O Lē e Fiafia i le Amiotonu
Ia Mafuta Atu i le Atua
O Lē e Fiafia i le Amiotonu
PE NA iai se taimi na e aafia ai i se faiga lē tonu ma sauā, lea atonu na sao mai ai le tagata na ia faia ma faaalia le lē salamō? E iai ni mea e faigatā ona onosaia, ae e sili atu ai ona faigatā faiga lē tonu e fai mai, aemaise lava pe afai na faia e se tagata sa e manatu e tatau ona alofa faapelepele iā te oe. Atonu e te taumānatu, ‘Aiseā ua faataga ai e le Atua nei mea e tutupu?’ * O le mea moni lava ia, e ʻinoʻino Ieova le Atua i faiga lē tonu uma. O loo faamautinoa mai e lana Afioga, le Tusi Paia, o le a faasalaina e le Atua i latou uma o loo mumusu e fai le mea tonu. Seʻi o tatou mātauina upu a le aposetolo o Paulo o loo faamauina i le Eperu 10:26-31.
Na tusi Paulo e faapea: “Afai ua tatou iloa lelei le upu moni ae ua tatou faia pea le agasala ma le loto i ai, e lē toe iai se taulaga mo a tatou agasala.” (Fuaiupu e 26) O tagata e faia pea le agasala ma le loto i ai, o i latou na e sili ona taʻusalaina. Aiseā? Muamua, e latou te leʻi faia se agasala ona o se vaivaiga—le ituaiga o masei lea e masani ona faia e i tatou uma ona o le tulaga lē lelei atoatoa. Ua faaauau pea ona latou faia le agasala. Lona lua, ua latou faia ma le loto i ai po ua fuafua lelei e faia le agasala. Ua tumau i o latou loto le faia o mea leaga ona ua leva ona fai, ma ua masani ai. Lona tolu, e leʻi faapea ua latou agasala ona o lo latou lē iloa. Ua latou “iloa lelei le upu moni” e faatatau i le finagalo o le Atua, ma ona ala.
O le ā le silafaga a le Atua iā i latou e faia agasala matuiā ae lē salamō? Na taʻua e Paulo, “E lē toe iai se taulaga mo a [latou] agasala.” O le taulaga togiola a Keriso, le meaalofa a le Atua mo tagata, ua ufiufi ai agasala o loo tatou faia ona o le tino lē lelei atoatoa. (1 Ioane 2:1, 2) Peitaʻi, o i latou e faia le agasala e aunoa ma le salamō, ua latou lē faatāuaina lenei meaalofa tāua. I le silafaga a le Atua, ua latou “solia le Alo o le Atua, ma . . . ua manatu e lē tāua le toto” o Iesu. (Fuaiupu e 29) Ona o o latou ala leaga, ua faaalia ai lo latou manatu faatauvaa iā Iesu ma manatu i lona toto “o se mea e itiiti lona tāua,” ma ua lē toe aogā ua pei lava o le toto o so o se tagata lē lelei atoatoa. (Today’s English Version) O na tagata lē lotofaafetai, e lē aogā i ai le taulaga a Keriso.
O le ā o le a tupu i tagata amioleaga? Na folafola mai e le Atua o le amiotonu: “O aʻu e faia le tauimasui; ou te toe taui atu lava.” (Fuaiupu e 30) O lea la, e ao iā i latou uma o loo lolo atu i le faia o mea leaga lea e ono aafia ai isi, ona faaeteete. Auā e lē mafai ona sao mai le faasalaga i latou uma e lē usiusitaʻi i tulafono amiotonu a le Atua. E masani lava ona toe aafia i latou ona o a latou mea leaga sa fai. (Kalatia 6:7) E ui lava e lē o tupu se mea iā i latou i le taimi nei, ae o le a faamasinoina i latou e le Atua i le lumanaʻi lata mai, pe a afio mai o ia e aveesea faiga lē tonu uma mai lenei lalolagi. (Faataoto 2:21, 22) Na lapataʻi mai Paulo e faapea: “O se mea e mataʻutia le paʻū atu i aao o le Atua soifua.”—Fuaiupu e 31.
O lo tatou iloaina e lē o manatu māmā Ieova le Atua i agasala e faia ma le loto i ai, e faamāfanafanaina ma faamalosia ai i tatou, aemaise lava ē o loo mafatia ona o mea leaga na faia e se tagata faauamalō. E mautinoa lava lo tatou tuu atoatoa atu i aao o le Atua e faia le tauimasui, o lē ʻinoʻino i faiga lē tonu uma.
[Faaopoopoga i lalo]
^ pala. 4 Mo se talanoaga i le māfuaaga ua faataga ai e le Atua puapuaga, tagaʻi i le itulau e 106-114 o le tusi O ā Aʻoaʻoga Moni a le Tusi Paia? lomia e Molimau Ieova.