Faamālōlōga Faavavega i Aso Nei—Pe e Mai le Atua?

UA MASANI ona vaaia i isi atunuu tagata o loo asiasi atu i nofoaga paia, ma e toʻatele ua fai mai, ua mālōlō ai o latou maʻi sa leʻi mafai ona togafitia. Ae i isi atunuu, ua fai mai tagata taulasea ua mafai ona latou faamālōlō maʻi e ala i mana faapitoa. E lē gata i lea, o faatasiga faapitoa a lotu e faia ai faamālōlōga i isi nofoaga, na mafai ai e tagata pipili ona tutū i luga ma fai mai ua faamālōlōina i latou, ma ua lē manaʻomia o latou nofoa faataavale ma tiaʻi foʻi ma o latou tootoo.

E lē tasi se lotu o faia nei faamālōlōga, ma e tuuaʻi e isi le pepelo o isi, faapea e sesē ma faapaupau a latou faamālōlōga. O le fesili la e tulaʻi mai, Pe e faaaogā e le Atua lotu e eseese toe feteenaʻi, e ala mai ai faamālōlōga? Ona o loo faapea mai le Tusi Paia: “Auā o le Atua, o ia o le Atua o le filemu ma e fai mea maopoopo.” (1 Korinito 14:33) O lea la, o nei ‘faamālōlōga faavavega,’ pe e moni lava e mai le Atua? Ua fai mai nisi tagata faamālōlō, o Iesu e ala mai ai lo latou mana. O lea la, seʻi tatou iloiloina le auala na faamālōlō ai e Iesu tagata.

Le Auala na Faamālōlō ai e Iesu Tagata

Ua ese lava le auala lea na faamālōlō ai e Iesu maʻi ma le auala o loo faia e tagata i aso nei. O se faataʻitaʻiga, o i latou uma na ō mai iā Iesu, na ia faamālōlōina. E leʻi faamālōlō na o ē na ia filifilia, ae o isi na toe foʻi e leʻi faamālōlōina. E le gata i lea, na atoatoa ona ia faamālōlōina le tagata, ma o le tele o i latou na mālōlō i le taimi lava na fetalai atu ai o ia. Ua faapea mai le Tusi Paia: “Ua taumafai tagata uma ina ia papaʻi mai iā te ia, auā ua alu ese le mana mai iā te ia ma faamālōlōina ai i latou uma.”—Luka 6:19.

Na faamālōlō foʻi e Iesu i latou e lē faatuatua iā te ia, ma ua ese ai ma le ʻau faamālōlō i aso nei, ona ua latou tuuaʻi tagata mamaʻi e faapea ua lē mafai ona faamālōlōina i latou, ona e lē o lava lo latou faatuatua. O se faataʻitaʻiga, na faamālōlō e Iesu se tagata tauaso e ui e leʻi talosaga ane o ia ia faamālōlōina. Na fesili Iesu i lenei tagata mulimuli ane: “Po ua e faatuatua ea i le Atalii o le tagata?” Ua tali mai le tamāloa: “Lau susuga e, o ai o ia, ina ia ou faatuatua ai iā te ia?” Ua fetalai atu Iesu iā te ia: “O ia lea o loo tautala atu iā te oe.”—Ioane 9:1-7, 35-38.

Atonu o le a e fesili ifo e faapea, ‘Afai la e lē manaʻomia ona faatuatua le tagata lea e faamālōlōina e Iesu, aiseā la na fetalai ai Iesu i ē na ia faamālōlōina: “Ua e malosi ona o lou faatuatua”?’ (Luka 8:48; 17:19; 18:42) Ona o loo faamanino atu ai e Iesu e faapea, o ē na uunaʻia e lo latou faatuatua e ō atu iā te ia, na faamālōlōina i latou, ae o i latou e leʻi ō atu iā te ia, e leʻi faamālōlōina i latou. O le mana o le Atua na faamālōlō ai maʻi o ē na faamālōlōina, ae lē o lo latou faatuatua. Ua faapea mai le Tusi Paia e uiga iā Iesu: “Na faauuina e le Atua Iesu mai i Nasareta, i le agaga paia ma le mana. Na ia maliu atu i le nuu ma faia galuega lelei, ma faamālōlōina i latou uma sa mafatia ona o le Tiapolo; auā sa faatasi le Atua ma ia.”—Galuega 10:38.

I nei aso, o le ʻauga lava o faamālōlōga o le tupe. Ua lauiloa tagata faamālōlō i lo latou popoto e saʻili tupe. E iai se alii faamālōlō na taʻua e faapea, e $89 miliona Amerika na ia maua i le tausaga, ona o ana polokalame i le lalolagi aoao. Ma o loo maua foʻi tupe a lotu mai tagata o loo malaga atu i nofoaga paia e saʻili se faamālōlōga. O le eseesega, e leʻi aoina e Iesu ni tupe mai tagata na ia faamālōlōina. Ae i se tasi taimi na ia fafagaina foʻi i latou. (Mataio 15:30-38) Na fetalai Iesu i ona soo ina ua ia auina atu i latou e talaʻi e faapea: “Ia faamālōlō i ē mamaʻi,  faatutū i ē ua oti, faamamā i lepela ma tutuli temoni. Ia outou avatu fua, auā ua outou maua fua.” (Mataio 10:8) Aiseā ua ese ai faamālōlōga a Iesu ma faiga a le ʻau faamālōlō i aso nei?

O le Mana o Ai ua “Faamālōlō” Ai?

A o faagasolo tausaga, ua iloilo e nisi o loo galulue i matagaluega o le soifua mālōlōina, mea ua faia e le ʻau faamālōlō. O le ā ua latou iloaina? E tusa ai o le pepa Daily Telegraph a Lonetona, ua faapea mai se fomaʻi Egelani ua 20 tausaga o suʻesuʻe i lea mataupu: “E aunoa ma sina faamaoniga faafomaʻi e lagolago ai i latou ua fai mai e mafai ona fai faamālōlōga faavavega.” Peitaʻi ane, ua tele tagata o loo talitonu moni lava na faamālōlōina i latou ona o le mana mai mea paia, po o nofoaga paia, ma tagata faamālōlō a lotu. Po o lona uiga la, ua ʻolegia i latou?

Na fetalai Iesu i lana Lauga lauiloa i luga o le Mauga e faapea, o le a fai atu tagata pepelo iā te ia: “Le Alii e, le Alii e, pe matou te leʻi . . . faia le tele o galuega mamana i lou suafa?” Ae o le a tali atu o ia: “Ou te leʻi iloa lava outou! Inā ō ese ia iā te aʻu, o outou o ē faia mea leaga.” (Mataio 7:22, 23) Ua lapataʻi mai le aposetolo o Paulo e tusa o lē o loo maua mai ai le mana o nei tagata e faapea: “O le faatasi mai o lē e amioleaga, e māfua ona o le galuega a Satani ma galuega mamana, ma faailoga pepelo ma mea ofoofogia uma ma le amiolētonu.”—2 Tesalonia 2:9, 10.

E lē gata i lea, o “faamālōlōga” e ala mai mea paia, po o tupua ma faatagata, e lē mai le Atua. Aiseā? Ona o loo manino lava le poloaʻiga mai le Afioga a le Atua e faapea: “Ia sosola ese i le ifo i tupua,” ma “Ia leoleo outou mai i tupua.” (1 Korinito 10:14; 1 Ioane 5:21) O nei “faamālōlōga,” o se isi lea vala o le togafiti a le Tiapolo ia tataʻi ese ai tagata mai le tapuaʻiga moni. Ua faapea mai le Tusi Paia, ua “liua e Satani o ia lava e avea ma agelu o le malamalama.”—2 Korinito 11:14.

Le Māfuaaga na Faamālōlō ai Tagata e Iesu ma Aposetolo

O faamālōlōga moni o loo tusia i Tusi Paia Kerisiano Eleni, na faamanino mai ai o loo iā Iesu ma le ʻauaposetolo le mana o le Atua. (Ioane 3:2; Eperu 2:3, 4) Na aogā foʻi faamālōlōga a Iesu e lagolago ai le feʻau na ia talaʻia: “Ona ia femalagaaʻi lea i Kalilaia uma, ua aʻoaʻo atu i o latou sunako ma talaʻi atu le tala lelei o le malo, ma faamālōlō i faamaʻi eseese uma.” (Mataio 4:23) O galuega mamana na faia e Iesu, e aofia ai le faamālōlō o maʻi, le fafagaina o tagata e toʻatele, le faatoʻafilemu o matagi, ma le toe faatutūina o ē oti, na faaalia ai mea o le a ia faia mo tagata usiusitaʻi pe a pule mai lona Malo. Ioe, o se tala lelei tele lea tala!

Na muta galuega mamana ma meaalofa a le agaga ina ua maliliu Iesu ma le ʻau aposetolo, ma nisi na latou faaee i ai meaalofa. Na tusi le aposetolo o Paulo e faapea: “Ae afai e iai meaalofa e fai ai valoaga, pe e tautala [faavavega] i gagana eseese, pe maua le malamalama [e faailoa mai e le Atua], e faalēaogāina lea.” (1 Korinito 13:8) Aiseā ua faalēaogā ai? Ona ua taunuu le fuafuaga na faia ai nei galuega mamana, o le faailoa mai lea o Iesu, o ia o le Mesia folafolaina, faapea ma le taliaina e le Atua o le faapotopotoga Kerisiano, ma o na galuega mamana e aofia ai faamālōlōga, ua lē o toe manaʻomia; ua “faalēaogāina lea.”

Ae o loo iai se feʻau tāua e tatou te iloa mai faamālōlōga faavavega e Iesu. Afai e tatou te uaʻi atu i aʻoaʻoga a Iesu e tusa o le Malo o le Atua ma faatuatua i ai, o le a tatou maua le faamoemoe i le taimi e faataunuu ai le valoaga faagaeeina, i le faaleagaga ma le faaletino, e faapea: “E lē fai mai foʻi se tasi ua mau ai, ‘Ou te maʻi.’”—Isaia 33:24; 35:5, 6; Faaaliga 21:4.