Ia Mafuta Atu i le Atua

E Alagatatau Ona Tatou Viia Lē na Faia Mea Uma

Faaaliga 4:11

PE NA iai se taimi na e taumānatu ai, ‘Po o le ā le uiga o lenei olaga?’ O ē e faapea mai o le olaga o se iʻuga o ni mea na teʻiteʻi lava ua iai, e latou te lē iloa le tali o lenā fesili. Peitaʻi, e lē faapena i latou o ē talitonuina le mea moni e faapea, o Ieova le Atua o le Puna lea o le ola. (Salamo 36:9) E latou te iloa e iai se fuafuaga na ia faia ai i tatou. O loo maua i le Faaaliga 4:11 lea fuafuaga. Seʻi o tatou vāai pe faapefea ona faamatalaina mai e nei upu, lea na tusia e le aposetolo o Ioane, le māfuaaga ua tatou iai i inei.

Na tusia e Ioane se pese o viiga o le Atua o loo usuina i le lagi e faapea: “Ieova e, lo matou Atua, ua tatau ona e mauaina le viiga, ma le mamalu, ma le mana [po o le malosi], auā na e faia mea uma lava, ma o lou finagalo foʻi ua iai nei mea ma ua faia ai.” Ua na o Ieova lava e ono ma tatau i ai lenei viiga. Aiseā? Auā o ia na “faia mea uma lava.” O lea la, o le ā se mea ua uunaʻia ana foafoaga atamamai e fai?

Ua taʻua e le mau e tatau ona “mauaina” e Ieova le viiga, le mamalu, ma le mana. E mautinoa lava o ia o se Peresona e pito sili ona mamalu ma malosi i le vateatea. Ae ui i lea, e toʻatele tagata e lē o talitonu atoatoa o le Atua na faia mea uma. Peitaʻi, o loo iai i latou ua iloa lelei “uiga lē vaaia” o le Atua ona o mea na ia faia. (Roma 1:20) Ua uunaʻia i latou e avatu iā Ieova le viiga ma le mamalu, ona o lo latou lotofaafetai. E latou te folafola atu i tagata uma o le a fia faalogo mai, ia faamaoniga mataʻina o Ieova na ia faia mea matagofie uma, ma e tatau ona tatou avatu iā te ia le faaneeneega.—Salamo 19:1, 2; 139:14.

E faapefea ona maua e Ieova le malosi mai ona tagata tapuaʻi? E lē mafai e se foafoaga ona tuuina atu se malosi i Lē silisili ese na faia mea uma lava. (Isaia 40:25, 26) Peitaʻi, ona ua faia i tatou i le faatusa o le Atua, ua tatou faaatagia atu ai uiga o le Atua, ma o se tasi o na uiga o le malosi. (Kenese 1:27) Pe afai tatou te matuā talisapaia mea ua faia e le Atua mo i tatou, o le a uunaʻia la i tatou e faaaogā lo tatou malosi e viia ma faamamaluina ai o ia. Nai lo le faaalu atoa o lo tatou malosi i le faia o mea tatou te mananaʻo i ai, ua tatou iloa e alagatatau ona avatu iā Ieova le Atua lo tatou malosi atoa a o tatou auauna atu iā te ia.—Mareko 12:30.

Aiseā la ua tatou iai i inei? O loo aumaia le tali i le vala mulimuli o le Faaaliga 4:11: “Auā . . . o lou finagalo foʻi ua iai nei mea ma ua faia ai.” E lē o so tatou loto na māfua ai ona tatou iai i inei, ae ona o le finagalo o le Atua. O le māfuaaga lea e lē faamalieina ma lē uigā ai olaga o ē e faamuamua mea latou te mananaʻo i ai. Ina ia maua se olaga toʻafilemu, olioli, ma faamalieina, e ao ona tatou iloa le finagalo o le Atua ma ola e ōgatusa ma lona finagalo. E na o le pau lenā o le auala e tatou te iloa ai le māfuaaga na faia ai i tatou ma ua tatou iai i inei.—Salamo 40:8.

[Ē Ana le Ata i le itulau 31]

NASA, ESA, ma le A. Nota (STScI)