Iesu—Faamatalaga a Tagata e Faatatau iā te Ia

“O Iesu le Nasareta . . . e mautinoa lava le lālāmua o ia i le talafaasolopito.”—H. G. Wells, tusitala o talafaasolopito mai Egelani.

“E tutasi lava Keriso . . . mai tagata taʻutaʻua uma o talafaasolopito.” —Philip Schaff, na fanau i Suisilani ma o se tagata suʻesuʻe i talitonuga faalotu ma talafaasolopito.

O AI e agavaa e taʻua o le tagata silisili o ē uma na soifua mai? E faapefea ona fua le silisili o se tagata? Pe e ala i lona tomai faafitafita? Po o lona malosi faaletino? Po o lona atamai? Pe e fua i le tele e aafia ai tagata i ana fetalaiga ma gaoioiga, ma ana faaaʻoaʻoga ua faataatia mo i latou?

Seʻi mātau faamatalaga a tusitala o talafaasolopito, o saienitisi, o le ʻauatamamai, o tusitala, taʻitaʻi faapolotiki, ma isi i taimi ua teʻa ma aso nei, e faatatau i le tagata mai Nasareta, o Iesu Keriso:

“O lona uiga, seʻi iloga e mimilo sesē le mea moni ona faatoʻā teena lea e faapea o Iesu le Nasareta, e sili ona malolosi ana taaʻiga e lē gata i le lua afe tausaga ua tuanaʻi, ae i le talafaasolopito atoa o tagata.”—Reynolds Price, tusitala Amerika ma o se tagata poto i le Tusi Paia.

“O se tagata e aunoa ma se sala na ia ofo atu lona soifua mo le lelei o isi, e aofia ai ona fili, ma ua avea ma togiola o le lalolagi. O se gaoioiga ua lelei atoatoa.”—Mohandas K. Gandhi, taʻitaʻi faapolotiki ma le faaleagaga o Initia.

“A o oʻu laʻitiiti, na aʻoaʻoina aʻu i le Tusi Paia ma le Talmud (tulafono mo le ʻau Iutaia). O aʻu o se tagata Siū, ae ou te amanaʻia ma ou maofa i lea tagata mai Nasareta.”—Albert Einstein, saienitisi na fanau i Siamani.

“O loʻu manatu, o Iesu Keriso o se tagata e sili ona mataʻina ona uiga i le talafaasolopito atoa, i le avea e lē gata o le Alo o le Atua ae o le Atalii o le Tagata. O mea uma na ia fetalai i ai ma faia, e aogā mo i tatou i aso nei, ma o se faamatalaga lea e lē mafai ona faia e faatatau i se isi lava tagata o loo soifua, po ua maliu foʻi.”—Sho·lem Asch, o se tusitala na fanau i Polani, ma o loo tusia i le Christian Herald; faasisipa e ā latou ia.

“Mo le 35 tausaga o loʻu olaga, sa ou matuā lē talitonu ai lava i isi talitonuga po o isi mea. Ae i le lima tausaga ua tuanaʻi, na ou mautinoa ai o se tagata moni Iesu Keriso, ma na ou talitonu i le aʻoaʻoga a Iesu Keriso, ma faafuaseʻi ona suia ai loʻu olaga atoa.”—Count Leo Tolstoy, tusitala ma o se faifilosofia Rusia.

“O le soifuaga o Iesu ua sili ona taaʻina ai tagata i lenei paneta, ma o loo faaauau pea ona taaʻina ai tagata.”—Kenneth Scott Latourette, tusitala ma o se tagata suʻesuʻe o talafaasolopito Amerika.

“Po o lona uiga o le talafaasolopito o le olaga o Iesu o se tala fatu? O le mea moni, e lē o se tala fatu. E sili atu ona tele faamaoniga o le talaaga o Iesu Keriso, e ese mai ai iā Socrates (le faifilosofia Eleni) lea e ui ina tau lē lava faamaoniga o lona talaaga, ae talitonuina e tagata.”—Jean-Jacques Rousseau, faifilosofia Falani.

O lea la, o se tagata e talafeagai ona avea ma faaaʻoaʻoga mo lo tatou olaga, o Iesu Keriso lea. O Paulo o se tagata aʻoaʻoina o le uluaʻi senituri na tofia e Iesu e avea ma Ona soo e talaʻia atu o Ia i nuu ese, ma ua timaʻi mai o ia, ia tatou “vaavaai totoʻa” atu iā Iesu. (Eperu 12:2; Galuega 9:3) O le ā ua aʻoaʻoina i tatou e Iesu i le auala e ola ai? E faapefea ona e maua aogā mai lona soifuaga?