Valoiaina lo Tatou Lumanaʻi Lata Mai

INA UA talanoaina le lumanaʻi o tagata ma le lalolagi, na tusi le aposetolo o Peteru e faapea: “E tatou te faatalitali i le lagi fou ma le lalolagi fou, e tusa ma lana [Atua] folafolaga, e mau ai le amiotonu.” (2 Peteru 3:13) Sa uluaʻi folafola mai e ala mai i le perofeta o Isaia se “lagi fou ma le lalolagi fou.” (Isaia 65:17; 66:22) I le siiina mai o lenā valoaga, sa faaalia mai ai e Peteru e leʻi faataunuuina atoatoa i lona vaitaimi.

 Mulimuli ane pe tusa o le 96 T.A., o le Faaaliga lea na tuuina atu e ala i le aposetolo o Ioane na fesootaʻi atu i le “lalolagi fou,” ma faamanuiaga i lalo o le Malo o le Atua. (Faaaliga 21:1-4) O fetalaiga a Iesu faatasi ai ma upu a Paulo e faatatau i le tulaga o le lalolagi, a o leʻi oo mai le Malo o le Atua, ua faataunuuina nei. O lea la, ua mafai nei ona tatou faatalitalia ua toeitiiti aumaia e lenei Malo se lalolagi fou. O le a faapeʻī lenā lalolagi fou? O loo taʻu mai e le tusi o Isaia iā i tatou.

Faamanuiaga i le Lalolagi Fou

Filemu i le Lalolagi Aoao ma le Tapuaʻiga Autasi. “Ona latou tuʻi ai lea i a latou pelu e fai ma uʻamea o suōtosina, o latou tao foʻi e fai ma polo e teu aʻi vine; e lē sii atu le pelu e le tasi nuu i le tasi nuu, latou te lē toe aʻoaʻo foʻi i taua.”—Isaia 2:2-4.

Filemu i le Va o Tagata ma Meaola. “E nofo faatasi le luko ma le tamaʻi mamoe, e taoto foʻi le nameri faatasi ma le tamaʻi ʻoti; e faatasi foʻi le tamaʻi povi ma le leona taanoa atoa ma le manu peti, e taʻitaʻiina foʻi i latou e le tama itiiti. E aai faatasi le povi fafine ma le urosa, e taooto faatasi a laʻua tama; e ʻai foʻi e le leona ʻau o saito pei o le povi. . . . Latou te lē faia se mea leaga, latou te lē faaumatia foʻi se mea i loʻu mauga paia uma; auā e tumu le lalolagi i le malamalama o Ieova, e pei ona ufitia o le iliti tai i le suāsami.”—Isaia 11:6-9.

Fau ma Soloi Mea Taumafa mo Tagata Uma. “E faia e Ieova o ʻau i lenei mauga mo nuu uma le faigaʻai o mea lelei, o le tausamiga o uaina ua tuu ai ʻalu; o mea e silisili ona lelei, o uaina ua faamaninoina sa tuu ai ʻalu.”—Isaia 25:6.

Lē Toe i ai le Oti. “E faaumatia e ia [le Atua] le oti e faavavau; e soloiesea foʻi e le Alii o Ieova o loimata i mata uma lava; e faateʻaeseina foʻi e ia le gao o lona nuu i le lalolagi uma lava; auā ua fetalai mai ai Ieova.”—Isaia 25:8.

Toetutū i Latou na Maliliu. “E toe ola mai ou tagata oti, o latou tino oti e toe tutū mai. Inā ala mai ia, ma alalaga fiafia outou . . . e lafo atu foʻi e le eleele ē ua oti.”—Isaia 26:19.

O le Mesia o se Faamasino Amiotonu. “E lē faamasino o ia e tusa ma le sisila atu o ona fofoga; e lē aʻoaʻi foʻi o ia e tusa ma le faafofoga o ona taliga. A e faamasino o ia ma le tonu i ē matitiva, e aʻoaʻi foʻi o ia ma le tonu, ona o ē faamaulalo o i le lalolagi.”—Isaia 11:3, 4.

 Faamālōlōina Ē Tauaso ma Tutuli. ‘E faapupulaina mata o ē tauaso, e faalogoa foʻi taliga o ē tutuli.’—Isaia 35:5.

Toe Fua Mai le Nuu Valevalenoa. “E olioli ona o i latou le vao lafulafuā, ma le nuu naumati; e fiafia le toafa, ma fua mai e pei o le aute. E fua tele mai lava ia, e fiafia foʻi ma le fiafia tele, ma le alaga.”—Isaia 35:1, 2.

Se Lalolagi Fou. “Ou te faia le lagi fou [o se faigāmalo faalelagi fou] ma le lalolagi fou [o se sosaiete fou o tagata amiotonu]; e lē toe manatua mea na muamua, e lē alu aʻe foʻi i le loto. A e peitaʻi ia outou olioli ma fiafia e faavavau i le mea ou te faia. . . . Latou [sui o le lalolagi fou a le Atua ua folafolaina mai] te faia fale, ma latou mau ai; latou te totō tovine, ma latou aai i o latou fua. Latou te lē fai fale ina ia mau ai nisi; latou te lē totō ina ia ʻai ai nisi; auā e pei o aso o le laau aso o loʻu nuu; e uma lava i ē ua filifilia e aʻu o mea na faia e o latou lima. Latou te lē galulue fua, latou te fananau, a e lē tupu ai le atuatuvale; auā o le fanau ua faamanuia e Ieova i latou, atoa ma i latou e tutupu mai iā te i latou. A o leʻi valaau lava i latou, ou te tali atu; a o tautala mai i latou, ou te faalogo atu lava.” “E pei ona tumau i oʻu luma o le lagi fou ma le lalolagi fou ou te faia, ua fetalai mai ai Ieova, e faapea ona tumau o a outou fanau ma lo outou igoa.”—Isaia 65:17-25; 66:22.

Valoia se Lumanaʻi Matagofie

E lē na o le tusi o Isaia i le Tusi Paia o loo valoia mai ai faamanuiaga mo le lumanaʻi. E faatumulia le Tusi Paia i valoaga ia e faamatala ai mea mataʻina a le Atua lea o le a faataunuuina e ala mai i lona Malo i lalo o le pulega a Keriso. * Pe e te fia nofo i se parataiso faapena? E mafai ona e nofo ai! Ia e suʻesuʻe po o le ā moni lava o loo aʻoaʻoina i le Tusi Paia e faatatau i fuafuaga a le Atua mo le lumanaʻi, ma aʻoaʻo pe faapefea ona avea oe ma lenā vaega. E fiafia Molimau a Ieova e fesoasoani atu iā te oe.

[Faaopoopoga i lalo]

[Ata i le itulau 8]

O le a nonofo filemu tagata ma le isi tagata, ma tagata ma meaola

[Ata i le itulau 9]

O le a toetutū mai ē ua maliliu

[Ata i le itulau 10]

O le a avea le lalolagi aoao ma parataiso