Loimata i se Fagu Paʻu

NA FESOLASOLATAʻI se tamāloa. Ua lutia o ia i le mafatia, ma ua tagi o ia ma ʻaiʻoi atu i lona Atua o Ieova, ia alofa mai ma agalelei mai iā te ia ma talosaga atu: “Ia e utu oʻu loimata i lau fagu.” (Salamo 56:8) O lenā tamāloa, o Tavita, lea na avea mulimuli ane ma tupu o Isaraelu. O le ā le fagu lea o loo faatatau i ai lana tala, ma e faapefea ona utu e le Atua loimata o se tagata i se fagu?

E masani Tavita ma fagu e fai i paʻu o manu. Sa faaaogā e teu ai vai, suāuu, uaina, ma pata. O loo faaaogā pea e tagata maumausolo i le toafa o Sahara, e iai tagata Tuareg, fagu e fai mai i paʻu atoa o oti po o mamoe. O nei fagu tetelē, e tele se suāvai e mafai ona ofi ai, ma e fua i le telē o le manu lea na gaosia mai ai. Ua iloa lelei e tagata e faaaogāina nei fagu paʻu, e tusa lava pe aasa le lā i le toafa, ae e mālū pea le suāvai e teu ai. I aso la, sa faaaogā asini ma kamela e feaveaʻi ai nei fagu. Ae i aso nei, ua feaveaʻi i taavale e pei o sipi, e faapipii i luma o le taavale!

E iai foʻi le uiga mo i tatou o upu faamomoiloto a Tavita e faatatau i le fagu paʻu. I le ā le itu? Ona o loo taʻu mai i le Tusi Paia, ua pulea le lalolagi e Satani, ma ua “lotoa tele” o ia i nei aso. O le māfuaaga lea o le tele o mafatiaga. (Faaaliga 12:12) O lea la, ua tele foʻi tagata ua pei o Tavita, o loo fesagaʻi ma mafatiaga i faalogona, i le mafaufau, po o le tino, aemaise lava i latou o loo taumafai e faafiafia le Atua. Po o faapena oe? E taumafai pea nei tagata faatuatua ia latou ola i se olaga faamaoni, ma e faia ma le lototele, e oo foʻi ina “tagi” ona o faigatā. (Salamo 126:6) E mafai ona latou mautinoa o loo silasila lo latou Tamā i le lagi i o latou puapuaga, faapea foʻi ma o latou mafatiaga ona o nei tigā. E malamalama lelei o ia i tigā o ana auauna, ma e na te manatua ma le alofa o latou loimata ma puapuaga, e peiseaʻī o loo ia utuina nei mea i lana fagu.