O se Tusi Mai Kana

Le Aso na Faalēaogāina ai Lona Fusi Uliuli

E ESE ona foliga i laʻu vaai, ma le mea na ou manatu i ai. E fai lona ofu e talaloa paʻepaʻe, ma e paee lona manava ua fusi i le fusi uliuli, e lua inisi le lautele. Ua tū o ia o loo sauni e karate, ma ua faamalō ona lima, ma tū e faava ona vae. E paū lana pupula; ua faanunumi lona muāulu a o uaʻi totoʻa atu i le mea o le a fai. Ua faapuiti ona mata, e foliga sauā ma ita, e aunoa ma se foliga palaai.

Ua ee faafuaseʻi o ia, ma puna i luga. “Iā!” Ua sasau atu lona lima ma karate le laupapa. Pa! Oka se paʻō o le gaulua o le laupapa, ma toʻulu loa i lalo. Ua puna le alii i luga ma liliu faataamilo, ua teʻi lana paga karate i le tau tonu o lana kiki ma lana karate iā te ia. Ua ou faapea ifo, oi, po o le alii lea o lea e fia suʻesuʻe i le Tusi Paia?

Ua ou laa atu loa ma velo atu loʻu lima e ma te faatalofa. “Po o oe lea o Kojo? O lea ua ou oo mai ona o loo e manaʻo e suʻesuʻe le Tusi Paia.” Ua ma faatalofa ma ua ata o ia, ua māfana ma fiafia ona foliga. Ua teʻa lana pupula sauā, ae ua fiafia mai. Ua tali mai o ia, “Ioe, o le mea tonu lava lenā ou te manaʻo ai. E ā, o afea e amata ai?”

Ua ma saofafaʻi nei i le tamaʻi polotito o lona fale, ma a ma Tusi Paia ma tusi o le suʻesuʻega. E lelei ʻī e mālū, filemu, ma lelei ai le talanoaga. Ae e toʻatolu i matou lea e iai: o Kojo, o aʻu, ma lana tamaʻi manukī. E na o le 14 inisi le umī o le manukī, o lona ulu e taufulufulua lanu mūmū, o si ana ava e paʻepaʻe, ma e foliga manaia ae malie foʻi. E mālie ma fia taalo, toe suʻesuʻe mea foʻi, ma e feosofaʻi solo i luga o ma pepa, ma seʻi ma peni, ma tuu ona tamaʻi lima i taga o ma ofutino pe maua ai sana meaʻai. Ae ua pei lava Kojo o se matua ua masani i le pisa o tamaiti, ona e lē o ano lava i le faalavelave mai o le manukī, ae uaʻi lelei mai i le talanoaga. Ua ou iloa lona naunau ona o le tele o ana fesili. E lē vave ona talitonu o ia i se mea seʻi iloga ua ia mautinoa ma ua faamaonia i le Tusi Paia, atonu o le karate ua māfua ai ona faaeteete o ia, ia aua le vave ona talitonu i se mea.

Ua solo lelei le ma suʻesuʻega. Ae a o faagasolo le taimi, ua ou vaaia ua iai se mea ua faasolo ona avea ma avega mamafa iā te ia. Ua fai mai o ia iā te aʻu, “E tasi le mea ou te fiafia i ai i lenei olaga, o le karate.” Ou te vaaia le naunau tele o lenei alii i lana faagatama, ona ua leva ona ia faia ma ua lelei tele ai o ia. Ua 26 tausaga o lona soifuaga, ma e fiafia tele o ia i le karate toe ua maoaʻe lona tomai ua oo i ai, ona ua maua lona fusi uliuli, o se tulaga e lē ʻau maua e se isi.

 Ou te lē o iloa po o le ā se filifiliga o le a faia e Kojo. Ou te lagona ua malamalama o ia, o le avea ma tama karate, ma manunuʻa ai isi i ana tuʻi ma kiki, e lē ōgatusa ma le uiga o le alofa lea e iai i Kerisiano moni, ma o loo faaalia ai le manatunatu i le lelei o isi. Ae ou te iloaina, e sili ona malosi le mana o le Afioga a le Atua, ma ua lolo i ai tagata e sili atu ona maaa o latou loto. O lea, afai e lelei le loto o Kojo, o le a faifaimālie ona pāʻia lona loto e le Afioga a le Atua. E ao lava la ona ou onosaʻi.

A o faaiʻuiʻu le ma suʻesuʻega i se isi aoauli vevela, ua ma faitauina se mau na matuā faateʻia ai lava Kojo, e pei ua kiki o ia e se isi tama karate. Ua ia faitau e faapea: “E tofotofo e Ieova i lē ua amiotonu; a ua inosia e lona finagalo lē fai amio leaga, ma lē fiafia i le faasauā.” (Salamo 11:5) Ua toe tautala lemū Kojo iā te ia lava e faapea, ‘Lē fiafia i le faasauā.” Ua sui le pupula sauā a ona mata lanu eena, ma ua ataata. Ua pupula toʻa mai iā te aʻu ma ʻata lemū. Ua fai mai o ia, “O lea ua iʻu laʻu filifiliga.”

O lea ua ma galulue faatasi ma Kojo i le galuega e sili ona ma fiafia i ai, i le avea o i maʻua ma faiaʻoga tauofo e suʻesuʻe ma tagata uma e fia faalogo i le Tusi Paia, e aunoa ma se totogi. O le taeao la lenei, ua ma ō atu e talanoa ma se alii e igoa iā Luka, ona sa faia muamua se fuafuaga e matou te talanoa ma ia .

E ma te oso atu i le maketi i le auala e pisi ma tumutumu, agaʻi i le fale o Luka. E faitau selau faleoloa ma tagata e faatau a latou oloa i autafa o le ala: o pepa feū lanu mūmū ma lanumeamata, ato tamato pula, o faaputuga fualaau faisua e taʻu o le okra, ma leitiō, faamalu, fasimoli, o lauulu faapipii, o ulo ma mea faimeaʻai, ma faaputuga o ofu ma seevae na faaaogā muamua. O loo feoaʻi solo teine e ave pesini alamini lapopoʻa i luga o latou ulu, ua tumu i meaʻai susua e faatau atu. Ua latou feoaʻi i le va o tagata e faatau atu supo ma sitiū manogi, e fai i iʻa faalā, paa, ma sisi. Ua pisapisaō ai foʻi maile, ʻoti, ma moa i talaane o vae o tagata. Ua leotetele leitiō, faaʻeʻē ma pu o taavale, ma vāvāō ma tagata.

Ua ma tuua le taulaga ma le pisapisaō, ae ui atu i se ala pefu e tau atu i se fale tuai o loo iai le faailoilo: “Nofoaga e Mālōlō Ai.” O loo tū Luka i le faitotoʻa, o ia o se tauleʻaleʻa e faatinoiti, e 20 ma ona tupu tausaga o lona matua, ma valaau mai e ma te ō atu i totonu i le paolo. E tumu lona fale i ato ma pusa ua teu ai laulaau ma aa o laau ua sai faatasi i manoa, ma paʻu o ogālaau, o mea e fai ai vai a le uso o lona tinā, o ia o se tinā ua matua. E poto lenei tinā e palu vai faapitoa e aogā i maʻi, ona o mea ua ia iloa mai i tupulaga a lo latou aiga ua fāi atu. Ua ma vaaia mea e iloa ai le faatalitalia o i maʻua e Luka. Ona ua uma ona tapena le potu, ma sauni nofoa laupapa e tolu e matou te nonofo ai. Ua matou nonofo felataʻi, ma amata loa le suʻesuʻega o le Tusi Paia.

Ua fai e Kojo le suʻesuʻega a Luka. Ae ou nofo ma faalogologo a o la talanoa i faamatalaga mai le Tusi Paia i le pogai o le tele o mafatiaga i le lalolagi. Ina ua aapa atu Kojo e faasino le mea e maua ai le mau iā Luka, ua ou mataʻi le suʻe lemū e ona lima malolosi o laupepa manifinifi o le Tusi Paia. Ona ou toe manatua loa lea, e leʻi leva talu ai nei ona ia faaaogā ona lima e karate ai. Ae o le mana o le Afioga a le Atua, ua suia ai nei ia uiga leaga o loo masani ai le lalolagi lē pulea, i uiga alofa. E leai se isi mea ua mafaia ona fai e se tagata e sili atu ona tāua i lo lea.

A o ma agaʻi atu i o ma aiga, ua ma talaʻi atu i se alii o loo nofonofo i le paolo o se mago. Ua faalogo lelei mai o ia a o faitau atu e Kojo le Tusi Paia. Ina ua iloa e le alii o maʻua o Molimau a Ieova, ua tū vave i luga, ma ʻeʻē mai ma le ita, “Ou te lē fiafia iā te outou.” E na o se sekone na ou vaaia ai le teʻi o Kojo pei ua ita. Ona toe teʻa lea o lona ita, ae faamavae ma le faaaloalo i le tamāloa. Ua ma savavali ese.

A o faaauau le ma savaliga, na sōsō mai Kojo ma fai mai i se leo lemū: “Oka le sapotuvale o le tātā o loʻu fatu i le tala a le tamāloa. Ae e te iloa, e leai ma se faigatā o loʻu tagolima i ai, a ea?” Ua ou ʻataʻata ma tali atu, “Ioe, o lea ou te iloa.” Ua ʻataʻata mai o ia ma faaauau le ma savaliga.