Ia Mafaufau i le “Iʻuga”

E TELE filifiliga e tatau ona tatou faia i le faigāmalaga o lenei olaga. E mautinoa lava o se gaoioiga atamai le taumafai ia iloa po o le ā o loo i le iʻuga o se auala, a o leʻi faia sa tatou gaoioiga. Ua matuā salamō lava nisi i faaiʻuga ua latou faia. Atonu ua uma foʻi ona e faia le faaupuga lenei: ‘⁠Ana ou iloa o le iʻuga lea, ou te lē faia lenei tulaga.’

O se tagata faimalaga e iai le poto masani, e manaʻo e iloa po o fea e iʻu i ai so o se auala lava. Atonu o le a ia faaaogā se faafanua ma saʻili atu i tagata e iloa lelei lenā vaipanoa. E mautinoa lava o le a ia utagia faailoilo e tau atu ai i le ala. Peitaʻi, i le faigāmalaga i lenei olaga, e faapefea ona e mautinoa i le auala e aupito i sili e ui ai? E tusa ai ma tagata o Isaraelu anamua, na faapea atu le Atua e ala iā Mose: “E, ana latou popoto, ana latou iloa lenei mea! ina ia latou mafaufau i o latou iʻuga.”—Teuteronome 32:29.

O le Fautuaga e Sili Ona Lelei

E lē manaʻomia ona tatou faaluafesasi po o le ā le “iʻuga” o ala e ono tulaʻi mai i le faigāmalaga o le olaga. Pe a fua i lona tulaga sili ona maualuga, ua tonu ma talafeagai i le Atua ona fautuaina tagata faimalaga uma i le auala sili e ui ai. Ua ia silafia le tele o ala ua uia e tagata ma ua ia mātauina foʻi iʻuga ua oo i ai. O loo faapea mai le Tusi Paia: “O loo i luma o fofoga o Ieova o ala o le tagata; na te fuatia foʻi ona ala uma.”—Faataoto 5:21.

E tausia e Ieova i latou e alolofa iā te ia. E ala i lana Afioga, le Tusi Paia, ua ia faailoa mai ai le ala sili mo i latou. Tatou te faitau i ai faapea: “Ou te aʻoaʻo iā te oe, ma faasino iā te oe i lea  lava ala e te savali ai; ou te faatonu iā te oe, ma ou vaai iā te oe.” O lea la, a o e leʻi savalia so o se ala lava, e atamai lou saʻili atu mo fautuaga a Ieova, e pei ona tatalo le tupu Isaraelu anamua o Tavita: “Ia e faasino mai le ala ou te savali ai.”—Salamo 32:8; 143:8.

Afai e te malaga i se ala na faasino atu e se tagata faimalaga maufaatuatuaina toe iai le poto masani, e te lagona le mautinoa ma le malupuipuia. E te lē popole po o fea o agaʻi

i ai lenā ala. Sa saʻili atu ma mulimuli Tavita i le taʻitaʻiga ma le faasinoga a Ieova. O le iʻuga, sa ia maua le filemu o le mafaufau e pei ona tusia i le Salamo lona 23. Sa tusi Tavita: “O Ieova, o loʻu leoleo mamoe o ia; e leai se mea ou te mativa ai. Na te ave aʻu i le mea e i ai le vao muʻa ou te taoto ai; na te taʻitaʻi iā te aʻu i tafatafa o vai e tafe lemū. Na te faafoʻisia mai loʻu agaga; na te taʻitaʻi iā te aʻu i ala o le amiotonu ona o lona suafa. E ui lava ina ou savali i le vanu o le ata o le oti, ou te lē fefe lava i se mea leaga; auā o oe ta te faatasi ma aʻu; o lau laau ma lou tootoo e faamāfanafanaina ai aʻu.”—Salamo 23:1-4.

O le ā lo Latou Taunuuga?

O se tasi o tagata faimalaga i le malaga o lenei olaga, o le faisalamo, a lē o Asafo o se tasi o ona suli, na ia taʻutino mai na toetoe ā “papeva oʻu vae” mai le ala saʻo. O le ā le mea na tupu? Ua ia vaai i le taulau o tagata sauā ma lē faamaoni, ona ia matauʻa lea “i le manuia o ē ua amioleaga.” Sa ia vaai iā i latou, ua foliga mai ua latou “manuia i le olaga nei.” O le mea sili ona leaga, ua amata ona masalosalo le faisalamo i le aogā o le ala o le amiotonu lea n ia filifilia.—Salamo 73:2, 3, 6, 12, 13.

Ona ulu atu lea o le faisalamo i le malumalu o Ieova ma tatalo ai ma mafaufau loloto e faatatau i le iʻuga o ē amioleaga. Na ia faapea mai, ona “ou [fia] iloa ai lea o lo latou iʻuga.” Sa ia manatunatu loloto i le faamoemoe o i latou na ia matauʻa ai. O le ā lo latou taunuuga? Na ia iloa o na ituaiga o tagata sa “tuuina atu i latou i mea maseesee” ma o le a “faafuaseʻi ona faatafunaina o i latou; ua fano i latou.” Ae faapefea le ala lea na ui ai le faisalamo? Na ia faailoa mai: “A e mulimuli ane e te [Ieova] talia mai aʻu i le manuia.”—Salamo 73:17-19, 24.

I lona toe manatunatu i iʻuga o gaoioiga a i latou e vave ona manuia po o le lē saʻo o le auala e fai ai, ua ia mautinoa atili ai o loo saʻo le ala o loo ia uia. Mulimuli ane na ia faapea mai: “A o aʻu nei, ou te faalatalata atu i le Atua ou te lelei ai.” O le faalatalata atu iā Ieova le Atua o le a maua ai ni iʻuga lelei e faavavau.—Salamo 73:28.

“Ia Iloa le Mea o Loo e Agaʻi i Ai”

Tatou te ono faia ni filifiliga faapena i aso nei. E ono ofo atu iā te oe se konekarate faapisinisi telē, siitia lou totogi, po o se valaaulia  e avea oe ma paaga faipisinisi e taulau manuia. Ioe, e i ai lava lamatiaga i so o se mea fou. E matuā tāua lava la le iloilo muamua o le “iʻuga” o lau filifiliga. O ā ni tulaga e ono tulaʻi mai? Po o le a tele le taimi o le a e lē i ai i le fale, lea e ono tupu ai le lē fiafia i lau paaga po o oe foʻi? Po o le a e aafia i au paaga faipisinisi po o i latou i faletalimālō po o nisi nofoaga? E ala i le toe iloilo lelei o le ala a o leʻi uia, o le a mafai ai ona e faia ni faaiʻuga atamai. Ia utagia fautuaga a Solomona: “Ia iloa le ala o loo e agaʻi atu i ai.”—Faataoto 4:26, Contemporary English Version.

E talafeagai mo i tatou uma ona mafaufau i lenā fautuaga, aemaise lava talavou. Sa aumai e se tama talavou se ata vitiō e iai ni vaaiga e faaosofia ai faanaunauga e fai ai feusuaʻiga. Sa ia faapea mai ina ua uma ona ia matamata i lenā ata, sa matuā oso ona faalogona e fai feusuaʻiga, ma sa ia asiasi atu i se fafine talitane na ia iloa o loo nofo latalata ane. Na iʻu ina lē lelei ona faalogona, leaga lona lotofuatiaifo, ma popole i ni faamaʻi e ono aafia ai. O le mea tonu lava lenā o loo faamatala mai i le Tusi Paia: “Ua mulimuli loa o ia iā te ia, e pei o le povi ua alu a fasia.” Maʻimau e, pe ana seʻi mafaufau muamua i le “iʻuga” e oo i ai!—Faataoto 7:22, 23.

 Ia Talitonuina Faailoilo

O le toʻatele o tagata e ioe i le lē atamai o le lē amanaʻia o faailoilo. Peitaʻi, o le mea e faanoanoa ai, o le mea lenā a isi e fai pe a tuu atu faatonuga ae lē fetaui i o latou lava tulaga. Seʻi manatu i le mea na tupu i nisi o tagata Isaraelu i le vaitaimi o Ieremia. Sa tatau ona faia e lenā nuu se filifiliga, ma na fautuaina i latou e Ieova le Atua: “Fesili i ala o le vavau, po o i fea le ala lelei, ma ia outou savavali ai.” Ae sa faauamaaa pea i latou ma “lē savavali” ai i lenā ala. (Ieremia 6:16) O le ā le “iʻuga” o lo latou ala fouvale? I le 607 T.L.M., na faaumatia atoatoa ai e Papelonia le aai o Ierusalema ma ave faatagataotauaina i latou i Papelonia.

O le lē utagia o faailoilo ua faia e le Atua, o le a tatou lē maua ai se iʻuga lelei. O loo faapea mai le Tusi Paia: “Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”—Faataoto 3:5, 6.

O nisi o lapataʻiga a le Atua ua pei o ni faailoilo o loo faapea mai ‘⁠Aua e te ui i le ala.’ O se faaaʻoaʻoga, ua faapea mai le Tusi Paia: “Aua e te alu i le ala o ē agasala; aua foʻi e te ui i le ala o ē fai amio leaga.” (Faataoto 4:14) O se tasi o na ala leaga o loo faamatala i le Faataoto 5:3, 4: “E faasisina ifo meli ai laugutu o le fafine ese; o lona gutu foʻi e sili ona molemole i le suāuu; a e mulimuli ane ua oona ia, e pei o le laena; e maamaʻai o ia, e pei o le pelu ua faatau maai ona itu.” Mo nisi, o se mea fiafia le faia o se faiā lē mamā tau feusuaʻiga, e tusa lava pe faia ma so o se isi lava. O le lē utagia o faailoilo e ‘⁠Aua e te ui i le ala’ lea e faatulaga mai ai amio talafeagai, e na o puapuaga e oo i ai.

A o leʻi uia le laasaga muamua i lenā ala, fesili ifo iā te oe, ‘O fea ou te oo i ai i lenei ala?’ O le faaalu o sina taimi e mafaufau ai i “iʻuga” e ono oo i ai, atonu e lava lea e te ʻalofia ai le uia o se ala e maua ai i ni faafitauli matuiā. O mea nei e oo i se tagata e filifili e lē utagiaina nei faailoilo, o le faamaʻi oti (Aids) ma isi faamaʻi e feaveaʻi i feusuaʻiga, o le maʻitō e lē manaʻomia, o le faapaʻū tama, o le faaleagaina o faiā, ma se lotofuatiaifo lē lelei. Sa taʻua manino e le aposetolo o Paulo le iʻuga o i latou e faaauau pea ona faia feusuaʻiga lē mamā. “E lē fai mo latou tofi le malo o le Atua.”—1 Korinito 6:9, 10.

“O le Ala Lava Lenei”

O nisi taimi e faigatā ona tatou iloa po o fea o le a tatou oo i ai i lenā ala! Peitaʻi, e tatou te faafetaia le alofa ma le naunau mai o le Atua, e ala i le tuuina mai o faatonuga manino. Ua fetalai mai Ieova, “O le ala lava lenei, ia outou savavali ai.” (Isaia 30:21) O fea e taunuu i ai le ala lea ua faasino mai e Ieova? E ui ina vaiti ma faigatā le ala, a ua fetalai mai Iesu e tau atu i le ola e faavavau.—Mataio 7:14.

Seʻi mafaufau mo sina taimi i le ala o loo e malaga ai. Po o le ala saʻo lea? O fea e tau i ai? Ia saʻili atu i le taʻitaʻiga a Ieova e ala i le tatalo. Ia saʻili atu i le ‘faafanua,’ po o le Tusi Paia. Atonu e te lagona le manaʻomia ona faafesootaʻi se tagata malaga e iai le poto masani, o se tasi o loo taumafai pea e savali i ala o le Atua. Afai ua e iloa e manaʻomia se suiga, ia vave ona fai.

E masani ona faalaeiauina se tagata faimalaga pe a ia vaaia se faailoilo e faamautinoa atu iā te ia o loo saʻo le auala o loo ia uia. Pe afai o loo faaalia mai lau lava iloiloga o oe o loo e ui i le ala o le amiotonu, e faalaeiauina oe e faaauau ai pea. O le vaega pito sili ona tauia o lenei faigāmalaga, ua toe lava o se aga taunuu i ai.—2 Peteru 3:13.

So o se auala lava e iai le mea e taunuu i ai. Pe a e oo i le iʻuga o le ala na e filifilia, o fea o le a e taunuu i ai? E leai se aogā o le tau ina tū i inā ma moomoo faapea,ʻE, ana iloa lava ou te ui i le isi ala!’ O lea la, a o e leʻi uia le isi laasaga o le ala i le ola, fesili ifo iā te oe lava, ‘O le ā le “iʻuga” e oo i ai?’

[Pusa/Ata i le itulau 10]

O le ā lo “Latou Iʻuga”?

E masani ona oo i talavou faaosoosoga ma tauanau e isi ina ia faataʻitaʻi mea o loo faia e le tele o tagata. O nisi nei o mea e ono tulaʻi mai.

▪ Faaosooso oe e se isi e ula se sikareti.

▪ Uunaʻia oe e se faiaʻoga e naunau mo lou lelei, ina ia faaauau au aʻoaʻoga i le iunivesite.

▪ Valaaulia oe i se patī e tele ai le ava malosi ma atonu foʻi e maua ai ma fualaau faasāina.

▪ E ono faapea atu se tasi, “Aiseā e lē tuu ai sou ata ma faamatalaga e uiga iā te oe i luga i le initaneti?”

▪ Valaaulia oe e sau uō e matamata i se ata e iai faiga sauā ma faiga lē mamā tau feusuaʻiga.

Pe afai e te fesagaʻia se tasi o na tulaga, o le ā lau mea o le a fai? Po o le a e lolo atu, po o le a e iloilo ma le totoʻa lo “latou iʻuga” e ono oo i ai? E atamai pe a e fesili ifo faapea iā te oe lava: “E ave ea e se tasi le afi i lona fatafata, a e lē mū ai ona ofu? Afai e savali se tagata i luga o malala ola, e lē mū ai ea ona vae?”—Faataoto 6:27, 28.