Se Talitonuga Taatele

“Sa fai ma ou miti o loo susunuina aʻu i seoli! Sa ou miti na lafoina aʻu i le afi ma ou te ala aʻe ai ma ʻeʻē. O lea la, na ou taumafai ai lava ia aua neʻi oʻu faia se agasala.”—Arline.

PE E te talitonu o seoli o se nofoaga ua faaavanoa e faapuapuagatia ai tagata agasala? E toʻatele ua talitonu i ai. O se faaaʻoaʻoga, i le 2005 na faapea mai ai se tagata suʻesuʻe o lotu i le Iunivesite o St. Andrews i Sikotilani, o le tasi vae tolu o taʻitaʻi lotu i Sikotilani e talitonu, o i latou e faaesea mai le Atua, o le a faapuapuagatia e “faavavau o latou mafaufau i seoli.” Ae o le tasi vae lima e talitonu, o i latou o loo i seoli o le a faapuapuagatia o latou tino.

I le tele o atunuu, ua taatele ai le talitonuga i seoli. O se faataʻitaʻiga, sa faia i le Iunaite Setete se suʻesuʻega e taʻua o le Gallup e saʻilia ai manatu o tagata lautele i le 2007 ma iloa ai, e tusa ma le 70 pasene o i latou na fesiligia e talitonu i seoli. E oo lava i atunuu e tau lē lolotu ona tagata, o loo malosi ai le talitonuga o le afi i seoli. Sa faia se suʻesuʻega i Kanata e taʻua o le Gallup i le 2004, e 42 pasene o tagata e talitonu i seoli. Ae i Peretania, e 32 pasene na mautinoa e iai le afi i seoli.

O Aʻoaʻoga a Taʻitaʻi Lotu

E toʻatele taʻitaʻi lotu ua lē o toe aʻoaʻo atu o le afi i seoli o se nofoaga e faapuapuagatia ai le tino. Nai lo lea, e latou te lagolagoina le talitonuga lea e taitutusa ma le faamatalaga o loo i le tusi o aʻoaʻoga faa-Katoliko e taʻua o le Catechism of the Catholic Church, lea na lomia i le 1994. O loo faapea mai lenā tusi, “O le faasalaga autū i seoli, o le faaesea mai lea i le Atua e faavavau.”

Po o le ā lava le tulaga, ae o loo taatele pea le talitonuga o seoli e faapuapuagatia ai a lē o le mafaufau, o le tino. O i latou e lagolagoina lenei talitonuga, ua latou faapea mai e faavae mai lenā aʻoaʻoga i le Tusi Paia. Na faapea mai le peresitene o le Seminario Faafaifeʻau a le Lotu Papatiso i Saute, o R. Albert Mohler: “O le mea moni, e faavae mai le Tusi Paia.”

Aiseā e Tāua ai Mea E te Talitonu Ai?

Afai o seoli o se nofoaga moni lava e faapuapuagatia ai, e tatau la ona e fefe ai. Ae afai e lē moni lenei aʻoaʻoga, ua aʻoaʻo atu la e taʻitaʻi lotu se talitonuga ua fenuminumiaʻi ma tigā ai mafaufau o ē o talitonu ai. Ma e taʻuvalea ai foʻi le Atua.

O ā fā a le Afioga a le Atua, le Tusi Paia, e tusa ai ma lenei mataupu? O mataupu o sosoo mai o le a faaaogā ai faaliliuga Katoliko ma le faaliliuga Porotesano o le Tusi Paia e tali ai fesili nei e tolu: (1) O le ā tonu le mea e tupu i le tagata pe a oti? (2) O le ā na aʻoaʻo e Iesu e faatatau i seoli? (3) E faapefea ona e aafia i lou silafia o le mea moni e uiga i seoli?