Pe Tatau Ona Iai le Suafa o Ieova i le Feagaiga Fou?

PE TĀUA le taʻua o le suafa o le Atua i le Tusi Paia? E mautinoa o le finagalo lenā o le Atua. E toetoe 7,000 taimi o loo taʻua ai lona suafa e pei ona sa tusia ai i mataʻitusi Eperu e fā e taʻua o le Tetakalamatone, i uluaʻi tusitusiga Eperu lea e masani ona taʻua o le Feagaiga Tuai. *

E ioe tagata faitofā o le Tusi Paia e faapea, o loo taʻua le suafa o le Atua i le Feagaiga Tuai, po o Tusitusiga Eperu. Peitaʻi, ua manatu le toʻatele e leʻi taʻua le suafa o le Atua i uluaʻi manusikulipi po o uluaʻi tusitusiga o le gagana Eleni, lea ua taʻua o le Feagaiga Fou.

O le ā la ua tupu pe a sii mai e se tusitala o le Feagaiga Fou se mau mai le Feagaiga Tuai, lea o loo aliali mai ai le Tetakalamatone? I tulaga faapea, o le toʻatele o le ʻaufaaliliu ua latou faaaogā le taʻu “Alii” nai lo le suafa totino o le Atua. E lē o mulimuli Le Tusi Paia o le Lalolagi Fou i lenei faiga. E 237 taimi o loo faaaogā ai le suafa o Ieova i le Vaega faa-Eleni o le Tusi Paia, po o le Feagaiga Fou.

O ā faafitauli ua fesagaʻi ma le ʻaufaaliliu o le Tusi Paia pe a oo ina filifili, pe faamata e faaaogā le suafa o le Atua i le Feagaiga Fou? O ā ni māfuaaga faavae mo le faaaogāina o le suafa o le Atua i lenei vaega o le Tusi Paia? Ma e faapefea i le faaaogāina o le suafa o le Atua i le Tusi Paia ona aafia ai oe?

 Se Faafitauli i Mea Tau Faaliliu

O manusikulipi po o tusitusiga o le Feagaiga Fou o loo iai i aso nei, e lē o uluaʻi tusitusiga moni ia na iai. Sa tele ina faaaogā uluaʻi tusitusiga na tusia e Mataio, Ioane, Paulo, ma isi, ma e lē taumatea sa vave ona faaleagaina na tusitusiga. Peitaʻi, sa faia ni kopi, ma ina ua tuai na kopi, sa toe faia foʻi nisi kopi. I le faitau afe o kopi o le Feagaiga Fou lea o loo iai i aso nei, o le tele o nei kopi na faia i le pe tusa o le lua senituri mulimuli ane ai talu ona tusia uluaʻi kopi. E aliali mai la, e oo ane i lenā taimi, na suia e i latou na kopiina manusikulipi ia le Tetakalamatone i le Kuʹri·os po o le Kyʹri·os, o le upu Eleni mo le “Alii,” ia pe kopiina mai foʻi i manusikulipi ua uma ona iai le Alii. *

O le iloaina o lenei tulaga, e ao ai i se tagata faaliliu ona iloilo po o iai se faamaoniga talafeagai e faamaonia ai, e moni sa iai le Tetakalamatone i uluaʻi manusikulipi Eleni. Po o iai se faamaoniga faapena? Ia iloilo faamaoniga o loo mulimuli mai:

▪ Pe a sii mai pe faitau e Iesu se mau mai le Feagaiga Tuai, sa ia faaaogā le suafa o le Atua. (Teuteronome 6:13, 16; 8:3; Salamo 110:1; Isaia 61:1, 2; Mataio 4:4, 7, 10; 22:44; Luka 4:16-21) I aso o Iesu ma ona soo, sa iai le Tetakalamatone i kopi o tusitusiga Eperu lea e masani ona taʻua o le Feagaiga Tuai, seʻia oo mai lava foʻi i aso nei. Peitaʻi, mo le faitau senituri, na manatu tagata atamamai e leʻi iai le Tetakalamatone i manusikulipi o le faaliliuga faa-Eleni o le Feagaiga Tuai, lea e taʻu o le Septuagint, faapea foʻi ma manusikulipi o le Feagaiga Fou. O lea, i le ogatotonu o le senituri lona 20, na iloa ai e tagata atamamai se mea mataʻina—o nisi o vaega ua matuā leva lava o le faaliliuga faa-Eleni e taʻua o le Septuagint, lea na maua i aso o Iesu, o loo iai pea. O loo aofia ai i na vaega le suafa o le Atua, o loo tusia i mataʻitusi Eperu.

▪ Sa faaaogā e Iesu le suafa o le Atua ma faailoa atu i isi. (Ioane 17:6, 11, 12, 26) E  manino le fetalaiga a Iesu e faapea: “Ua ou sau i le suafa o loʻu Tamā.” Sa ia faamamafa foʻi e faapea o ana galuega na faia i le “suafa o [lona] Tamā.” O le mea moni, o le igoa o Iesu o lona uiga, “O Ieova le Faaolataga.”—Ioane 5:43; 10:25.

▪ O loo tusi faapuupuu le suafa o le Atua i Tusitusiga Eleni. I le Faaaliga 19:1, 3, 4, 6, ua faia aʻe ai le suafa o le Atua i le faaupuga “Aleluia,” po o le “Haleluia,” o lona uiga, “Ia outou vivii atu iā Ioa!” O Ioa, o le faapuupuu lenā o le suafa o Ieova.

▪ Ua faaalia mai i uluaʻi tusitusiga a tagata Iutaia, sa faaaogā e Kerisiano Iutaia le suafa o le Atua i a latou tusitusiga. Ua taʻua i le The Tosefta, o se tuufaatasiga o tulafono tuu gutu na faamāeʻaina i le pe tusa o le 300 T.A., e faatatau i tusitusiga a Kerisiano lea sa susunuina i le Sapati: “E leʻi faasaoina mai le afi tusi a le ʻautusitala a Evagelia ma tusi a le ʻau minim [sa manatu i ai o Kerisiano Iutaia]. Ae o le mea lava na maua ai na tusi na susunu ai, . . . atoa ai ma faamaumauga e faatatau i le suafa o le Atua sa iai i na tusi.” Ua toe sii mai e Rabbi Yosé o Kalilaia, o lē na ola i le amataga o le senituri lona lua T.A., le faamatalaga lava lenei e tasi, e pei ona taʻua ai e faapea i isi aso o le vaiaso, “e ʻoti ese ai e se tasi ia faamaumauga o le Suafa o le Atua lea o loo iai i na tusi [tusitusiga Kerisiano] ma teu faalelei i se isi mea, ae susunu faamaumauga na totoe.” O lea, e iai se faamaoniga malosi o le talitonu o tagata Iutaia sa ola i le senituri lona lua T.A. e faapea, sa faaaogā e Kerisiano le suafa o Ieova i a latou tusitusiga.

Na Faapefea Ona Taulima e le ʻAufaaliliu Lenei Mataupu?

Po o le Tusi Paia o le Lalolagi Fou, ua na o le pau lea o le Tusi Paia ua toe faafoʻisia ai le suafa o le Atua, ina ua faaliliuina Tusitusiga Eleni? E leai. E faavae i faamaoniga ua taʻua i luga, ua manatu ai le toʻatele o tagata faaliliu o le Tusi Paia e faapea, e ao ona toe faafoʻisia le suafa o le Atua pe a latou faaliliuina le Feagaiga Fou.

O se faataʻitaʻiga, o le tele o faaliliuga faa-Aferika, faa-Amerika, faa-Asia, ma faaliliuga faa-Pasefika o le Feagaiga Fou, o loo tele ina faaaogā ai le suafa o le Atua. (Tagaʻi i le siata i le itulau e 21.) O nisi o nei faaliliuga e leʻi leva talu ai nei ona iai, e pei o le Tusi Paia faa-Rotuma (1999), lea e 51 taimi o loo faaaogā ai le suafa Jihova i fuaiupu e 48 o le Feagaiga Fou, ma le faaliliuga faa-Batak-Toba (1989) mai Initonesia, lea e 110 taimi o loo faaaogā ai le suafa Jahowa i le Feagaiga Fou. O loo iai foʻi le suafa o le Atua i faaliliuga faa-Falani, faa-Siamani,  ma le faa-Sepania. O se faaaʻoaʻoga, i le amataga o le senituri lona 20, na faaliliu ai e Pablo Besson le Feagaiga Fou i le faa-Sepania.O loo faaaogā i lana faaliliuga le suafa Jehová i le Iuta 14, ma e lata i le 100 faaopoopoga i le pito i lalo o loo taʻua ai le suafa o le Atua lea e tatau ona iai.

O loo taʻua i lalo nisi o faataʻitaʻiga o faaliliuga faa-Peretania o loo faaaogā ai le suafa o le Atua i le Feagaiga Fou:

•A Literal Translation of the New Testament . . . From the Text of the Vatican Manuscript, faaliliuina e Herman Heinfetter (1863)

•The Emphatic Diaglott, faaliliuina e Benjamin Wilson (1864)

•The Epistles of Paul in Modern English, faaliliuina e George Barker Stevens (1898)

•St. Paul’s Epistle to the Romans, faaliliuina e W. G. Rutherford (1900)

•The Christian’s Bible—New Testament, faaliliuina e George N. LeFevre (1928)

•The New Testament Letters, faaliliuina e J.W.C. Wand, le Epikopo mai Lonetona (1946)

Talu ai nei lava, na tusia ai i upu tomua o le lomiga o le 2004 o le New Living Translation le manatu lenei, i lalo o le ulutala lea pe a faaliliuina i le faa-Samoa e faapea, “Le Faaliliuina o Suafa o le Atua”: “O le tele o taimi ua matou faaliliuina ai pea le tetakalamatone (YHWH) i ‘le ALII,’ i le faaaogāina o mataʻitusi tetele lea ua faalāiti lea e taatele i faaliliuga faa-Peretania. O lenei faiga o le a faaeseese ai le suafa o le Atua mai le taʻu ʹadonai, lea e matou te faaliliuina i le ‘Alii.’” Ma o loo taʻua mai ai e  faatatau i le Feagaiga Fou: “O loo faaliliuina pea le upu Eleni o le kurios i le ‘Alii,’ ae seʻi vaganā ai ua sii mai le Feagaiga Tuai, ona matou faaliliuina lea i le ‘ALII,’ ma o le mau lenā o loo tusia i mataʻitusi tetele ua faalaiti.” (O upu faasisipa o a matou.) O lea la, ua faailoa mai ai e le ʻaufaaliliu o lenei Tusi Paia, e tatau ona suia le tusia o le Tetakalamatone (YHWH) i mau sii o le Feagaiga Fou.

O le itu e mataʻina ai, i lalo o le ulutala lea pe a faaliliuina i le faa-Samoa e faapea, “Tetakalamatone i le Feagaiga Fou,” o loo taʻua ai i le The Anchor Bible Dictionary e faapea: “E iai nisi faamaoniga e faamaonia ai sa iai le Tetakalamatone, le Suafa o le Atua, Yahweh (Iāuē), i nisi o mau sii po o mau sii uma foʻi o le Feagaiga Tuai i le Feagaiga Fou, ina ua muaʻi tusia tusi o le NT.” Ma ua taʻua e le tagata poto e igoa iā George Howard: “Talu ai ona o le Tetakalamatone o loo tusia lava i kopi o le Tusi Paia Eleni [le Septuagint] lea o loo faia aʻe ai le Tusi Paia a le uluaʻi lotu, ua talafeagai ai la ona talitonu e faapea na faasaoina mai e tusitala o le Feagaiga Fou le Tetakalamatone i tusitusiga paia ina ua latou siiina mai.”

Māfuaaga Talafeagai e Lua

O lea la, e manino mai, o le Tusi Paia o le Lalolagi Fou, e lē o le uluaʻi Tusi Paia lea ua taʻua ai le suafa o le Atua i le Feagaiga Fou. I le pei o se faamasino ua valaaulia e na te faia se faamasinoga ae e leai ni molimau, ua iloilo totoʻa ai e le Komiti o le Tusi Paia o le Lalolagi Fou faamaoniga uma lava. I le faavae i mea moni, na latou filifili e faaaofia ai le suafa o Ieova i la latou faaliliuga o Tusitusiga Kerisiano Eleni. Seʻi mātau mai māfuaaga talafeagai e lua na māfua ai ona latou faia faapea.

(1) Na talitonu le ʻaufaaliliu e faapea, ona o Tusitusiga Kerisiano Eleni na faagaeeina e faaopoopo atu i Tusitusiga paia Eperu, e foliga mai la e lē talafeagai ona aveese faafuaseʻi le suafa o Ieova mai lea vaega o le Tusi Paia.

Aiseā ua talafeagai ai lea faaiʻuga? I le pe tusa o le ogatotonu o le uluaʻi senituri T.A., na faapea atu ai le soo o Iakopo i toeaina i Ierusalema: “Ua uma ona faamatala auʻiliʻili atu e Simeona e faapea, o le uluaʻi taimi lea ua silasila ai le Atua i nuu ese, ina ia filifilia mai ai ni tagata mo lona suafa.” (Galuega 15:14) Pe e talafeagai iā te oe pe afai o le a fai atu e Iakopo lenā faamatalaga, ae e leai ma se tasi o le uluaʻi senituri na iloaina le suafa o le Atua, pe faaaogāina foʻi?

(2) Ina ua maua kopi o le Septuagint lea sa faaaogā ai le suafa o le Atua nai lo le Kyʹri·os (Alii), na manino mai ai i le ʻaufaaliliu e faapea, o kopi uma o uluaʻi Tusitusiga sa iai i aso o Iesu, i le gagana Eleni—faapea ma le gagana Eperu— sa iai le suafa o le Atua.

E foliga mai la, o se faiga e lē faamamaluina ai le Atua le aveesea o lona suafa mai manusikulipi Eleni, ia sa faia mulimuli ane ina ua tuanaʻi aso o Iesu. O le ā sou manatu? Po o le a faaauilumaina e Iesu ma ona aposetolo sea ituaiga faiga?—Mataio 15:6-9.

Ia Valaau i le “Suafa o Ieova”

Ioe, e aunoa ma se faalētonu ua faamaonia e le Tusi Paia lava ia e faapea, sa faaaogā e uluaʻi Kerisiano le suafa o Ieova i a latou tusitusiga, aemaise lava pe a latou siiina mai mau mai le Feagaiga Tuai lea o loo iai lenā suafa. E mautinoa la, o loo iai i le Tusi Paia o le Lalolagi Fou ni māfuaaga autū o le toe faafoʻisia o le suafa o le Atua, o Ieova, i Tusitusiga Kerisiano Eleni.

E faapefea ona aafia ai oe i nei faamatalaga? I le siiina atu o Tusitusiga Eperu, na faamanatu atu ai e le aposetolo o Paulo i Kerisiano i Roma e faapea: “E faaolaina i latou uma o ē e valaau i le suafa o Ieova.” Ona ia fesili atu lea: “E faapefea ona latou valaau atu iā te ia o lē latou te lē o faatuatua i ai? E faapefea ona latou faatuatua iā te ia o lē latou te lē o faalogo i ai?” (Roma 10:13, 14; Ioelu 2:32) E fesoasoani iā te oe faaliliuga o le Tusi Paia o loo faaaogā ai le suafa o le Atua pe a talafeagai, ina ia mafuta vavalalata atu ai i le Atua. (Iakopo 4:8) O le mea moni, o se faaeaga uiga ese mo i tatou le iloaina ma valaau i le suafa o le Atua, o Ieova.

[Faaopoopoga i lalo]

 [Pusa]

SE TAGATA FAALILIU NA FAAALOALOGIA LE SUAFA O LE ATUA

Iā Novema i le 1857, na taunuu ai Hiram Bingham II, o se misionare e 26 tausaga le matua, faatasi ma lana avā i le Gilbert Islands (lea ua taʻu nei o le Atu Kiripati). O le vaa lea na faimalaga ai lenei misionare, sa faatupeina i ni foaʻi tauofo itiiti mai tamaiti o le aʻoga Aso Sa o se lotu i Amerika. Sa faaigoa le vaa e tagata na faatupeina, i le Morning Star, ina ia faailoa atu ai lo latou talitonuga i le Meleniuma o loo fotuaʻi mai.

Ua taʻua e Barrie Macdonald i lana tusi o le Cinderellas of the Empire, “E leʻi lelei le soifua mālōlōina o Bingham. Sa aafia o ia i le maʻi tau manava ma se faalētonu faaumiumi i lona faaʻī, lea na aafia ai lona tomai e tautala atu ai i le lautele; sa leʻi lelei lana vaai ma sa na o le lua pe tolu itula o le aso na mafai ona ia faaaluina e faitau ai.”

Peitaʻi, sa faanaunau Bingham e aʻoaʻoina le gagana Kiripati. E leʻi faigofie lenei galuega. Sa amata ona ia fai e ala i le faasino atu i mea ma fesili atu i tagata e tautatala i le gagana Kiripati po o ā taʻu o na mea. Ina ua iai sana lisi o upu e pe tusa ma le lua afe, sa ia totogia se tasi o tagata na ia faaliliuina, e tasi le tālā i upu e selau e na te faaopoopo atu i le lisi.

Na tauia le filigā o Bingham. Ina ua oo i le taimi e na te tuua ai le Atu Kiripati i le 1865, ona ua faasolo ina fāi atu lona malosi, e lē gata na ia faavaeina se auala e tusitusi ai i le gagana Kiripati, ae sa ia faaliliuina foʻi tusi a Mataio ma Ioane i le faa-Kiripati. Ina ua ia toe foʻi ane i le motu i le 1873, na sau o ia ma aumai le faaliliuga atoa o le Feagaiga Fou i le gagana Kiripati. Sa faaauau pea lana galuega faaliliu mo le isi 17 tausaga, ma e oo ane i le 1890, ua uma ona faaliliuina le Tusi Paia atoa i le gagana Kiripati.

O loo faaaogāina i aso nei i Kiripati le Tusi Paia na faaliliuina e Bingham. O i latou e faitauina lenā Tusi Paia, o le a latou mātauina e faitau afe taimi na ia faaaogāina ai le suafa o Ieova (Iehova i le faa-Kiripati) i le Feagaiga Tuai, ae silia i le faalimasefulu taimi i le Feagaiga Fou. Ioe, o Hiram Bingham o se tagata faaliliu na ia faaaloalogia le suafa o le Atua!

[Pusa]

LE LISI O GAGANA E 99 O LOO FAAAOGĀINA AI LE TETAKALAMATONE I LA LATOU LAVA GAGANA I LE FEAGAIGA FOU

CHIHOWA: Choctaw

IÁHVE: Potukali

IEHOUA: Mer

IEHOVA: Kiripati; Hawaii; Hiri Motu; Kerewo; Kiwai; Marquesas; Motu; Panaieti (Misima); Rarotoga; Tahiti; Toaripi

IEHOVAN: Saibai

IEOVA: Kuanua; Wedau

IHOVA: Aneityum

IHVH: Falani

IOVA: Malekula (Kuliviu); Malekula (Pangkumu); Malekula (Uripiv)

JAHOWA: Batak-Toba

JAHUÈ: Chacobo

JAKWE: (Ki)Sukuma

JAHVE: Hagakeri

JEHOBA: Kipsigis; Mentawai

JEHOFA: Tswana

JEHOVA: Croatian; Siamani; Kélé (Gabon); Lele (Manus Island); Nandi; Nauru; Nukuoro

JEHOVÁ: Sepania

JEHÔVA: Fang; Tsimihety

JEHOVAH: Dutch; Efik; Peretania; Kalenjin; Malagasy; Narrinyeri; Ojibwa

JEOVA: Kusaie (Kosraean)

JIHOVA: Naga (Angami); Naga (Konyak); Naga (Lotha); Naga (Mao); Naga (Ntenyi); Naga (Sangtam); Rotuma

JIOUA: Mortlock

JIOVA: Fiti

JIWHẸYHE: Gu (Alada)

SIHOVA: Toga

UYEHOVA: Zulu

YAHOWA: Thai

YAHVE: Ila

YAVE: Kongo

YAWE: Bobangi; Bolia; Dholuo; Lingala; Mongo (Lolo); (Lo)Ngandu; (Lo)Ntumba; (Ke)Sengele

YEHÓA: Awabakal

YEHOFA: Itu i Saute o Sotho

YEHOVA: Chokwe; Chuana (Tlapi); (Ki)Kalanga; Logo; Luba; Lugbara; (Chi)Luimbi; (Chi)Lunda (Ndembu); (Chi)Luvale; Santo (Hog Harbor); Tiv; Umbundu; (Isi)Xhosa

YEHOVAH: Bube; Mohawk; Nguna (Efate); Nguna (Tongoa)

YEHOWA: Ga; Laotian; (Ki)Songe; Tshiluba

YEKOVA: Zande

YEOBA: Kuba (Inkongo)

YEOHOWA: Korea

YHWH: Eperu

YOWO: Lomwe

ZAHOVA: Chin (Haka-Lai)

[Ata]

Hiram Bingham II

Le Tusi Paia a Bingham i le Gagana Kiripati

[Ē Ana le Ata]

Ata pito i luga mai le tusi a Alfred M. Bingham: “The Tiffany Fortune”

[Siata/​Ata i le itulau 18, 19]

(Tagaʻi i le lomiga mo le ata atoa)

200

TEUTERONOME 6:4

NASH PAPYRUS

Senituri lona lua po o le muamua T.L.M.

[Ata]

O loo faalua ona taʻua i tusitusiga Eperu anamua le suafa o le Atua

100

SE VAEGA O LE TEUTERONOME 18:15,16

P. FOUAD INV. 266

Senituri muamua T.L.M.

[Ata]

Le faaliliuga Eleni e taʻu o le Septuagint o loo iai le suafa o le Atua i mataʻitusi Eperu

[Ē Ana le Ata]

Société Royale de Papyrologie du Caire

↑

T.L.M.

T.A.

↓

100

300

400

TEUTERONOME 18:15, 16

LE TUSI ALEXANDRINUS

Le senituri lona lima T.A.

[Ata]

Na aveesea le suafa o le Atua ae suia i le K̇Ċ ma le KY, o faapuupuuga o le upu Eleni e taʻu o le Kyʹri·os (“Alii”)

[Ata]

Mai le The Codex Alexandrinus in Reduced Photographic Facsimile, 1909, i lalo o le faatagaga a le Faletusi o Peretania

500

 

1900

1950

GALUEGA 3:22, O LOO SII MAI AI LE TEUTERONOME 18:15

LE TUSI PAIA O LE LALOLAGI FOU

Senituri lona 20 T.A.

[Ata]

Ua toe faafoʻisia e le “Tusi Paia o le Lalolagi Fou” le suafa o le Atua

2000

[Ata i le itulau 20]

Le suafa o le Atua e pei ona tusia ai i le Roma 10:13 i faaliliuga eseese

Le Tusi Paia a Hutter i le gagana Eperu, Eleni, Latina, ma le gagana Siamani

Le Tusi Paia Faa-Rotuma

Le Tusi Paia o le Batak-Toba

Le Tusi Paia o le Lalolagi Fou