Na Maua le Upu Moni Ona o Saʻiliʻiliga mo Talitonuga Sesē

Ua Faamatalaina e R. Stuart Marshall

“Tatou te lē talanoa i Molimau a Ieova,” o le tala lea a le patele. “Ona e faaaogā e latou le Tusi Paia.” Na faateʻia aʻu i lana tala ona na ou talosaga i ai e faasino i loʻu toʻalua mea e sesē ai aʻoaʻoga a Molimau a Ieova. Na ou filifili loa lea e matou te suʻesuʻe ma Molimau a Ieova, ona ou faasino lea i loʻu toʻalua, mea e sesē ai a latou aʻoaʻoga.

O LE 43 o oʻu tausaga na ou filifili ai e taʻu le sesē o aʻoaʻoga a Molimau a Ieova, e ala i le faaaogā o loʻu poto i mataupu o le mafaufau lelei ma talitonuga faalotu. Mai vasega maulalo seʻia oo i iunivesite, sa ou aʻoga i aʻoga Katoliko. Ae e aunoa ma se aʻoga o na aʻoga Katoliko na aʻoaʻoina ai le Tusi Paia, e ui na maua loʻu tikeri (bachelor) i mataupu tau tamaoaiga i le 1969, ma ave foʻi aʻu mataupu e uiga i filosofia ma talitonuga o le lotu.

Ina ua ou iʻu mai le iunivesite, na ma faaipoipo ma Patricia McGinn, ma e lotu Katoliko foʻi o ia. Ona ma toe aʻoʻoga lea e suʻe o ma tikeri maualuluga (doctorate) i le Iunivesite o Stanford. Na fanau le ma tama tama o Stuart i le 1977, ma o Sacramento na matou faamautū ai, i Kalifonia i Amerika. E 23 tausaga o oʻu faigaluega i le Ofisa Faufautua mo le Fono Faitulafono a Kalifonia, i le iloiloina o aafiaga i tupe maua a le setete ona o tupe faaalu i aʻoga. Sa ou galue malosi ma na manaia loʻu olaga. Na ou fiafia e fai laʻu matafaioi o se tamā i loʻu atalii, a o tuputupu aʻe o ia. Na sili ona lagolagoina aʻu e si aʻu avā pele, ma na ou lagolago foʻi iā te ia.

E 25 Sene le Tau o le Tali

I le taimi a o lua tausaga o le ma tamaitiiti, na maua mai se Tusi Paia a Patricia mai Molimau a Ieova, ma amata ona suʻesuʻe ma i latou. Na papatiso o ia i le tolu tausaga mulimuli ane ai. Na iā te aʻu le manatu, e lē o lautele le vaaiga a Molimau a Ieova e tusa o aso faamanatu ma le tuiina o le toto, ae o isi o latou talitonuga na mautinoa lava e moni. O le mea na teʻi lava ua ou faia, na iai se aso i le 1987 na ou faaalia ai lenei manatu, ina ua ou tulaʻi e avatu se faamatalaga i le fono faapitoa a le ʻaufaitulafono e gafa ma aʻoaʻoga i le matou setete, ona o se fautuaga na ou faia i ai.

Na manaʻo le Iunivesite o Kalifonia i se tupe ina ia mafai ai ona tauvā ma isi setete, ia maua ai le galuega faapitoa a le malo, e ono piliona talā lona tau. O lea galuega, o le fauina lea o se masini e sili ona telē e fai ai saʻiliʻiliga faasaienisi. O laʻu fautuaga na fai i ai, e aua le avea se tupe i le iunivesite, ona e lē tele se aogā o lea taumafaiga i le tamaoaiga o le setete. Ae na aumai e le iunivesite alii atamamai e toʻalua, o ē maua le faailoga faapitoa i lea tomai (Nobel), e  avatu se faamatalaga i le ʻaufaitulafono. Na faamatala e nei alii le malamalama o le a maua mai ai. Na fai mai le isi o le a iloa ai pe na faapefea ona iai le vateatea. Ae na fai mai le isi o le a malamalama ai i le auala na amata ai ona iai meafaiola i lo tatou paneta.

Na liliu mai le taʻitaʻifono o le komiti ma faapea mai iā te aʻu.

“O le ā sou manatu, ua telē tele le ono piliona talā e tau saʻili ai tali o nei fesili?”

Na ou tali atu: “E moni, o nei fesili e tāua tele. Ae i taeao o aso Toonaʻi, e ō mai ai Molimau a Ieova i loʻu fale ma aumai mekasini mo se meaalofa faatauvaa e na o le 25 sene, ma e maua ai tali o na fesili. Ma o ai na iloa, atonu e sili atu tali e maua i le mekasini e 25 sene, i lo tali e maua mai i lenei galuega e ono piliona talā.”

Na toē uma tagata na iai i le fono, faapea ma alii atamamai. Ae e aunoa ma se isi na tetee i loʻu manatu, e ui na ioe le komiti o le ʻaufaitulafono ia ave le tupe i le iunivesite ina ia fai ai le galuega.

A o faagasolo le taimi, na tulaʻi mai se faafitauli i loʻu aiga na manaʻomia ona ou uaʻi atu i ai. Ua ono tausaga o ma talanoa pea ma Patricia e uiga i le Tusi Paia ma Molimau a Ieova, ae na ou lagona le faanoanoa ona ua manaʻo o ia, ia tele lona taimi i le galuega talaʻi. O lona uiga o le a faaitiitia lona taimi faigaluega i le iunivesite. Na ou lagona le lē fiafia ona e foliga mai o ia o se tagata atamai ae e ese le sini lea ua ia faia, ma e aunoa ma se upu po o se mea ou te mafaia e sui ai lona mafaufau.

Sa ou taumafai e saʻili se fesoasoani mai se tagata atamai, o se isi e sili lona iloa o le Tusi Paia i lo aʻu, ma e faigofie iā te ia ona faailoa mai mea e feteenaʻi ai aʻoaʻoga a Molimau a Ieova ma le Tusi Paia. Afai ae mafai ona faamaonia le sesē o se talitonuga se tasi o Molimau a Ieova, atonu la e masalomia foʻi isi talitonuga ua latou aʻoaʻoina. O le mea tonu lava lea e manaʻomia e faatalitonu ai loʻu toʻalua, ona o le auala lenā e mafaufau ai o ia. O lea, na ou faafesootaʻi le patele o le lotu lea na ma lolotu muamua ai ma Patricia. O upu o loo tomua ai lenei mataupu, o upu faaiʻu na o le ma talanoaga. Ina ua musu le patele e talanoa i loʻu toʻalua, na ou faapea ane, o aʻu lava la e tatau ona suʻeina le sesē o Molimau ma faasino iā Patricia, e ui o le a fai si umi o le taimi a o oʻu tau suʻesuʻe i ai.

O Aʻu Saʻiliʻiliga mo Talitonuga Sesē

O le mea na sili ona mataʻina iā te aʻu a o matou suʻesuʻe i le Tusi Paia ma Molimau a Ieova, o valoaga o loo iai. Na ou faitau i le tusi a le perofeta o Isaia i le paʻū o Papelonia, na  tusia e tusa o le 200 tausaga a o leʻi tupu, na taʻu mai ai o Kuresa o le a faatoʻilaloina Papelonia, ma faamatala mai le auala o le a faamātū ai le vaitafe o Eufirate, e ala atu ai le faatoʻilaloina o Papelonia. (Isaia 44:27–45:4) I tausaga ua leva muamua atu, na ou suʻesuʻe ai i le aʻoga i faiga faavaegāʻau e uiga i le paʻū o Papelonia. Na ou aʻoaʻoina foʻi, na muaʻi valoia e Tanielu i le silia ma le 200 tausaga, mea e faatatau i se tupu malosi o Eleni, o lona malo o le a vaevaeina i malo e fā pe a maliu o ia, ae e lē tutusa lo latou malosi ma ia. (Tanielu 8:21, 22) O mea ia na ou manatua e uiga iā Alesana le Sili mai aʻu suʻesuʻega i talafaasolopito anamua. Na ou suʻe i lomifefiloi eseese ina ia faamautinoa ai, o nei tusi o le Tusi Paia, na tusia a o leʻi tutupu mea na valoia.

O le tele o loʻu suʻesuʻe ma Molimau a Ieova, o le tele foʻi lea o loʻu mautinoa, o le Tusi Paia o le Afioga lea a le Atua, ae e leʻi faapea soʻu mautinoa na iai i le tele o tausaga o oʻu suʻesuʻe i talitonuga Katoliko. O le ā nei o le a ou faia e tusa o le poto lea ua ou maua? Na ou filifili loa ia tuuina atu loʻu ola iā Ieova ma avea ma ana Molimau. (Isaia 43:10) Na ou papatiso i le 1991, ma na atoa tonu ai lava le lua tausaga talu ona ma talanoa ma le patele. Na papatiso le ma tama tama i le tausaga na sosoo ai.

Na sui sini o le matou aiga, ona o lea ua sui mea e tāua iā i matou. Ina ua uma ona ou papatiso, o se mea na ou muaʻi faia, o se fuafuaga lea ina ia mafai ona tuua e loʻu toʻalua lana galuega i totonu o le lima tausaga, pe a atoa lona 50. Na manaʻo o ia e fai lana paeonia, o se tagata e talaʻi mo le 1,000 itula i le tausaga, po o le 83 itula i le masina, e fesoasoani ai i isi ia iloa le upu moni. E oo ane i le 1994, ua mafai ona amata lana paeonia, ona ua tipi ona itula faigaluega. Ae o oʻu sini na amata ai, o le faaleleia lea o laʻu faiva, ma fesoasoani i le faapotopotoga i se mea ou te mafaia, faapea loʻu ofo atu e avea ma suʻetusi i galuega faufale o Maota mo Sauniga i le matou vaipanoa.

Na maua oʻu avanoa i le galuega e talanoa ai e uiga i le Tusi Paia. Na iai se tamaʻitaʻi e fou mai i le matou ofisa, o ia o se Molimau a Ieova ua lē o toe ola e tusa ma ona talitonuga. Na faavaivaia lona faatuatua ona e lē o talitonu atoatoa o ia i le moni o le Tusi Paia. Na ou fiafia e fesoasoani iā te ia ina ia toe lelei le la faiā ma Ieova. Na toe foʻi o ia i lona aiga ma amata ona paeonia.

I le 1995, na ou auai i se fono faapitoa a le komiti e gafa ma aʻoaʻoga, e tusa o saʻiliʻiliga a le Malo. Na fesili le taʻitaʻifono i le sui o le malo po o le ā ua tupu i le galuega faapitoa a le malo. Na tali le sui o le malo, na maua e le setete o Texas, ae e tolu māfuaaga ua lē mafai ai ona faauma. Muamua lava, a o leʻi amataina le galuega, na sii le tau o le galuega mai le ono piliona talā i le iva piliona talā. Lona lua, na manaʻo le malo e ave le tupe e faaaogā i isi mea, aemaise lava le taua i Iraq i le 1991. Lona tolu, ua latou iloaina, e maua le tali o nei fesili tāua o le olaga mai Molimau a Ieova mo le na o le 25 sene! Ioe, e foliga mai, o laʻu faamatalaga lea na fai i le amataga, ua soo i fono a komiti ma toe foʻi mai.

Na toē uma tagata, ma na tilotilo mai le isi vaega o le komiti iā te aʻu. Na ou taʻu i ai le tulaga lea ua iai e faapea, “Pe a tou faitau i ai i aso nei, o lea ua mafai ona maua fua le tali.”

Se Olaga Pisi ma Faamalieina

Ina ua litaea loʻu toʻalua, ona fai foʻi lea o se fuafuaga mo aʻu, e faatino i le lima tausaga. Na ou fesilisili solo i isi matagaluega pe maua ai saʻu galuega faavaitaimi ona ou te manaʻo ia tele loʻu taimi e aʻoaʻo ai upu moni o le Tusi Paia i isi. Na faateʻia aʻu ona na ofo mai e laʻu galuega se avanoa, e faaitiitia ai oʻu itula faigaluega. O lea, i le 1998, na amata ai foʻi laʻu paeonia.

I le isi taeao a o ma sauni ma loʻu toʻalua e ō atu i le talaʻiga, na telefoni mai ai le ofisa ulu o Molimau a Ieova i le Iunaite Setete i Brooklyn, Niu Ioka. Ua vili mai e tusa ai ma se saʻiliʻiliga na faia muamua, pe faamata ou te  fia galue i se galuega e faia i Brooklyn. Na ou ioe i ai ma le mautinoa. O lea, e 18 masina o ma galulue i le ofisa ulu. Na ou vave litaea mai le setete o Kalifonia, ina ia mafai ona faauma le galuega i Brooklyn. Ona uma lea ae ma tauofo i le fauina o le Maota mo Fonotaga a Molimau a Ieova i Fairfield i Kalifonia. Na faatau atu le ma fale i Sacramento ma siitia i Palo Alto i se nofoaga e laʻitiiti. Na faaopoopo mai foʻi ma isi faamanuiaga ona ua vave ona ou litaea. Na mafai ai ona ma galulue i le tele o isi galuega a lālā o Molimau a Ieova i Nigeria, Aferika i Saute, Kanata, Peretania, ma Siamani.

Ua ma maua le olioli e ala i le fesoasoani i isi ia iloa le upu moni mai le Tusi Paia, e pei lava o Molimau ia na fesoasoani mai iā i maʻua. Ua ou mautinoa lava, e sili atu ona tauia le aʻoaʻoga a Ieova i aʻoaʻoga maualuluga uma ua ou aʻoga ai. E leai se isi aʻoaʻoga e mafai ona faatusa i ai, i le lautele ma aogā o mataupu ua aʻoaʻoina ai. Ua aʻoaʻoina e Ieova ana Molimau ia aʻoaʻo atu le upu moni o le Tusi Paia ina ia pāʻia mafaufau ma loto o tagata. Ma ua uunaʻia ai aʻu ia saga suʻesuʻe pea. E ma te lagona pea le faafetai ona o le olaga lea ua iai ma le avanoa ua maua e faaaogā ai aʻoaʻoga ua ma maua e auauna ai iā Ieova le Atua, o ia o le Silisili Ese i le aoao o mea.

[Faamatalaga faaopoopo i le itulau 27]

O le mea na sili ona mataʻina iā te aʻu a o suʻesuʻeina le Tusi Paia ma Molimau, o valoaga o loo iai

[Ata i le itulau 27]

Ma Patricia i le aso o le ma faaipoipoga

[Ata i le itulau 29]

E ma te fiafia e fesoasoani i isi ia iloa upu moni o le Tusi Paia