E Faapeʻī Moni Lava lo Tatou Tamā i le Lagi?

O LE toʻatele e iloa le tatalo, Lo matou Tamā e, po o le Tatalo a le Alii, o le tatalo faataʻitaʻi lea na aʻoaʻo e Iesu i ona soo. (Mataio 6:9-13) O taimi uma latou te faia ai lenā tatalo, latou te faalupe le Atua e faapea, “Lo matou Tamā e.” E ui i lea, e toʻafia i latou e mafai ona faapea mai, e latou te iloa lelei o ia?

Ae faapefea oe? Pe e te iloa lelei le Atua? Po o iai sa oulua faiā vavalalata ma ia, talatalanoa ma ia, ma faasoa atu ou fiafiaga ma ou faanoanoaga iā te ia? O le mea moni, o le ā e aofia ai i le iloaina o ia?

“O Ieova o Lona Suafa Lea”

Atonu e iloa e se tamaitiiti laʻitiiti lona tamā i le taʻu o Papa. Peitaʻi, a o ia tuputupu aʻe, o le a ia iloa le igoa o lona tamā ma lona talaaga, ma atonu o le a ia mitamita ai. Ae faapefea lo tatou Foaʻi Ola o loo i le lagi? Pe e te iloa lona suafa totino ma le uiga o lenā suafa?

E ui e toʻatele e latou te taulotoina le faaupuga “Ia paia lou suafa” i le Tatalo a le Alii, ae atonu latou te lē iloa le tali o le fesili lenei, “Le suafa o ai?” (O le Tusi Paia Samoa, 1969) O le lagi e tumu i fetu, o se mauga telē, o se aʻau e tumu i ʻamu ma meaola felanulanuaʻi, ma e faamaonia e na mea e iai moni lava le Atua. Peitaʻi, e lē taʻu mai e na mea lona suafa. Ina ia iloa lenā suafa, e manaʻomia ona tatou saʻili atu i le Tusi Paia. O loo taʻu saʻo mai lava e faapea: “O Ieova o lona suafa lea.”—Esoto 15:3.

E finagalo le Atua e tatou te iloa o ia i lona suafa, o Ieova. Aiseā? Auā e faamatala e lona suafa le ituaiga tagata e iai o ia. O le uiga o lenā suafa “E Gaoioi o Ia e Tusa ai ma Tulaga Manaʻomia.” I nisi faaupuga, e avea o ia ma so o se mea e manaʻomia ina ia faataunuu ai ana fuafuaga. Seʻi vaai faalemafaufau i ai: Ina ia mafai e se tamā ona tausia lona aiga, o le a avea o ia ma sē e faigaluega, o se faufautua, o se faamasino, o sē e feutagaʻi, o sē e puipui, ma sē e aʻoaʻo i le aiga, ae faalagolago i manaʻoga ma le tulaga o le aiga. E faapena foʻi ona faamautinoa mai e le suafa o Ieova iā i tatou, e mafai e le  Atua ona faataunuuina lona finagalo ma manuia ai i latou uma e auauna iā te ia, e tusa lava po o le ā le mea e tupu.

Seʻi o tatou iloiloina tiute eseese e tauaveina e lo tatou Atua alofa, e tusa ai ma le uiga o lona suafa. O le a fesoasoani iā te oe e talisapaia ai le ituaiga Atua e iai Ieova, ma e aʻoaʻoina ai mea e manaʻomia e faalatalata atu ai iā te ia.

“O le Atua o le Alofa ma le Filemu”

Na faapea mai le aposetolo o Paulo e faatatau i Lē na faia i tatou o ia o le “Atua o le alofa ma le filemu.” (2 Korinito 13:11) Aiseā? Sa muaʻi fetalai mai Iesu Keriso: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.” (Ioane 3:16) Ona o le alofa tele i tagata, na tuuina mai ai e le Atua lona Alo pele e fai ma togiola, ina ia mafai ai e i latou o ē faatuatua iā te ia ona olioli i se olaga e leai se iʻuga, e leai se tigā ma se puapuaga ona o le agasala. O le mea lea na toe faapea mai ai Paulo: “O le totogi o le agasala o le oti lea, a o le meaalofa a le Atua o le ola e faavavau lea, e ala iā Keriso Iesu lo tatou Alii.” (Roma 6:23) Pe lē o se māfuaaga lelei lea e uunaʻia ai i tatou e alolofa i le Atua ma faalatalata atu iā te ia?

O loo faaali mai e le Atua lona alofa mo tagata uma aemaise lava i latou e faamaoni iā te ia. Sa faapea mai Mose e faatatau i tagata Isaraelu lē usiusitaʻi anamua: “Tou te faapea ea ona taui atu iā Ieova, le nuu vālea e ma le lē poto? e lē o lou Tamā ea o ia sa faatauina mai ai oe? e lē o ia ea na faia oe, ma na faatumauina oe?” (Teuteronome 32:6) Po o e iloa la le tāua o lenei mea? I le avea o se Tamā alofa, sa naunau tele Ieova i ona tagata, e ui o loo ia silafia o latou vaivaiga. Sa ia tausia o latou manaʻoga uma, o meafaitino, o faalogona, ma mea faaleagaga.

A o tatou fesagaʻi ma le olaga, e iai taimi e sologa lelei ai ma taimi e faalētonu ai, ma oo ai ina lē fiafia. E tatou te manaʻomia se tasi e fesoasoani iā i tatou ina ia saʻo la tatou vaai i mea. O ai e mafai ona fesoasoani mai? E ala mai i lana Afioga, le Tusi Paia, o loo avea ai Ieova o le Faufautua alofa ma Lē e tausia i tatou. O loo faaalia mai e lenā Tusi Paia le māfuaaga ua tele ai mafatiaga, ma le auala e mafai ai ona tatou manumalo mai ai. E pei ona tuuina atu e se tamā alofa se fesoasoani i lona atalii ona ua paʻū ma lavea, o le alofa tele o Ieova ua ia aapa mai ai e tuuina mai le fesoasoani ua tatou manaʻomia. O le mea moni, e lē puupuu le aao o Ieova mo ē e faatuatua iā te ia.—Isaia 59:1.

O le isi auala e faaalia ai le alofa o le Atua mo i tatou o le avea lea o ia ma “Faafofoga tatalo.” (Salamo 65:2) E faapefea ona iloa ai lona alofa? Sa faamatala mai e le aposetolo o Paulo: “Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai; ona leoleoina ai lea o outou loto ma mafaufau i le filemu mai le Atua, lea e silisili i mea uma lava e manatu i ai, e ala iā Keriso Iesu.” (Filipi 4:6, 7) E ala i le liliu atu i le Atua i tatalo mai le loto ma mulimuli i taʻiala o loo i lana Afioga, o le a e tofo ai i le “filemu mai le Atua, lea e silisili i mea uma lava e manatu i ai.”

O le Atua e Silafia Mea

O loo faamatalaina Ieova i le Tusi Paia e faapea e atoatoa, pe “faamaoni lona poto.” I le avea o ia o se “Atua sisila,” pe silafia mea, o lona uiga e sili lona malamalama lelei i le natura ma manaʻoga o tagata nai lo se isi tagata. (Iopu 36:4; 1 Samuelu 2:3) Na ia faailoa mai e ala i lana auauna o Mose “e lē na o mea e ʻai e ola ai tagata, a o mea uma e tulei mai i le fofoga o Ieova e ola ai tagata.” (Teuteronome 8:3; Mataio 4:4) O lona uiga la, ina ia maua se olaga e  faamalieina moni, e lē na o meafaitino e tatou te manaʻomia.

E tuuina mai e Lē na faia i tatou ia taʻiala ma fautuaga e ala mai i lana Afioga, le Tusi Paia. Pe a tatou suʻesuʻeina le Tusi Paia ma faatatau fautuaga i o tatou olaga, o le a tatou maua aogā mai mea “e tulei mai i le fofoga o Ieova.” O se faaaʻoaʻoga, o Susana, o se fafine Kerisiano, lea na faapea mai e faatatau i le olaga o lona aiga: “Sa faamalosia le ma faaipoipoga e ala i lo ma faitauina faatasi o le Tusi Paia, auai faatasi i sauniga faa-Kerisiano, ma le faailoa atu i isi o mea na ma aʻoaʻoina. Ona o aʻoaʻoga faaleagaga mai le Atua, ua tutusa ai o ma sini ma lo maʻua fiafia i se faiā malosi.”

Pe e te fia maua aogā mai fautuaga faaleagaga ma taʻitaʻiga lea e tuuina mai e le Atua? E ala i le suʻesuʻe e lē aunoa o le Tusi Paia ma faatatau ana fautuaga, ua e tuua ai oe i se tulaga e te maua ai le tele o faamanuiaga faaleagaga mai iā te ia.—Eperu 12:9.

‘O le Atua o le Faaolataga’

Ua tele feeseeseaʻiga i le lalolagi i aso nei. E lē mautinoa po o le ā le mea o le a tupu i le aso a taeao. Afai o loo e aumau i se atunuu o loo fetauaʻi, atonu la o loo e moomoo mo le filemu. I le tele o isi vaipanoa o le lalolagi, e nonofo ma le fefefe tagata ona o soligatulafono ma faiga sauā, le tulaga lē mautū o le tamaoaiga, ma le taufaamataʻu mai o faiga faatupu faalavelave. O ai o le a laveaʻia i tatou mai nei mea uma? Ua leai se isi taimi e faapea ona ua matuā manaʻomia ai lava e tagata se puipuiga ma se laveaʻiga.

O loo faapea mai le Tusi Paia, “O le suafa o Ieova, o le ʻolo malosi lea; e sola atu i ai lē amiotonu, ona sao ai lea o ia.” (Faataoto 18:10) O le iloa o le suafa o le Atua ma faalagolago i ai, o le a mafai ai ona faauaʻi atu o tatou manatu i mea ua ia faia ma mea o le a ia faia e laveaʻiina ai i latou e faaalia le faatuatua iā te ia. Ua matuā faamaonia e Ieova le Atua e mafai ona ia laveaʻiina ona tagata. O se faaaʻoaʻoga, na ia laveaʻiina tagata Isaraelu e ala i le faaumatiaina o kariota tau a Farao ma ana ʻau. Ua faamaonia le avea o Ieova ma Atua o le faamaoni, o le Atua e manatua puapuaga o tagata ma faanaunau e gaoioi mo i latou.—Esoto 15:1-4.

E faalagolago foʻi lo tatou lumanaʻi e faavavau i le iai o le faatuatua iā Ieova le Atua, o ia o le Faaola. O le tupu o Isaraelu anamua o Tavita, o lē na onosaia le tele o faigatā, na ia faaalia lenā ituaiga o faatuatua ina ua ia tusi e faatatau iā Ieova: “O oe o le Atua o loʻu olataga.” (Salamo 25:5) Sa faapea mai ma le mautinoa le aposetolo o Peteru: “E silafia e Ieova le auala e laveaʻi ai tagata e faamaoni iā te ia mai i o latou puapuaga.”—2 Peteru 2:9.

E tusa ai ma se tagata e saʻili atu iā te ia mo le fesoasoani, ua folafola mai e le Atua: “Ou te faamamalu iā te ia ona ua iloa e ia loʻu igoa.” (Salamo 91:14) Ua iloa e auauna a le Atua i aso nei le moni o lenā folafolaga. Ua 70 tausaga o auauna faamaoni Henryk, mai Polani, e ui i puapuaga ma sauāga. I le 16 o tausaga o Henryk, sa ave ai lona tamā i Auschwitz i nofoaga mo faasalaga mamafa. Ae sa ave Henryk ma lona uso i nofoaga a Nazi e faasala ai talavou. Ina ua māeʻa  lenā mea, ona feaveaʻi solo lea o ia i nofoaga eseese mo faasalaga mamafa. E tusa ma mea na tutupu i na aso, na faapea mai Henryk: “I nei taimi faigatā uma, e leʻi tuulafoaʻia aʻu e Ieova. Na ia fesoasoani mai i taimi uma ina ia ou tutumau ma le faamaoni, e ui ina tele taimi na toeitiiti ai lava oo mai le oti iā te aʻu.” O lea la, e tuuina mai e Ieova le faatuatua ma le malosi i ana auauna e onosaia ai nei mea.

E lē o toe umi ae faamaonia loa le avea o le Atua ma Faaola mo ē faatuatua iā te ia ma saʻili atu iā te ia mo se laveaʻiga. Ua ia faailoa mai: “O aʻu lava o Ieova; a e leai se faaola ua na o aʻu lava.” (Isaia 43:11) “I le taua o le aso tele o le Atua o Lē e ona le malosi uma lava,” o le a ia liaʻieseina tagata amioleaga mai le laueleele ae laveaʻiina ē sao a latou amio. (Faaaliga 16:14, 16; Faataoto 2:21, 22) Ua faamautinoa mai e Ieova iā i tatou: “O ē agamalu, e fai mo latou le nuu; e faafiafia foʻi i latou iā te i latou ona o le manuia e tele.”—Salamo 37:11.

Ia Avea ma “Fanau a le Atua”

I vaitaimi o le perofeta o Malaki, na faapea mai tagata Isaraelu, o Ieova lo latou Tamā. Peitaʻi, ina ua oo i le taimi e faaali atu ai le āva ma lo latou tuutoina atu iā te ia, na latou ofo atu taulaga o falaoa leaga, ma meaola tauaso ma mamaʻi. O le māfuaaga lea na fesili atu ai Ieova iā te i latou: “Afai o aʻu o le tamā, o ifea ni oʻu āva?”—Malaki 1:6.

Aua neʻi e sesē ai i lea tulaga e pei o na tagata Isaraelu lē faamaoni. Nai lo lea, matou te faalaeiauina oe e aʻoaʻo e faatatau iā Ieova le Atua ma faalatalata atu iā te ia. Na timaʻi mai le soo o Peteru: “Ia outou mafuta vavalalata atu i le Atua, ona mafuta vavalalata mai lea o ia iā te outou.”—Iakopo 4:8.

E iai tiute tauave i le avea ai o Ieova ma o tatou Tamā. A e taumafai e faamamaluina le Atua e ala i le faamaoni i le tausisia o ana tapulaa i tafa uma o lou olaga, e lē mafai ona ia faagaloina au taumafaiga. E lē gata i lea, o le a ia fesoasoani iā te oe ina ia e savali i le ala saʻo e oo atu i le lalolagi fou ua folafola mai, lea “e lē toe iai se oti, po o se faanoanoa, po o se tagiauē, e lē toe iai foʻi se tigā.” (Faaaliga 21:4) I lenā taimi, o le a “saʻoloto ai le foafoaga [o tagata usiusitai] mai le faapologaina i mea leaga, ma maua ai le saʻolotoga mamalu o le fanau a le Atua.”—Roma 8:21.

[Faamatalaga faaopoopo i le itulau 5]

E finagalo le Atua e tatou te iloa o ia i lona suafa, o Ieova, ma o le uiga o lenā suafa “E Gaoioi o Ia e Tusa ai ma Tulaga Manaʻomia”

[Faamatalaga faaopoopo i le itulau 6]

“I nei taimi faigatā uma, e leʻi tuulafoaʻia aʻu e Ieova.”—HENRYK

[Faamatalaga faaopoopo i le itulau 7]

“Sa faamalosia le ma faaipoipoga i lo ma faitauina faatasi o le Tusi Paia, auai faatasi i sauniga faa-Kerisiano, ma le faailoa atu i isi o mea na ma aʻoaʻoina.”—SUSANA