Po o Fau Lou Fale i Luga o le Oneone po o le Papa?

PE E te fiafia e faitau le Tusi Paia? Po o faaavanoa lou taimi e suʻesuʻe ai pea le Tusi Paia ma Molimau a Ieova? Afai o lea, e lē taumatea ua e iloaina, ua aogā le poto ua e maua e malamalama ai i le māfuaaga o le tele o faafitauli. (Faaaliga 12:9, 12) Ua tele foʻi mau o le Tusi Paia ua e maua mai ai faamāfanafanaga i taimi o mafatiaga, faapea ma le faamoemoe mo le lumanaʻi.—Salamo 145:14; 147:3; 2 Peteru 3:13.

O se laasaga e tāua tele iā i latou o fia mulimuli iā Keriso, ia latou maua le poto saʻo mai le Tusi Paia. Pe na o le pau lea? E leai. Ina ia tumau pea ona avea ma se Kerisiano moni, e iai foʻi se isi laasaga tāua, aemaise lava pe a oo ina tofotofoina lou faatuatua. O le ā lea laasaga? E iloa le tali pe a tatou talanoa puupuu e faatatau i le Lauga a Iesu lea na faia i le Mauga, i Kalilaia.—Mataio 5:1, 2.

Ua Tofo le Malosi o Fale e Lua

Pe e te masani i upu o lea lauga? O loo tusia lenei lauga lauiloa i Evagelia a Mataio ma Luka. (Mataio 5:1–7:29; Luka 6:20-49) E na o le 20 lava minute e faitau ai. Ae e silia ma le 20 mau mai Tusitusiga Eperu ua sii mai ai, ma talafaatusa e silia ma le 50. Ae e faapitoa le talafaatusa lea na fai e Iesu e faatatau i fale e lua na fauina, ona na faaaogā e Iesu e faaiʻu ai lana lauga. A oo ina e malamalama i le uiga o lea talafaatusa mulimuli, ona mafai lea ona e malamalama i le auala e te tū mausalī ai pea o sē e mulimuli iā Keriso, e tusa lava po o ā tofotofoga e oo i lou faatuatua.

Na fetalai Iesu: “O i latou uma e faalogo i aʻu upu ma faia, ua faatusaina i latou i le tagata faautauta, ua na fausia lona fale i luga o le papa. Ona totō mai lea o timuga ma ua oo mai lologa, ma agi mai le matagi ma taia ai le fale, ae e leʻi paʻū, auā ua fausia i luga o le papa. O i latou uma foʻi ua faalogo i aʻu upu ae lē faia, ua faatusaina i latou i le tagata valea ua na fausia lona fale i luga o le oneone. Ona totō mai lea o timuga ma ua oo mai lologa, ua agi mai foʻi le matagi ma taia ai le fale, ona paʻū ai lea ma matuā nutipalaina.”—Mataio 7:24-27.

O le Tamāloa na “Eli Maulalo”

O le ā le upu moni tāua ua aʻoaʻo ai e Iesu ona soo e ala i le talafaatusa i tamāloloa na fau o la fale? Seʻi o tatou iloiloina uiga o upu a Iesu. O le ā ua e mātauina e tusa o nei fale e lua? E tutusa mala na oo i ai. Atonu e tutusa foʻi fale i le vaai. Ma atonu o loo fauina i le vaipanoa lava e tasi, pe e sosoo foʻi fale. Ae na fau le isi fale i luga o le oneone, ae o le isi na fau i luga o le papa. Na faapefea ona tupu lea mea? Ona ua fai mai le Evagelia a Luka, na “eli maulalo” le tagata faautauta ina ia faataatia le faavae o lona fale i luga o le papa. (Luka 6:48) O le māfuaaga lea o le mautū o le fale o le tagata faautauta.

O le ā le manatu o loo fia faamamafaina e  Iesu? Na fai e Iesu le talafaatusa ina ia faamamafa ai gaoioiga a ē na fausia fale, ae e lē o foliga o fale po o le vaipanoa o loo iai ma le malolosi o matagi, timuga ma lologa na oo i ai. Na eli maulalo le faavae o le fale o le isi tamāloa, ae e leʻi faia faapea e le isi. E faapefea ona e eli maulalo e pei ona faia e le tamāloa faautauta? Na faamatala mai e Iesu le ʻauga o le talafaatusa i lona faapea mai: “Aiseā tou te fai mai ai iā te aʻu, ‘Le Alii e! Le Alii e!’ ae lē faia mea ou te fai atu ai? O lē e sau iā te aʻu ma faalogo i aʻu upu ma faia, ou te faailoa atu iā te outou lē ua tusa i ai o ia: Ua pei o ia o le tagata . . . ua eli maulalo ma faataatia le faavae i luga o le papa.”—Luka 6:46-48.

Ioe, e lē lava le na ona faalogo i aʻoaʻoga a le Tusi Paia, pe faitauina foʻi i le fale, ona ua pei o loo fausia le fale i luga o le oneone, ae e lē o eli maulalo. Ae e manaʻomia se taumafaiga filigā ina ia ola e tusa ai ma aʻoaʻoga a Keriso. E manaʻomia ai ona matuā eli maulalo i le papa malō ina ia mautū.

O lea la, e faalagolago lou tutumau e avea ma sē e mulimuli iā Keriso i lou faatatauina o mea ua e faalogo i ai. Pe afai ua e faatatauina i lou olaga i aso uma mea ua e aʻoaʻoina mai le suʻesuʻeina o le Tusi Paia, ua pei la oe o le tamāloa faautauta o lē na eli maulalo. O lea la, e ao i tagata uma e suʻesuʻe i le Tusi Paia ona manatunatu ifo e faapea: ‘Po o aʻu o sē e na ona faalogo, po o sē e faia? Pe na o le faitau ma suʻesuʻe i le Tusi Paia laʻu mea lea e fai, po o oʻu mulimuli i faatonuga mai le Tusi Paia pe a fai aʻu filifiliga?’

Aogā o le Eli Maulalo

Mātau mai le mea na tupu iā José. Na tausia aʻe o ia e ona mātua ia faatāua tulaga tau amio o loo i le Tusi Paia, ae e aunoa ma sona suʻesuʻe lelei i ai. Ua fai mai o ia, “Ina ua ou tuua loʻu aiga, na ou taumafai ia ou tama lelei, peitaʻi ane na tele aʻu uō lē lelei. Na oo ina ou faaaogā fualaau faasāina, faia feusuaʻiga lē mamā, ma faamisa i isi.”

Mulimuli ane, na filifili José e tuu ana amioga leaga ae suʻesuʻe lelei i le Tusi Paia. Fai mai o ia, “O le mea na uunaʻia ai aʻu e sui, o loʻu faitauina lea o le Lauga a Iesu i le Mauga ma malamalama i ai. Ae na umi se taimi o tau sui oʻu uiga ma loʻu olaga. Na mua ona ou popole i manatu o aʻu uō, ae na iʻu ina ou manumalo i lea tulaga. Na tuu loʻu pepelo ma le palauvale, ma ou auai loa i sauniga a Molimau a Ieova. Na ou iloaina ai le moni o le folafolaga a Iesu, e maua le fiafia tumau pe a ola i se olaga faigofie ma faatatauina fautuaga mai le Tusi Paia.”—Mataio 5:3-12.

O ā iʻuga o lou eli maulalo ia fausia i luga o le papa, e ala i lou filigā e faatatau mea ua e faitauina i le Afioga a le Atua? Na faapea mai Iesu: “Ina ua oo mai lologa, ua tafe mai le vai  ma taia ai le fale, ae e leʻi lūlūina ona o le malosi o le fale.” (Luka 6:48) O le mea moni, afai e fau lelei lou fale e ala i le faatatauina o mea ua aʻoaʻoina, o le a lē mafai e tofotofoga e pei o ni afā ona faaleagaina lou faatuatua, pe lūlūina foʻi. Ioe, e matuā faamāfanafanaina lava i tatou i lea manatu!

Ua taʻu mai foʻi e Iakopo le ʻafa uso o Iesu, se isi faamanuiaga e maua e tagata e suʻesuʻe i le Tusi Paia o ē e faitau ma faatatau moni le Afioga a le Atua. Na ia tusi e faapea: “Ia avea outou ma ē usiusitai i le upu ae lē na o le faalogologo i ai . . . O lē vaavaai totoʻa i le tulafono lelei atoatoa o le saʻolotoga, ma tausisi i ai, ona o lona faalogologo ma le lē faagalogalo, o le a fiafia ai o ia ona o lona faia o lea galuega.”—Iakopo 1:22-25.

Ioe, e fiafia lava i latou e faatinoina fautuaga a le Tusi Paia. Ma o le fiafia lea, e maua ai e i latou e mulimuli iā Keriso le malosi e tumau ai, pe a taia e puapuaga e pei o afā, lea e tofotofoina ai lo latou faatuatua, ma le moni o lo latou alofa iā Ieova le Atua.

O le ā Lau Mea e Fai?

Na faamamafa e Iesu i lana Lauga i luga o le Mauga e faapea, o le auaunaga iā Ieova le Atua, e tāpā ai le faia o ni filifiliga. O se faataʻitaʻiga, na fetalai Iesu ia filifili le tagata, pe faafaigofie lana vaai pe leai, pe pologa i le Atua po o ʻoa, pe e savali i le ala lauitiiti po o le ala lautele. (Mataio 6:22-24; 7:13, 14) Ona ia taʻu lea i ona soo se filifiliga mulimuli e ao ona latou faia, e ala i le faaiʻu i le talafaatusa i tagata fau fale e toʻalua: Ia fai e pei o le tamāloa faautauta, po o le fai e pei o le tagata valea.

Pe a faaauau ona e faatatauina ma lou loto atoa mea ua e aʻoaʻoina mai le suʻesuʻeina o le Tusi Paia, o lona uiga ua e gaoioi ma le faautauta. Ioe, o lou eli maulalo ina ia fausia lou fale i luga o le papa, o le a e maua ai faamanuiaga i le taimi nei faapea foʻi ma le lumanaʻi.—Faataoto 10:25.

[Ata i le itulau 30]

E faalagolago lo tatou tutumau, i le faatatauina o mea ua tatou aʻoaʻoina