Ua Fesili Mai le ʻAufaitau

Aiseā ua Lē Taliina ai Nisi o Tatalo?

E faigofie ona faalatalata atu tagata i le Atua. E pei ona manaʻo se tamā alofa e saʻoloto ona talanoa atu lana fanau iā te ia, e faapena foʻi ona finagalo Ieova le Atua e tatou te tatalo atu iā te ia. Ae i le taimi e tasi, i le pei lava o se tamā atamai, e iai māfuaaga lelei e lē taliina ai e le Atua nisi talosaga. Po o natia e le Atua ana māfuaaga mai iā i tatou po ua faamalamalamaina mai i le Tusi Paia?

Ua taʻu mai e le aposetolo o Ioane e faapea: “O le mea lenei ua tatou mautinoa ai i le Atua, po o ā lava mea tatou te talosaga atu ai e tusa ma lona finagalo, e faafofoga mai lava o ia iā i tatou.” (1 Ioane 5:14) E tatau ona ōgatusa a tatou talosaga ma le finagalo o le Atua. O nisi o loo tatalo mo mea e mautinoa lava e lē faafinagaloina e le Atua—o se faaaʻoaʻoga, o le tatalo ia mālō i se lūlū po o se petipetiga. O isi e sesē le faanaunauga ua latou tatalo ai. Na lapataʻi mai le soo o Iakopo e faatatau i na ituaiga tatalo, i le faapea mai: “Ua outou ōle atu a ua outou lē maua, auā e sesē le māfuaaga ua outou ōle atu ai, ina ia faamalieina o outou tuʻinanauga o le tino.”—Iakopo 4:3.

O se faataʻitaʻiga, seʻi faapea o loo tatalo ni ʻautaaalo soka se lua mo le manumalo. E lē o se mea talafeagai le faatalitalia o le Atua o le a ia taliina na tatalo feteenaʻi. E faapena foʻi le tulaga e faatatau i faigātaua i aso nei pe a tatalo uma ʻautau e lua mo le manumalo.

E lē tatau ona faatalitalia e taliina tatalo a i latou e mumusu e mulimuli i tulafono a le Atua. Sa iai le taimi na fetalai ai Ieova i ē tapuaʻi ma le lē faamaoni e faapea: “E ui lava ina outou faateleina tatalo, ou te lē faalogo ai lava; ua tutumu o outou lima i le toto.” (Isaia 1:15) O loo taʻua i le Tusi Paia: “O lē ua liliu ese ona taliga a e lē faalogologo i le tulafono, e inosia lana lava tatalo.”—Faataoto 28:9.

Ae i le isi itu, e masani ona faafofogaina e le Atua tatalo a tagata tapuaʻi faamaoni o ē o loo faia mea latou te mafaia, e auauna atu ai iā te ia e tusa ma lona finagalo. Po o le uiga o lenā manatu o le a ia taliina a latou talosaga uma? E leai. Seʻi manatu i nisi o faaaʻoaʻoga faale-Tusi Paia.

Sa matuā māfana le faiā a Mose ma le Atua; peitaʻi, sa tatau ona ia ōle atu e ‘tusa ma le finagalo o le Atua.’ I le feteenaʻi ma le fuafuaga ua faia a le Atua, sa ōle atu Mose mo se faatagaga e ulu atu ai i le nuu o Kanana: “Ou te ʻaiʻoi atu iā te oe seʻi oʻu alu atu ou te matamata ai i le nuu lelei o i tala atu o Ioritana.” Ae ona o lana agasala na fai, na taʻu atu ai iā Mose o le a lē mafai ona ulu atu o ia i lenā nuu. O lona uiga, nai lo le taliina o le talosaga a Mose, na fetalai atu le Atua iā te ia: “Soia, aua lava e te toe fai mai se upu iā te aʻu i lea mea.”—Teuteronome 3:25, 26; 32:51.

Sa tatalo foʻi le aposetolo o Paulo mo se mapusaga mai le “mea matuitui i le tino.” (2 Korinito 12:7) O lenei “mea matuitui,” atonu sa faasino atu i se tigā ona o le faalētonu o le vaai po o se tofotofoga faifai pea mai tagata tetee ma “uso pepelo.” (2 Korinito 11:26; Kalatia 4:14, 15) Na tusi Paulo e faapea: “Na ou ʻaiʻoi faatolu ai i le Alii, ina ia aveese lenei mea mai iā te aʻu.” Peitaʻi, na silafia e le Atua pe afai e faaauau pea ona talaʻi Paulo e ui i lenā “mea matuitui i le tino,” o le a faaalia manino mai ai le mana o le Atua ma le malosi o le faatuatua o Paulo iā te Ia. Nai lo le taliina o le ʻaiʻoiga a Paulo, na fetalai atu le Atua iā te ia: “Ua faaatoaina loʻu mana i vaivaiga.”—2 Korinito 12:8, 9.

O le mea moni, e sili atu le silafia o le Atua nai lo i tatou pe faamata o mea o loo tatou ōle atu ai e mo lo tatou lelei. E tali mai pea Ieova mo lo tatou lelei, e tusa ai ma ana fuafuaga alofa o loo faamauina i le Tusi Paia.