Ia Mafuta Atu i le Atua

Pe Mafai e se Mea Ona “Faateʻaeseina i Tatou Mai le Alofa o le Atua”?

Roma 8:38, 39

E TATOU te mananaʻo uma lava e alofagia i tatou. O le mea moni, e tatou te ola fiafia pe a alofagia i tatou e tauaiga ma uō. Ae e faanoanoa lava, o faiā faaletagata, e faigofie lava ona malepe ma lē tumau. E ono mafai e ē pele iā i tatou ona faatigā, tuulafoaʻi, ma teena i tatou. Ae peitaʻi, o loo iai se tasi e lē taitai suia lona alofa. E mataʻina le auala o loo faamatalaina ai i le Roma 8:38, 39, le alofa o Ieova mo ona tagata tapuaʻi.

Na faapea mai le aposetolo o Paulo, “Ua ou mautinoa.” O le ā ua ia mautinoa i ai? E leai se mea e mafai ona “faateʻaeseina i tatou mai le alofa o le Atua.” E lē o tautala Paulo mo na o ia lava, ae mo i “tatou” foʻi—o lona uiga, mo tagata uma o loo auauna ma le faamaoni i le Atua. Ina ia faamaonia le moni o le manatu o Paulo, na ia taʻuina mai nisi o mea e lē mafai ona taofia ai le alofa o Ieova i ana auauna faamaoni.

“E lē mafai e le oti, po o le ola.” E lē taitai muta le alofa o Ieova mo ona tagata pe a latou maliliu. O le faamaoniga o le alofa o Ieova, ona o loo tumau pea ona iai i latou i lona finagalo, ma o le a ia toe faatutūina i latou i le lalolagi fou amiotonu ua lata mai. (Ioane 5:28, 29; Faaaliga 21:3, 4) O lea la, e tumau pea le alofa o Ieova mo ona tagata tapuaʻi, e tusa lava po o le ā le mea e oo iā i latou i lenei faiga o mea a le lalolagi.

“Po o agelu, po o malo.” E faigofie ona lolo atu tagata i taaʻiga a tagata maualuluga po o pulega, ae e lē faapena le tulaga o Ieova. E lē mafai e se foafoaga malosi agaga, e pei o Satani, ona taofia le alofa o le Atua i ona tagata tapuaʻi. (Faaaliga 12:10) E lē mafai foʻi e malo lea e foliga mai e tetee i Kerisiano moni, ona latou suia le silafaga a le Atua i ana auauna.—1 Korinito 4:13.

“Po o mea ua iai nei, po o mea e oo mai.” E lē mafai ona mou atu le alofa o le Atua po o le ā lava le umi. E lē mafai e se mea e ono tupu i auauna a le Atua i le taimi nei po o le lumanaʻi, ona aveesea lona alofa iā i latou.

“Po o ē malolosi.” Na faasino atu Paulo i malosiaga i le lagi ma le lalolagi—“agelu” ma “malo”—ae o lea ua ia taʻua “ē malolosi.” O le upu Eleni o loo faaaogā i inei, e lautele lona uiga. Ae po o le ā lava le uiga tonu, e tasi le mea e mautinoa: E lē mafai e se malosiaga i le lagi po o le lalolagi, ona taofia le oo atu o le alofa o Ieova i ona tagata.

“Po o le maualuga, po o le loloto.” E alofa Ieova i ona tagata e tusa lava po o ā tulaga—pe taualoa pe faatauvaa—o le olaga o loo latou ola ai.

“Po o se isi lava foafoaga.” Ona o nei upu lea e aofia ai le foafoaga uma, na faapea mai ai Paulo e matuā leai se mea e faateʻaeseina le alofa o Ieova i ona tagata tapuaʻi faamaoni.

E ese mai le alofa o tagata, lea e mafai ona suia pe mou atu, o le alofa o le Atua i ē faaauau pea ona saʻili atu iā te ia ma le faatuatua, e lē masuia; ae e tumau pea. O le iloaina o lenei mea, e mautinoa lava le uunaʻia ai o i tatou e mafuta atu iā Ieova, ma taumafai e fai le mea tatou te mafaia ina ia faaali atu ai lo tatou alofa mo ia.