Ia Mafuta Atu i le Atua

“Ia Faaaʻoaʻo i le Atua”

Efeso 4:32–5:2

AGALELEI. Alofa Mutimutivale. Fefaamagaloaʻi. Alofa. E faanoanoa lava, ona ua seāseā ona vaaia o faaalia e tagata i aso nei na uiga lelei. Ae faapefea oe? Po o e manatu i nisi taimi e lē o taulau au taumafaiga ina ia atiaʻe nei uiga lelei? Ona o le faitioina e se tasi o ia lava, e ono maumauaʻi ai se tasi e faapea ona o ni toʻatugā e pei o uiga leaga ua mauaa iā te ia po o ni tulaga tigā na ia fesagaʻia i taimi ua mavae, ua faigatā ai mo ia ona atiaʻe uiga lelei. Peitaʻi, ua aʻoaʻo mai e le Tusi Paia le faamautinoaga moni lenei—e silafia e Lē na faia i tatou, e mafai ona tatou atiina aʻe uiga lelei.

Ua apoapoaʻi mai le Afioga a le Atua i Kerisiano moni e faapea: “O lea, ia faaaʻoaʻo i le Atua e faapei o lana fanau pele.” (Efeso 5:1) O na upu o se faailoaga mataʻina lea o le maufaatuatuaina e le Atua o ona tagata tapuaʻi. E faapefea? Na faia e Ieova le Atua le tagata i Lona faatusa, ia foliga iā te Ia. (Kenese 1:26, 27) O lona uiga na foafoaina e le Atua tagata faatasi ma ni uiga e pei o ona uiga. * O lea la, pe a uunaʻia e le Tusi Paia Kerisiano ina ia “faaaʻoaʻo i le Atua,” e tai pei lava ua faapea mai Ieova iā i latou: ‘Ou te talitonuina outou. Ou te iloa e ui lava i Io outou tulaga lē lelei atoatoa, ae o loo iā te outou le tomai e pei ai o aʻu, i le tele e mafai ai.’

O ā nisi o uiga o le Atua e mafai ona tatou faaaʻoaʻo i ai? Ua tali mai fuaiupu o loo siʻomia ai. Seʻi mātau foʻi, na amata e Paulo le fautuaga ia faaaʻoaʻo i le Atua i le upu “o lea.” O le faaupuga lenei e fesootaʻi ma le fuaiupu muamua atu, lea o loo taʻua ai le agalelei, alofa māfana, ma le fefaamagaloaʻi. (Efeso 4:32; 5:1) Ona oo mai lea i le fuaiupu o loo mulimuli mai i le fautuaga ia faaaʻoaʻo i le Atua, ua taʻu mai ai e Paulo i Kerisiano ia tuliloa se olaga e mātauina i le alofa lē manatu faapito. (Efeso 5:2) Ioe, pe a oo mai i le faaalia o le agalelei, le alofa māfana, saʻoloto ona faamagalo atu i isi, ma le faaalia o le alofa, o le faaaʻoaʻoga sili e ao ona tatou faaaʻoaʻo i ai—o Ieova le Atua.

Aiseā e tatau ai ona tatou mananaʻo ia pei o le Atua? Seʻi mātau le uunaʻiga malosi o loo maua i upu a Paulo e faapea: “Ia faaaʻoaʻo i le Atua e faapei o lana fanau pele.” Pe e lē o se manatu e faalaeiau ai lenā manatu? E silasila Ieova i ona tagata tapuaʻi e pei o se fanau e na te alofa faapelepele i ai. I le pei o se tamaitiiti laʻitiiti atonu e taumafai ia pei o lona tamā, o loo faapena foʻi ona fai e Kerisiano le mea aupito sili latou te mafaia, ina ia pei ai o lo latou Tamā i le lagi.

E lē o faamalosia e Ieova tagata ina ia faaaʻoaʻo atu iā te ia. Nai lo lea, ua ia tuu mai iā i tatou le filifiliga saʻoloto. O lea la, o le avea o oe ma sē faaaʻoaʻo i le Atua pe leai, o lau lava filifiliga lenā. (Teuteronome 30:19, 20) Peitaʻi, ia aua neʻi galo, e mafai ona tatou faaalia uiga e pei o uiga o le Atua. O le mea moni, ina ia faaaʻoaʻo i le Atua, e tatau ona muamua aʻoaʻoina oe e faatatau i ona uiga ma ona ala. E mafai ona fesoasoani iā te oe le Tusi Paia, ina ia aʻoaʻoina ai e faatatau i uiga ma ala o le Atua, o lē ua ia tosina maia le faitau miliona o tagata i ona uiga lē mafaatusalia, ina ia avea ma ē faaaʻoaʻo iā te ia.

[Faaopoopoga i lalo]