O Ai e Mafai Ona Iloa le Lumanaʻi?

“O aʻu o le Atua . . . , [o Lē] o loo faaali talu mai le amataga o mea e mulimuli; mai anamua foʻi o mea ua lē faia.”—Isaia 46:9, 10.

I NEI taimi fesouaʻiina, ua taumafai tagata e suʻesuʻeina le faapolotiki, tulaga tautupe, ma tū masani i nei aso, ina ia valoia le lumanaʻi. O nisi tagata ua naunau tele e fia iloa lo latou lumanaʻi, ua latou saʻili atu ai i tagata e suʻesuʻe i fetu po o faiga faataulāitu mo ni tali. E masani lava ona lē fiafia nei tagata i tali latou te maua. Pe e lē mafai moni ona iloa le mea o le a tupu i lenei lalolagi, i o tatou aiga, ma i tatou taʻitoʻatasi? Ae pe mafai moni lava ona iloa e se tasi le mea o le a tupu i le lumanaʻi?

I lana fetalaiga i le perofeta o Isaia e pei ona tusia i luga, ua faailoa mai ai e le Atua e Ona le Malosi Uma, o Ieova, lona agavaa e valoiaina le lumanaʻi. E ala mai iā Isaia, ua valoia mai ai e le Atua le faasaʻolotoina o tagata Isaraelu anamua mai le faaaunuua i Papelonia, ae toe foʻi atu e toe fausia Ierusalema ma lona malumalu. O le ā le saʻo o lenei valoaga? Pe ā ma le 200 tausaga muamua atu, na taʻua ai ma le saʻo e Isaia faapea, o le a faatoʻilaloina e Kuresa ia Papelonia i le lumanaʻi. E lē gata i lea, sa faamatala ma le saʻo e Isaia metotia a Kuresa, o le a suia le mea e tafe i ai le Vaitafe o Eufirate, lea na malupuipuia ai le aai. Sa ia valoia foʻi o le a maua atu e Kuresa o loo matala faitotoʻa tetele e lua ma e lē o iai nisi e leoleoina, ma o lea na faigofie ai ona manumalo Kuresa.—Isaia 44:24–45:7.

Pe a faatusatusa atu i le Atua, e leai se malosiaga o i le tagata e iloa ai le lumanaʻi. Na tusi le tupu poto o Solomona, “Aua e te mitamita i le aso taeao; auā e te lē iloa se mea e tupu a taeao.” (Faataoto 27:1) O loo moni pea lenā faamatalaga i aso nei. E leai se tagata e mafai ona ia iloaina lona lumanaʻi. Aiseā e ese mai ai le Atua? E malamalama atoatoa o ia i mea na ia faia, e aofia ai le natura o mea ma faanaunauga o tagata. Pe a ia finagalo i ai, e mafai e le Atua ona silafia gaoioiga uma a tagata ma atunuu uma. E faaopoopo atu i ai, e lē gata lona tomai e faatonutonu ma pulea ai mea e tutupu. Pe a ia valoia se mea o le a tupu e ala i ana perofeta, o le a avea o ia ma lē “faamauina le upu a lana auauna, na te faataunuuina foʻi le pule a ana sāvali.” (Isaia 44:26) E na o Ieova e mafai ona tautala ma le moni i lenā faamatalaga.

Sa ola Isaia e sili atu i le 700 tausaga a o leʻi soifua mai Iesu, le Mesia. E ui i lea, sa valoia e Isaia le afio mai o le Mesia. Peitaʻi, talu mai le senituri lona 18 ma faasolosolo mai ai, ua faitioina malosi ai e le ʻaufaitio o le Tusi Paia le moni o le tusi o Isaia. Ua latou faapea mai o valoaga a Isaia, sa valoia ina ua māeʻa ona tupu, ma sa tusia e se tusitala mea ua uma ona tutupu. Pe moni na faamatalaga? I le 1947, na maua ai se kopi o le tusi o Isaia faatasi ai ma isi tusi taai tuai, i se ana e latalata i le Sami Mate. Sa faapea mai le ʻaufaitofā o le Tusi Paia, sa faia lenā kopi i le silia ma le selau tausaga a o  leʻi fanau le Mesia folafolaina, po o le Keriso. O lea la, sa faailoa mai e le Tusi Paia le lumanaʻi!

Atonu e lē mafai e Isaia ma isi tusitala o le Tusi Paia ona valoia mea o le a tutupu i le lumanaʻi, e tusa ai ma lo latou lava atamai. Nai lo lea, “na tautatala tagata i mea na faailoa mai e le Atua e ala i le taʻitaʻiga a le agaga paia.” (2 Peteru 1:21) I mataupu o loo sosoo mai, o le a tatou uaʻi atu ai i faamatalaga o le soifuaga o Iesu lea na valoia e ala mai iā Isaia. Ona tatou iloiloina ai lea o mea na valoia mai e Iesu ma ona soo o le a tutupu i o tatou aso ma le lumanaʻi.