Ua Fesili Mai le ʻAufaitau

Pe Talia e Molimau a Ieova le Feagaiga Tuai?

E manatu Molimau a Ieova i le Tusi Paia o le Afioga a le Atua, ma e latou te taliaina le Feagaiga Tuai ma le Feagaiga Fou o vaega tāua o le Tusi Paia. Ae e latou te mananaʻo e faaaogā taʻu e pei o “Tusitusiga Eperu” ma “Tusitusiga Kerisiano Eleni,” auā o le gagana Eperu ma le Eleni, o gagana autū ia sa tusia ai le Feagaiga Tuai ma le Feagaiga Fou.

Peitaʻi, ua mumusu nisi ua faapea mai o Kerisiano e talia le Feagaiga Tuai. E latou te fai mai o loo faamatalaina ai se Atua e ita, e fiafia i taua, e fasioti tagata, o gaoioiga e lē ōgatusa ma se Atua alofa ma lelei lea o loo taʻu mai i le Feagaiga Fou. Ua latou fai mai foʻi ona o le Feagaiga Tuai e tele ina faatatau atu i lotu faa-Iutaia, e lē tāua la mo Kerisiano. Ae peitaʻi, pe a fua atu i le poloaʻiga a le Atua o loo faamauina i le Teuteronome 12:32, ia aua neʻi faaopoopo se mea pe aveese se mea mai lana afioga, pe faamata la ua avea na manatu ma māfuaaga e teena ai le 75 pasene o le Tusi Paia atoa?

I se vaitaimi i le 50 T.A. ina ua asiasi atu le aposetolo Kerisiano o Paulo i tagatānuu o Tesalonia, i Eleni, na ia “fetufaaʻi ma i latou i Tusitusiga Paia, ua ia faamatala atu ma faamaonia e ala i mea ua tusia, e tatau ona tigāina le Keriso ma toe faatūina mai le oti.” (Galuega 17:1-3) O nisi na faalogologo iā te ia sa avea ma Kerisiano, ma na mulimuli ane faamālō atu Paulo iā i latou i le faapea atu: “Ina ua outou maua le afioga a le Atua, lea na outou faalogo ai mai iā i matou, ona outou talia lea, e lē o le upu a tagata, ae o le mea moni, o le afioga a le Atua.” (1 Tesalonia 2:13) I le taimi na ia asiasi atu ai, e foliga mai e na o le Evagelia a Mataio na tusiaina mai i tusi e 27 o Tusitusiga Kerisiano Eleni. O lona uiga la, o “Tusitusiga Paia” lea sa masani ona faaaogā e Paulo e faamaonia ai “e ala i mea ua tusia,” e foliga mai o tusi mai Tusitusiga Eperu.

O le mea moni, pe tusa e 320 taimi o loo faasino tuusaʻo atu ai tusitala o Tusitusiga Kerisiano Eleni i tusi o loo i Tusitusiga Eperu, ae pe tusa ma le 890 taimi e lē o faasino tuusaʻo atu ai. Aiseā? “Auā o mea uma na tusia i aso ua mavae, na tusia e faatonu ai i tatou, ina ia tatou maua le faamoemoe e ala i lo tatou tumau, ma le faamāfanafana mai o Tusitusiga Paia.” (Roma 15:4) Ua faailoa manino mai e lenei manatu, o i latou uma e talia le Tusi Paia atoa, e tele aogā latou te maua.

E ala i le faavae na faataatia e Tusitusiga Eperu, o Tusitusiga Kerisiano Eleni, o se faaauauina lea o le Afioga a le Atua ona o loo faailoa faasolosolo mai ai fuafuaga a le Atua. E latou te lē o faaitiitia le tāua o Tusitusiga Eperu. Na finau mai Herbert H. Farmer, o se polofesa o mataupu faalotu i le Cambridge University, e faapea o Evagelia, “e lē mafai ona malamalama pe ana leai mea na tutupu i tagata i lalo o le feagaiga o le Tulafono lea o loo faamauina i le Feagaiga Tuai.”

E lē manaʻomia ona toe suia le Afioga a le Atua. Peitaʻi, “o le ala o ē amiotonu, e tusa ia ma le malamalama o le ao, o loo tupu pea lona malamalama e oo i le tutonu o le lā.” (Faataoto 4:18) E ala i le faaopoopo o Tusitusiga Kerisiano Eleni i tusi ua faamaonia o le Tusi Paia, ua faamalamalamaina faasolosolo ai e le Atua le auala e faataunuu ai lana fuafuaga, e aunoa ma le faaitiitia o le tāua o Tusitusiga Eperu. O na tusitusiga uma o ni vaega o ‘afioga a Ieova, lea e tumau e faavavau.’—1 Peteru 1:24, 25.