Iesu—O le Faaaʻoaʻoga Sili e Mulimuli Ai

PE E te manaʻo ia faaleleia ou uiga ma sili atu ona e fiafia? O loo faamatala mai e le aposetolo o Peteru le auala e mafai ai ona tatou faia. Na ia tusi: “Na puapuagatia [Keriso] mo outou, ua ia tuu mai ai le faaaʻoaʻoga mo outou ina ia outou mulimulituʻi ai i ona tulaga aao.” (1 Peteru 2:21) O lea la, i lona ola i se soifuaga taulau ma le mataʻina, sa tele mea na mafai ona aʻoaʻo mai e Iesu iā i tatou. O le aʻoaʻo o mea e faatatau iā Iesu ma faaōgatusa o tatou olaga ma lona soifuaga, e mautinoa lava o le a faaleleia o tatou uiga ma sili atu ai ona fiafia. Seʻi o tatou vaʻili nisi o ona uiga lea e tutasi ai lenei tagata, ma vaavaai ni auala e mafai ona tatou maua mai ai aogā i ana faaaʻoaʻoga.

Sa Paleni le Olaga o Iesu. E ui na fetalai mai Iesu e “leai se mea e moe ai,” ae e leʻi soifua o ia i se olaga e faasāsā naʻuā. (Mataio 8:20) Sa ia auai atu i faigaʻai. (Luka 5:29) O lana vavega muamua o loo faamauina, o le suia o le vai i le uaina lelei i le tausamaaga o le faaipoipoga, na faaalia ai sa ia lē faaesea o ia mai tagata ae na latou miomiō faatasi. (Ioane 2:1-11) Peitaʻi, na faamanino mai e Iesu le mea e sili ona tāua iā te ia. Na ia fetalai mai: “O laʻu meaʻai, o le faia lea o le finagalo o lē na auina mai aʻu, ma faaiʻu lana galuega.”—Ioane 4:34.

□ Po ua e iloiloina lou olaga ma vaai pe faapefea ona faapaleni ou manaʻoga faaletino ma manaʻoga faaleagaga?

Sa tosina atu tagata iā Iesu. O loo faamatala mai e le Tusi Paia Iesu o se tagata e māfana ma faaleuō ona uiga. E leʻi ita Iesu pe a ō atu tagata iā te ia ma o latou faafitauli po o fesili faigatā. I se tasi taimi a o siʻomia o ia e le motu o tagata, sa paʻi atu ai se fafine o loo mafatia i se maʻi mo le 12 tausaga i lona ofu, ma lona faamoemoe o le a faamālōlōina ai o ia. Sa leʻi teena e Iesu lenei fafine ona o lenā gaoioiga, ae na ia fetalai atu ma le agalelei: “Loʻu afafine e, ua e  malosi ona o lou faatuatua.” (Mareko 5:25-34) Sa tosina atu foʻi tamaiti iā te ia, e aunoa ma le fefe neʻi lē ano atu o ia iā te i latou. (Mareko 10:13-16) Sa iloga ana feutagaʻiga ma ona soo ona sa ia lē natia se mea moni, ma e atiaʻe foʻi talanoaga na latou fai ma ia. E latou te leʻi faatalatū e faalatalata atu iā te ia.—Mareko 6:30-32.

□ Pe faigofie i isi ona faalatalata atu iā te oe?

Sa ia malamalama i tulaga o tagata ma agaalofa. O se tasi o uiga autū o Iesu o lona mafai lea ona tuu o ia i tulaga o isi, ina ia tigā alofa ai mo i latou, ma fesoasoani atu iā te i latou. Na faapea mai Ioane, ina ua iloa atu e Iesu o loo tagi Maria i le maliu o lona tuagane, o Lasalo, sa “ōi ai lea ma ua ootia lona finagalo,” “ona tagi ai lea” o Iesu. Sa iloagofie e i latou na matamata ane le alofa tele o Iesu mo lenā aiga, o se alofa e leʻi mā o ia e faaali atu i luma o tagata. E mataʻina le alofa na ia faaalia ina ua ia toe faatūina mai lana uō!—Ioane 11:33-44.

I se isi taimi, na ʻaiʻoi atu ai iā Iesu se tamāloa na maʻi i le lepela, o se maʻi na faaesea mai ai o ia i tagata, ma faapea atu: “Le Alii e, a e finagalo i ai, e mafai lava ona e faamamā iā te aʻu.” Sa matuā faamāfanafana loto le auala na tali atu ai Iesu: “Ona faaloaloa atu ai lea o lona aao, ua paʻi atu iā te ia, ma faapea atu: ‘Ou te loto i ai. Ia mamā ia oe.’” (Mataio 8:2, 3) E leʻi faamālōlōina e Iesu tagata ina ia tau lava ina faataunuu ai valoaga. Sa finagalo o ia e soloiesea o latou loimata. O mea uma sa ia faia sa ōgatasi ma se tasi o ana fetalaiga e faagalogatā e faapea: “E pei ona outou mananaʻo e faia mai e tagata iā te outou, ia faapea lava ona outou faia iā i latou.”—Luka 6:31.

□ Po o atagia mai i au gaoioiga lou alofa mo isi?

Sa malamalama ma faautauta Iesu i tulaga o tagata. E ui o ia o se tagata e leʻi faia se mea sesē, e leʻi faatalitalia e Iesu se lelei atoatoa mai isi, po o lona faapea ifo e sili atu o ia; e na te leʻi gaoioi foʻi e aunoa ma lona silafia o le mea o loo tupu. I se tasi taimi, na faaalia ai le faatuatua ma le talisapaia e se “fafine [ua] lauiloa i le aai o sē e agasala,” ma ia fufulu ai aao o Iesu i ona loimata. Sa tuu pea o ia e Iesu e faia lenā gaoioiga, ma na faateʻia ai lē ona le fale, auā sa ia matuā faitioina o ia. I le malamalama o Iesu i ona faalogona moni, e leʻi teena e Iesu lenā fafine ona o ana agasala. Nai lo lea, na ia fetalai atu: “O lou faatuatua ua faaolaina ai oe; inā e alu ia ma le filemu.” Ona o le tali māfana atu o Iesu, atonu sa uunaʻia ai lenā fafine e lafoaʻia lona olaga agasala.—Luka 7:37-50.

□ Po o iloa oe o se tagata e vave ona faamalō atu ae telegese ona faitio?

Sa lē faailoga tagata o ia ae sa faaaloalo i isi. Atonu pe tai tutusa o la uiga, faapea ma se sootaga i o la aiga, sa naunau faapitoa ai Iesu i lona soo o Ioane. * E ui i lea, e leʻi faaʻauʻau Iesu iā te  ia, po o le fai mea faapito iā te ia. (Ioane 13:23) O le mea moni, ina ua talosaga atu Ioane ma lona uso o Iakopo mo ni tulaga maualuluga i le Malo o le Atua, na tali atu Iesu: “Ou te lē pule po o ai e nofo i loʻu itu taumatau ma loʻu itu tauagavale.”—Mareko 10:35-40.

Sa faaaloalo Iesu i isi i taimi uma. Sa lē aafia o ia i uiga faailoga tagata o tagata i na vaitaimi. O se faaaʻoaʻoga, sa vaai faatauvaa tagata i fafine. Peitaʻi, sa tuuina atu e Iesu le āva tatau i fafine. O le taimi muamua na ia faailoa atu ai o ia o le Mesia, sa faaali atu i se fafine e lē o se Iutaia ae o le Samaria, o ē vaai faatauvaa i ai tagata Iutaia ma e latou te lē faafeiloaʻia. (Ioane 4:7-26) O fafine foʻi na maua le faaeaga o le muamua vāai i le toetū mai o Iesu.—Mataio 28:9, 10.

□ Po o e faailoga tagata i au feutagaʻiga ma tagata o isi ituaiga, itupā, gagana, po o atunuu?

O ia o se atalii ma se uso na faataunuu ma le māeʻaeʻa ona tiute tauave. Na maliu Iosefa le tamā fai o Iesu, a o talavou lava Iesu. E lē taumatea na tausia e Iesu lona tinā ma ona uso ma tuafāfine laiti, e ala i le galue o se kamuta. (Mareko 6:3) I toe taimi o lona soifuaga, sa ia tuu atu ai i lona soo o Ioane le tausiga o si ona tinā.—Ioane 19:26, 27.

□ Pe e mafai ona e faaaʻoaʻo iā Iesu i le auala na ia tausia ai lona aiga?

O Iesu o se uō moni. I le avea o Iesu ma uō, sa tutasi ai o ia. E faapefea? E leʻi teena e Iesu ana uō ona sa latou faia ni mea sesē, e tusa lava pe latou te faia soo na mea sesē. Sa fai ma lē gaoioi ona soo i le auala na ia finagalo ai. Ae sa faamaonia le avea o ia ma a latou uō e ala i le taulaʻi atu i o latou uiga lelei, nai lo le faapea e sesē o latou uunaʻiga. (Mareko 9:33-35; Luka 22:24-27) Nai lo le avatu faamalosi o ona lava manatu, sa ia tuu atu le avanoa e sasaa mai ai o latou manatunatuga.—Mataio 16:13-15.

E ui i nei mea uma, ae sa alofa Iesu i ana uō. (Ioane 13:1) O le ā le malosi o lenā alofa? Sa ia fetalai faapea: “E leai lava se tasi e sili atu lona alofa nai lo o lenei, o le foaʻiina atu lea e se tasi o lona ola mo ana uō.” (Ioane 15:13) Pe e mafai e se isi ona ofo atu se mea i lana uō, e tāua atu i lona lava ola?

□ Po o avea pea oe ma uō e ui ina faatigā ma faaonoono atu isi?

Sa lototele o ia ma maufaatuatuaina. Sa matuā ese mai lava Iesu i le tagata vaivai, ma le lologofie lea e faaata mai e nisi tusiata. O loo faaata mai o ia e tusi Evagelia o se tagata malosi, ma le maumauaʻi. E faalua ona tutuli i fafo e Iesu le ʻaufaatauʻoa ma a latou oloa mai le malumalu. (Mareko 11:15-17; Ioane 2:14-17) Ina ua ō atu se vaega e puʻe mai “Iesu le Nasareta,” sa ia lototele ma faailoa atu o ia, ina ia puipuia ai ona soo, ma fetalai atu ma le maumauaʻi: “O aʻu lenei, afai o aʻu lea o loo outou saʻilia, ia tuu atu i latou nei e ō.” (Ioane 18:4-9) E lētioa la, ina ua vaai atu Ponotio Pilato i le lototele o Iesu a o sauāina o ia, na ia faapea mai: “Vaai! O le tagata!”—Ioane 19:4, 5.

□ Po o e gaoioi ma le lototele faapea ma le mautinoa pe a e iloa le mea e ao ona fai?

O nei uiga ma isi uiga mataʻina na avea ai Iesu ma faaaʻoaʻoga e lelei atoatoa mo i tatou. Pe a faaavanoa i tatou ia aafia o tatou olaga i ana amioga, o le a avea i tatou ma tagata e faaleleia o tatou uiga ma sili atu ona fiafia. O le māfuaaga lenei na timaʻi mai ai le aposetolo o Peteru i Kerisiano e mulimulituʻi i tulagāaao o Iesu. Po o e taumafai e te mulimulitaʻi i le tele e mafai ai i tulagāaao o Iesu?

E Sili Atu Nai lo o se Faaaʻoaʻoga e Mulimuli Ai

Peitaʻi, e sili atu Iesu nai lo o se faaaʻoaʻoga e mulimuli i ai. Na ia fetalai mai: “O aʻu o le ala, o le upu moni ma le ola. E leai se tasi e alu atu i le Tamā pe a lē ui mai iā te aʻu.” (Ioane 14:6) E lē gata sa ia faalauiloa atu le mea moni e uiga i le Atua, ma mafai ai ona maua le ala e faalatalata atu ai iā te Ia, ae ua aumaia foʻi e  Iesu le avanoa mo ē faamaoni e maua ai le ola.—Ioane 3:16.

E tusa ma lenei vala o le māfuaaga na ia afio mai ai i le lalolagi, na fetalai mai Iesu: “E leʻi sau le Atalii o le tagata ina ia auauna mai tagata iā te ia, ae ia auauna atu, ma foaʻi atu lona ola e fai ma togiola e sui aʻi tagata e toʻatele.” (Mataio 20:28) I le faataulagaina o lona ola e avea ma togiola, sa faataatia ai e Iesu le faavae ina ia maua ai e tagata le ola e faavavau. O le ā le mea a le tagata lava ia e fai ina ia maua ai aogā mai lenei faatulagaga? Na faamalamalama mai e Iesu: “Ina ia maua le ola e faavavau, e tatau ona latou iloa lelei oe, le Atua moni e toʻatasi, atoa ma Iesu Keriso, o lē na e auina mai.”—Ioane 17:3.

Ioe, o le maua o le poto iā Iesu, mulimuli i lona soifuaga, ma le faatuatua i lona maliu faataulagaina, o mea ia e manaʻomia mo le ola e faavavau. E matou te valaaulia oe e faaalu se taimi e suʻesuʻe ai le puna o lenā poto, le Tusi Paia, ma ia tauivi e fai mea o loo fai mai le Tusi Paia e fai, e pei ona faia e Iesu. *

O loo aʻoaʻo mai e le soifuaga lelei atoatoa o Iesu i tatou i le ituaiga o tagata e tatau ona tatou iai. E mafai e lona maliu faataulagaina ona tuusaunoa i tatou mai le agasala ma lona totogi, o le oti. (Roma 6:23) E tele faanoanoaga e tatou te oo i ai pe ana lē seanoa taaʻiga malolosi a Iesu Keriso! Aua neʻi o tatou faatagaina le aafia i mea ma popolega o le olaga e aveesea ai le avanoa e iloilo ma mulimulituʻi ai i tulaga aao o le tagata silisili o ē uma na soifua mai, o Iesu Keriso.

[Faaopoopoga i lalo]

[Pusa/Ata i le itulau 7]

▪ Sa leʻi faailoga tagata Iesu ma na faaaloalo i tagata uma

▪ Sa avea o ia ma uō moni seʻia oo i le iʻuga

▪ Sa lototele o ia

Po o e taumafai e mulimuli i tulaga aao o Iesu i le tele e mafai ai?

[Ata i le itulau 5]

Sa paleni le olaga o Iesu . . .

tosina atu i ai tagata . . .

agaalofa