O se Tusi Mai Nicaragua

“Pe a E Oo i le Vaitafe o Coco, Afe i le Itu Taumatau”

“E TE manaʻomia se taavale foauili ona o le gaoā ma le omoomo o le auala, o se siligi, ma ni fagu penisini faaleoleo. Ia e sauni auā e matuā mafiafia le palapala o le auala. Pe a e oo i le vaitafe o Coco, afe i le itu taumatau.”

O le mea moni lava, e leʻi aogā nei upu mai se uō misionare e aumaia ai iā te aʻu se lagona mautinoa. E ui i lea, i se tasi taeao i le Aso Lua, na amata ai loa laʻu malaga ina ia auai i se fonotaga faa-Kerisiano i Wamblán, o se tamaʻi taulaga i Nicaragua.

Na ou usu i le vaveao i laʻu taavale, e ui ina tuai ae malosi, ma ui atu i le auala laulelei e taʻu o le Pan-American Highway. Ina ua ou taunuu i le aai o Jinotega, sa ou oso atu i le auala lea e leʻi faatāina e faaigoa e tagata o lea vaipanoa, o feo, o lona uiga, e lauleaga. A o leʻi tuua le taulaga, na ou mātauina ni faleoloa se lua, o le isi e taʻu o Le Vavega a le Atua, ae o le isi e taʻu, O Le Toetū.

E fepiʻopiʻoaʻi le auala, ma e aʻega. Na tolotolo lemū laʻu taavale a o ui atu i omoomo o le auala. Na ou pāsia se vaituloto umi e i le vanu i luga o le mauga ua ufitia e ao. E ui ina puaoa, ae sa ou vaaia laau e sosolo ai oketi ma laau sosolo.

I se tasi o piʻoga mimilo tū, na toeitiiti lava a fetoʻai laʻu taavale ma se pasi o loo sau i le moa o le auala. Na pupusa mai le asu uliuli i le mafa o le pasi, ma fitifiti mai maa i lalo o ona paʻu. I inei i Nicaragua, e iloa lelei atu lava i luma o le tioata o le pasi igoa o avetaavale soonafai, e pei o le: Toa, Akarava, Asipi, po o le Tulimanu.

I le tutonu o le la, sa ou uia ai fanua laugatasi o Pantasma. Ma na ou pāsia ai se fale e fai i laupapa e tū i se lotoā palapalā, ae ua uma ona salu faamamā. E pei ua ta vaai i se ata o loo i se tusi ua leva: O se tamāloa matua o loo saofaʻi i luga o se nofoa umi, o se maile o loo moe i lalo o se laau, ma povi e lua o loo tutū ua nonoa faatasi i se amo, ae lave i se taavale toso e uili laupapa. I se tasi tamaʻi taulaga, na ou vaaia ai se vaega toʻatele o tamaiti ua tuua mai le aʻoga. A o latou savavali mai ma o latou togiga lanu moana, ua lilo le alatele iā i latou, e tai pei o se galu o loo fafati i luga o se matafaga.

Ua matua mūtinitini le aasa o le lā a o oʻu latalata atu i Wiwilí, ma o le taimi muamua lava lea na ou vaai ai i le vaitafe o Coco. O lea vaitafe malosi o se vaega mataʻina lea o le taulaga, ma o loo tatafe malosi ona vai. Na ou manatua faatonuga, ma afe loa i le itū taumatau ma ui atu i le auala e 23 maila agaʻi i Wamblán, o se auala e sili ona leaga.

I le ui atu i auala gaoā ma le matuā palapala, e tusa e valu pe iva ālia na ou sopoʻia i laʻu taavale. A o oʻu taumafai e ʻalo ese mai palapala malō ma ʻautu, na alu aʻe le pefu e pei o se afā. Ioe, “na ou ʻai pefu ai,” e pei o lea faaupuga a le atunuu. O lea, ina ua taunuu laʻu malaga, ona ou iloa atu lea o  Wamblán o loo tuu mai i le vanu, i le vaega e pāolo ona o le tele o laau o iai.

I le aso na sosoo ai, e foliga mai na feala uma tagata i le afa o le fa. Ae na muamua ou ala ona o le vivini faalausosoo o toa, ma na ou tū i luga ma agaʻi atu i le alatele. Na sasala mai le manogi o panikeke mafolafola o loo tao i ogaumu maa.

Na vaaia i vaega eseese i aupā ni ata felanulanuaʻi o vaaiga o se parataiso na valiina e se tagata tusi ata o lenā vaipanoa. Na iai i pulperías, po o faleoloa i autafa o le auala, ia faailoilo o loo faasalalau ai faguinu eseese o le cola. O loo pipii ai ma tusitusiga o ni folafolaga na faia e faigāmalo e tolu ua tuanaʻi atu. O fale lē taʻua e tutū i fafo, e fai i apa ae fola simā.

Na muamua ou faafeiloaʻi atu i tagata e ala i le faatalofa atu, i le upu i le gagana Nicaragua o le Adiós. Na māfana le auala na talanoa mai ai tagata ma laufofoga fiafia. Sa matou talanoa leotetele ona o le paʻō o vae o solofanua ma asini o loo feoaʻi i le auala.

E oo ane i le afiafi o le aso Faraile, ua taunuu aiga mo le fonotaga e lua aso. Na latou savavali mai, ma ō mai i solofanua, ia pe malaga mai foʻi i loli. O nisi tamaiti ma teineiti na savavali mai mo le ono itula i seevae tosotoso uga. E ui lava na tatao ai maina i auala sopo o le vaitafe, ae na latou ui mai ai lava, ma na latou onosai e ui mai vailepa e iai anufe miti toto. Sa iai nisi mai nuu mamao na ō mai ma ni nai meaʻai—o le araisa e faamanogi i le gaʻo puaa. O le ā le māfuaaga o lo latou malaga mamao mai?

Ua latou ō mai ina ia faamalosia lo latou faamoemoe i se lumanaʻi e sili ona lelei. Ua latou ō mai ina ia faalogologo a o faamatala atu le Tusi Paia iā i latou. Ua latou ō mai ina ia faafiafia le Atua.

Ua oo nei i le Aso Toonai. E silia i le 300 le aofia na iai i se fale ato apa na saofafaʻi i nofoa uumi e fai i laupapa, ma nofoa uga. Sa faasusu e tinā a latou pepe. Ma na lagona atu le ʻuaʻua mai o puaa ma le vivini mai o moa, i le faatoʻaga na sosoo ane.

Na faateteleina le vevela o le aso, ma na toetoe lava a lē mafai ona tatalia le vevela. Ae peitaʻi, na faalogologo ma le lē gasē le aofia i fautuaga ma taʻiala na aumai i lauga. Sa suʻe a latou Tusi Paia i mau sa faitau mai e failauga, na latou pepese i pese e faavae mai i aʻoaʻoga a le Tusi Paia, ma na latou faalogologo ma le faaaloalo a o faia tatalo.

Ina ua māeʻa polokalame, sa matou taaalo ma le isi vaega i tuliga a tamaiti. Ona matou autaluina lea o a latou faamaumauga o le polokalame na fai. Sa ou faaali atu iā i latou ata o fetu ma aniva mai laʻu komepiuta. Na ʻataʻata tamaiti, ma sa fiafia o latou mātua.

Sa vave lava ona oo mai le iʻuga o le fonotaga, ma toe taliu tagata uma i o latou aiga. Na ou toe foʻi i le taeao na sosoo ai, ae na faatumulia loʻu mafaufau i mea mananaia na tutupu, ma sa tumu loʻu loto i le alofa i aʻu uō fou na maua. Ua ou filifili e faaaʻoaʻo iā i latou ma ia iloa le auala e maua ai le lotomalie, ma le auala e faamoemoe atu ai i le Atua.

[Ata i le itulau 17]

Na faimalaga mai aiga i le tele o maila ina ia auai i le fonotaga i Wamblán