Ia Aʻoaʻo Lau Fanau

Pe na Iai se Taimi na E Matauʻa Ai? Sa Faapena Uso o Iosefa

SEʻI o tatou talanoa po o le ā le uiga o le upu matauʻa. Po o faafaigatā iā te oe ona e fiafia i se tagata ona e fai mai isi e lelei o ia, e aulelei, pe atamai foʻi? *—O le mea tonu lava lenā e tupu pe afai e te matauʻa i se tasi.

E mafai ona tupu aʻe le matauʻa i totonu o se aiga, pe afai e alofa faaʻauʻau mātua i le isi tamaitiiti nai lo le isi tamaitiiti. O loo taʻua i le Tusi Paia se tala i se aiga na avea le matauʻa ma faapogai o se faafitauli telē. Seʻi o tatou iloiloina le faafitauli na māfua ai, ma le lesona tatou te aʻoaʻoina mai le mea na tupu.

O Iosefa o le atalii lona 11 o Iakopo, ma sa matauʻa ona ʻafa uso iā te ia. Pe e te iloa le māfuaaga?—Talu ai ona sa sili le alofa o lo latou tamā o Iakopo iā Iosefa. O se faataʻitaʻiga, na fai e Iakopo se ofu talaloa matagofie mo Iosefa. Sa sili ona alofa Iakopo iā Iosefa “auā na fanau o ia ina o toeaina o ia,” ma o lana ulumatua lea i lana avā pele o Rasela.

Ua taʻua i le Tusi Paia e faapea, ‘ina ua iloa e uso o Iosefa ua sili le alofa o lo latou tamā iā te ia, sa latou ʻinoʻino iā Iosefa.’ Ona oo lea i se tasi aso, ua taʻu atu e Iosefa i lona aiga e faapea, na fai sana miti e faapea ua latou ifo uma atu iā te ia, e aofia ai ma lona tamā. Ua taʻua i le Tusi Paia e faapea, “Ua matatauʻa ona uso iā te ia,” ma e oo lava foʻi i le tamā o Iosefa sa ia otegiaina o ia ona o lona taʻuina atu o lenā miti.—Kenese 37:1-11.

I se taimi mulimuli ane, ina ua 17 tausaga o Iosefa, sa iai ona uso i se mea mamao o loo leoleo ai mamoe ma ʻoti a lo latou tamā. Ona auina atu lea e Iakopo o Iosefa e vaai po o ā mai ona uso. Pe e te iloa le mea na mananaʻo le toʻatele o i latou e fai, ina ua latou vāai mai ua alu atu o ia?—Sa latou mananaʻo e fasiotia o ia!  Peitaʻi, e leʻi mananaʻo le isi toʻalua o i latou, o Reupena ma Iuta, e fasiotia o ia.

Ina ua ui ane ni tagata faatauʻoa i o latou autafa e ō atu i Aikupito, ona faapea atu lea o Iuta: “Inā tatou faatauina ia.” Ona latou faia lea faapea. Ona latou fasi lea o se ʻoti ma fufui ai le ofu talaloa o Iosefa i le toto o le ʻoti. Mulimuli ane, ina ua latou faaali atu le ofu talaloa i lo latou tamā, sa ia alaga e faapea: ‘Ua ʻaina Iosefa e se manu feʻai!’—Kenese 37:12-36.

A o faagasolo taimi, sa fiafia Farao, le taʻitaʻi o Aikupito, iā Iosefa. Na māfua lenei tulaga, ona o le fesoasoani a le Atua na mafai ai ona ia faamatalaina uiga o miti e lua a Farao. O le miti muamua e faatatau i povi tino lelei ma pepeti e fitu, ae mulimuli mai ai povi tino leaga ma le paeee e fitu. O le miti lona lua o ʻau saito tino lelei ma puputa e fitu, ae muliaʻi mai ai ʻau saito e fitu e tino leaga ma mamae. Na faapea atu Iosefa, o miti uma nei e lua e faauiga atu faapea, e fitu tausaga o le a matuā tele ai le mau i le nuu pe tele ai taumafa, ae o le isi fitu tausaga mulimuli ane ai o le a iai le oge i le nuu. E ala i le faatonuga a Farao, na tofia ai Iosefa e na te vaavaaia le faaputuina o meataumafa i tausaga o loo tele ai meataumafa, ina ia nofosauni ai mo le taimi o le oge.

Ina ua oo mai le oge, sa manaʻomia e le aiga o Iosefa lea e mamao le mea e nonofo ai, ia ni meaʻai. Na auina atu e Iakopo uso matutua e toʻasefulu o Iosefa, e ō i Aikupito e suʻe mai ni meaʻai. Sa latou ō atu iā Iosefa, ae latou te leʻi iloaina o ia. E aunoa ma le taʻuina atu po o ai o ia, sa tofotofoina e Iosefa ona uso, ma na ia iloaina ai lo latou matuā faanoanoa ona o le mea sa latou faia iā te ia. Ona taʻu atu lea e Iosefa o ia iā i latou. Sa latou feopoopoaʻi le tasi i le isi ma olioli!—Kenese, mataupu e 40 e oo i le 45.

O le ā e te aʻoaʻoina mai i lenei tala o le Tusi Paia, e faatatau i le matauʻa?—O le matauʻa e mafai ona iʻu ai i ni faafitauli tetelē, ma oo ai ina faapogaia se tagata e manaʻo e faatigā i lona lava uso! Seʻi o tatou faitau le Galuega 5:17, 18 ma le Galuega 7:54-59, ma vaai po o le ā na fai e tagata i soo o Iesu, ona o le matauʻa.—Pe a uma ona faitauina nei mau, pe mafai ona e mātauina le māfuaaga e tatau ai ona tatou faaeteete i le avea ma sē e matauʻa?—

Na ola Iosefa mo le 110 tausaga. Sa iai sana fanau, o fanau a lana fanau, ma ni fanau a fanau a lana fanau. E mafai ona tatou mautinoa, sa masani ona aʻoaʻo e Iosefa i latou ia alofa le tasi i le isi, ma ia aua neʻi matauʻa.—Kenese 50:22, 23, 26.

[Faaopoopoga i lalo]

Fesili:

• O le ā le uiga o le upu matauʻa?

• O le matauʻa na faapogaia ai uso o Iosefa e faia le ā?

• Aiseā na faamagalo ai e Iosefa ona uso?

• O le ā tatou te aʻoaʻoina mai lenei tala?