Ua Fesili Mai le ʻAufaitau

Aiseā e Faaaogā ai le Suafa o le Atua pe Afai e Lē Mautinoa Lona Faaleoga?

E leai ma se isi i le taimi nei na te iloa le faaleoga tonu o le suafa o le Atua i le faa-Eperu anamua. Ae o le mea e mataʻina ai, e pe ā ma le 7,000 taimi o loo maua ai le suafa patino o le Atua i tusi o le Tusi Paia. Na faailoa atu e Iesu le suafa o le Atua a o iai i le lalolagi, ma na ia faatonuina ona soo ina ia tatalo ia faapaiaina lenā suafa. (Mataio 6:9; Ioane 17:6) O lea, o le mea e mautinoa—o le faaaogāina o le suafa o le Atua, o se mea e matuā tāua lava i Kerisiano. Ae aiseā ua lē mautinoa ai po o le ā le faaleoga saʻo o lenā suafa i aso nei? E lua māfuaaga autū.

Muamua, pe tusa ma le lua afe tausaga ua mavae, sa amata ai se tū faanuupō i tagata Iutaia e faapea o se mea sesē le taʻuina o le suafa o le Atua. Pe a tau atu le faitau a se tagata i lea suafa i le Tusi Paia, e na te suia i le “Alii.” Ona o lenei tulaga, ma ua tele senituri ua mavae e lē o toe faaaogāina, ua galo ai i tagata le faaleoga saʻo o le suafa o le Atua.

Lona lua, sa tusia tusitusiga faa-Eperu anamua e aunoa ma ni vaueli, e taitutusa lava ma le tusi faapuupuu o nisi upu i le faa-Peretania faapea ma isi gagana. Pe a faitauina se tusitusiga, sa taʻu mai e le tagata faitau le vaueli e ao ona faaopoopo i ai. I se taimi mulimuli ane, sa fuafua ai se faiga ina ia aua neʻi faagaloina atoatoa le faaleoga o upu faa-Eperu. Sa faaopoopoina ni faailoga e iloa ai vaueli e faaaogā i upu taʻitasi i le Tusi Paia Eperu. Ae peitaʻi mo le suafa o le Atua, a lē o le faaopoopo o faailoga vaueli i le “Alii” e faamanatu ai i le tagata faitau le faaleoina o le upu ua sui ai, ia po o le leai lava o se mea e faaopoopo i ai.

O le iʻuga, e na o konesane e fā ua taʻua o le Tetakalamatone sa totoe mai i tusitusiga, lea ua faamatalaina e se tasi lomifefiloi o “mataʻitusi e fā faa-Eperu e masani ona faaliliuina YHWH po o le JHVH [i le faa-Peretania], lea e maua mai ai le suafa saʻo faale-Tusi Paia o le Atua.” Ua faigofie la ona iloa atu, pe a tuu vaueli ma o latou faaleoga i mataʻitusi JHVH, ona maua ai lea o le suafa o “Jehovah” (faa-Samoa, o Ieova), le faaleoga ua tele ina iloa ma taliaina i le gagana faa-Peretania.

Ae o nisi tagata atamamai, latou te mananaʻo e faaaogā le faaleoga “Yahweh” (Iāuē, i le faa-Samoa). Pe e tai tutusa lenei faaleoga i le faaleoga saʻo sa iai i le amataga? E leai se isi o mautinoaina i lenā mea. Ae sa taʻua e isi tagata atamamai māfuaaga ua lē faaaogāina ai lenei faaleoga. O le mea moni, pe a taʻua igoa i le Tusi Paia i gagana i aso nei, e lē taitai tutusa ma le faaleoga o igoa sa taʻua ai i le faa-Eperu, ae e seāseā iai se isi e teena na faaleoga i aso nei. O le māfuaaga, ona o na igoa ua avea ma vaega o la tatou gagana ma e faigofie ona iloa. E faapena foʻi le suafa o Ieova.

Sa taʻua Kerisiano i aso anamua, o tagata mo le suafa o le Atua. Na latou talaʻi atu i isi e uiga i lenā suafa ma faalaeiau i latou e valaau atu i ai. (Galuega 2:21; 15:14; Roma 10:13-15) E manino mai la, e matuā tāua i le Atua lo tatou faaaogā o lona suafa po o le ā lava le gagana tatou te tautatala ai, ia iloa lona tāua, ma ia ola e ōgatusa ma le uiga o lenā suafa.

[Faamatalaga faaopoopo i le itulau 31]

Ae o le mea e mataʻina ai, pe ā ma le 7,000 taimi o loo maua ai le suafa patino o le Atua i tusi o le Tusi Paia