E te Silafia?

Pe na iai se māfuaaga e fefe ai Ponotio Pilato iā Kaisara?

Ina ia faamalosia le Kovana Roma o Ponotio Pilato e fasiotia Iesu, na faapea atu taʻitaʻi lotu Iutaia: “Afai e te faasaʻolotoina lenei tagata, e lē o oe o se uō a Kaisara.” (Ioane 19:12) O “Kaisara” lea o loo taʻua i inei o le Emeperoa Roma o Tiperio. Pe iai se māfuaaga e ono fefe ai Pilato iā Kaisara?

O le ā le ituaiga tagata na iai Tiperio Kaisara? I le tele o tausaga a o leʻi faamasinoina Iesu, na avea Tiperio ma se “tagata e foliga mai e naunau e faamalieina ona lava tuʻinanauga, e tusa lava po o ā auala mataʻutia e faamalieina ai,” o le faamatalaga lenā a le The New Encyclopædia Britannica. Ona o lona masalosalovale ma le lē mautonu, sa uunaʻia ai o ia e sauāina ma fasiotia so o se tagata na masalomia e fouvale. Na taʻua atili mai e faapea, “Afai e moni tala a le ʻautusitala o talafaasolopito i vaitaimi o Tiperio, o ana faafiafiaga e sili ona fiafia i ai e sauā toe matagā. E oo lava i aso lelei, e na te matuā fasiotia so o se tagata, i so o se taimi i le auala e manaʻo i ai.”

O lea la, e foliga mai na lolo atu Pilato i uunaʻiga a taʻitaʻi lotu Iutaia e fasiotia Iesu, ona o lona fefe i le talaaga ma le ituaiga tagata e iai Tiperio.—Ioane 19:13-16.

Aiseā na mulumulu ai e Iesu vae o ona aposetolo?

I Isaraelu anamua, e toʻatele tagata e feoaʻi solo i a latou feʻau masani e leai ni seevae. O seevae na faaaogā e i latou na iai seevae, e pei o seevae tosotoso ae e iai fusi. Ona e pefu ma palapalā laufanua ma auala, e mautinoa la o le a palapalā foʻi vae o tagata.

O lea la, o se tū masani mo tagata le aveesea o latou seevae a o leʻi ulufale atu i se fale. Sa manaʻomia e se aiga talimālō ona fufulu vae o mālō. E faia lenei galuega e le tagata o le aiga po o se auauna. E tele tala o loo i le Tusi Paia e faasino atu i lenei faiga masani. O se faaaʻoaʻoga, na faapea atu Aperaamo i ē na asiasi atu i lona faleʻie: “Seʻi aumaia sina vai e mulumulu ai o outou vae, ma outou mālōlō i lalo o le laau; ou te au mai foʻi sina mea e ʻai ia faamalosi ai o outou loto.”—Kenese 18:4, 5; 24:32; 1 Samuelu 25:41; Luka 7:37, 38, 44.

Ua manino nei le māfuaaga na mulumulu ai e Iesu vae o ona soo, i lana Paseka mulimuli ma i latou. I le taimi lenā, e leʻi iai se isi o le aiga po o se auauna e faia lenei galuega, ma e foliga mai e leʻi manaʻo se isi o le ʻausoo e faia lenā gaoioiga. O le faaaogāina la o se pesini vai ma se solo e solo ai vae o ona aposetolo, sa aʻoaʻo ai e Iesu i nei tane se lesona i le alofa ma le lotomaulalo.—Ioane 13:5-17.