O le ā Tonu le Mea e Tupu i le Tagata pe a Oti?

“E ola pea tagata uma pe a mavae le oti, e faapena foʻi ē amioleaga . . . E faapuapuagatia e faavavau i latou i le afi e lē mafai ona tineia, ae lē mafai ona oti, e leai se iʻuga o lo latou puapuaga.”—Clement mai Alesania, o se tusitala mai le senituri lona lua ma le tolu T.A.

I LE pei o Clement, o i latou o loo aʻoaʻo atu lenei aʻoaʻoga faapea o seoli o se nofoaga e faapuapuagatia ai, ua latou manatu e lē oti le agaga o le tagata. Pe e lagolagoina e le Tusi Paia lenei aʻoaʻoga? Seʻi tagaʻi i le faamatalaga a le Afioga a le Atua e tali ai na fesili.

Pe na ola pea Atamu i se isi mea i le mavae o lona oti? E leʻi leva lava ona uma le foafoaina o Atamu, ae tuuina atu loa e le Atua lenei faatonuga iā te ia: “O laau uma o i le faatoʻaga e te ʻai ai. A o le laau e iloa ai le lelei ma le leaga, aua e te ʻai ai; auā o le aso e te ʻai ai e te oti ai lava.” (Kenese 2:16, 17) E leʻi ola Atamu i se isi mea ina ua oti.

O le ā na tupu iā Atamu ina ua agasala o ia? O le faasalaga na faatonuina mai e le Atua, e lē o le faapuapuagatia i seoli e faavavau. Nai lo lea, ua tusia faapea e le Tusi Paia: “E te ʻai au mea e ʻai ma le afu o ou mata, seʻia e toe foʻi atu i le eleele; auā na faia ai oe; auā o le efuefu oe, e te toe foʻi atu lava i le efuefu.” (Faasisipa e ā matou ia; Kenese 3:19) E leai ma se vaega o le faalauiloaga a le Atua o loo faapea mai ai na faasaoina se vaega o Atamu i lona oti.

Pe iai se tagata e ola pea pe a mavae le oti? E leai ma se tagata e ola pea pe a mavae le oti. O loo faapea mai le Tusi Paia i le Failauga 3:20: “E oo uma lava i le mea e tasi; e mai le efuefu uma lava, e toe foʻi atu foʻi uma lava i le efuefu.” Na tusi le aposetolo o Paulo: “O lenei, faapei ona oo mai o le agasala i le lalolagi i le tagata e toʻatasi [Atamu], o le oti foʻi ona o le agasala, ona oo mai ai lea o le oti i tagata uma lava, auā ua agasala uma lava.” (Roma  5:12) Pe afai e agasala tagata uma, e talafeagai ona faapea e maliliu uma foʻi i latou.

Pe iloa ma lagona e se tagata ua oti se mea? O loo faapea mai le Afioga a le Atua: “O ē ua ola, ua latou iloa e oti i latou; a o ē ua oti, latou te lē iloa se mea.” (Failauga 9:5) I le faamatalaina o le mea e tupu i le tagata pe a oti, o loo faapea mai le Tusi Paia: “E foʻi atu i le eleele na i ai o ia; e faaumatia i lea lava aso ona manatunatu.” (Salamo 146:4) Pe afai ‘ua lē iloa e i latou se mea’ ma ua ‘faaumatia manatunatuga,’ e faapefea la ona latou iloa pe lagona foʻi se puapuaga i seoli?

E leʻi faatusa e Iesu le oti i le ola i se isi mea, ae na ia faatusaina i le moe. * (Ioane 11:11-14) Atonu o le a tetee nisi, ma faapea mai, na aʻoaʻo e Iesu e faapea e vevela seoli ma o le a lafoina tagata agasala i le afi i seoli. Seʻi o tatou iloiloina fetalaiga moni a Iesu e faatatau i seoli.

[Faaopoopoga i lalo]