻi outou ma atalii o le Silisili Ese, auā e agalelei mai o ia i ē e lē lotofaafetai ma ē amioleaga.”—Luka 6:32-36; 10:25-37.

Aiseā e fefaamagaloaʻi ai?

Pe a tatou faia ni mea sesē, e tatou te mananaʻo i le Atua e faamagalo mai i tatou. Na aʻoaʻo e Iesu e talafeagai mo i tatou ona tatalo mo le faamagaloga a le Atua. (Mataio 6:12) Peitaʻi, na fetalai foʻi Iesu e faapea, e faatoʻā faamagalo i tatou e le Atua pe afai e tatou te faamagalo atu i isi. Na ia fetalai: “Afai tou te faamagaloina mea sesē e fai mai e tagata, ona faamagaloina foʻi lea o outou e lo outou Tamā o i le lagi. Ae afai tou te lē faamagaloina mea sesē e fai mai e tagata, e lē faamagaloina foʻi e lo outou Tamā a outou mea sesē.”—Mataio 6:14, 15.

 E mafai faapefea ona fiafia aiga?

E ui e leʻi faaipoipo Iesu, ae e tele ni mea e mafai ona tatou aʻoaʻoina mai iā te ia i le auala e maua ai le fiafia i le aiga. Ua ia faataatia se faaaʻoaʻoga mo i tatou e faaaʻoaʻo i ai, e lē gata i ana upu a o ana gaoioiga. Seʻi iloilo manatu e tolu o loo mulimuli mai:

1. E ao i se tane ona alofa i lana avā e pei o lona lava tino. Sa faataatia e Iesu se faaaʻoaʻoga mo tane. Na ia fetalai atu i ona soo: “Ua ou tuuina atu iā te outou le poloaʻiga fou, ina ia outou fealofani.” O le ā le tele? Na ia fetalai, “E pei ona ou alofa atu iā te outou.” (Ioane 13:34) I le faatatauina o lenei mataupu silisili i tane, ua taʻua i le Tusi Paia: “O outou tane, ia faaauau ona alolofa atu i a outou avā, e pei o le Keriso foʻi ona alofa i le faapotopotoga, ma foaʻi atu lona ola mo le faapotopotoga, O le mea lea, e tatau i tane ona alolofa atu i a latou avā e pei o o latou lava tino. O lē e alofa i lana avā, e alofa o ia iā te ia lava, auā e leai se tane e ita i lona lava tino; ae e na te fafaga ma faapelepele i ai, e pei foʻi ona faia e Keriso i le faapotopotoga.”—Efeso 5:25, 28, 29.

2. E ao i paaga faaipoipo ona faamaoni le tasi i le isi. O le faia o feusuaʻiga i fafo atu o le faaipoipoga, o se agasala i le Atua ma e faamalepeina ai aiga. Na fetalai Iesu: “Tou te leʻi faitau ea . . . ‘⁠O le mea lea e tuua ai e le tane lona tamā ma lona tinā, ma nonofo faatasi ma lana avā, ona avea ai lea o i laʻua ma tino e tasi’? O lea ua lē toe toʻalua ai, ae ua avea i laʻua ma tino e tasi. O ē ua faatasia e le Atua, aua neʻi tuueseeseina e se tagata. . . . Ou te fai atu iā te outou, ai se tasi e faateʻa i lana avā ae e leʻi faitaaga lana avā, ma toe faaipoipo i se isi fafine, ua mulilua o ia.”—Mataio 19:4-9.

3. E ao i fanau ona gauaʻi i o latou mātua. E ui lava sa lelei atoatoa Iesu ae lē lelei atoatoa ona mātua, ae sa ia usitai iā i laʻua a o tamaitiiti. Ua faapea mai le Tusi Paia e faatatau iā Iesu ina ua 12 ona tausaga: “Ona latou ō lea ma ona mātua i Nasareta, ma ua gauaʻi pea o ia iā i laʻua.”—Luka 2:51; Efeso 6:1-3.

Aiseā e ao ai ona faatatauina nei mataupu silisili?

E tusa ai ma lesona na ia aʻoaʻo atu i ona soo, na fetalai atu Iesu: “Afai ua outou iloa nei mea, e fiafia outou pe a outou faia.” (Ioane 13:17) Ina ia avea ma Kerisiano moni, e ao ona tatou faatatau le fautuaga na aumai e Iesu iā i tatou e faatatau i le auala e feagai ai ma isi. Na ia fetalai e faapea: “O le mea lea e iloa ai e tagata uma o oʻu soo outou, pe afai tou te fealofani.”—Ioane 13:35.

Mo nisi faamatalaga, tagaʻi i le mataupu e 14 o le tusi O ā Aʻoaʻoga Moni a le Tusi Paia? *

[Faaopoopoga i lalo]

[Ata i le itulau 16, 17]

Ua aʻoaʻo mai iā i tatou e le talafaatusa a Iesu i le atalii faamaumau ʻoa, le tāua o le agalelei ma le faamagalo atu.—Luka 15:11-32

[Ata i le itulau 17]

E ao i paaga faaipoipo ona faamaoni le tasi i le isi