Ua Fesili Mai le ʻAufaitau

Aiseā e Lē Faaaogā ai e Molimau a Ieova Faatusa i a Latou Tapuaʻiga?

I le lalolagi atoa, e manatu lotu Hinitū, Puta, Katoliko, ma tagata o le Lotu Orthodox i le faaaogāina o tupua ma faatusa, o se vala tāua o la latou tapuaʻiga. I nisi vaega o Aferika, e faaaogā e tagata i a latou tapuaʻiga se laau po o se maa ua vaneina, lea e faapea e nofo ai se atua po o se agaga o se atua.

Peitaʻi, o Molimau a Ieova, e latou te lē faaaogāina so o se tupua po o se faatusa i a latou tapuaʻiga. Pe a outou asiasi atu i Maota e fai ai a latou sauniga, e te lē vaaia ai ni faatusa o se sagato, po o se faatusa o Iesu po o Maria. * Aiseā? Seʻi tagaʻi foʻi i mea o loo fai mai ai le Tusi Paia e uiga i lenei mataupu.

O le ā sa Manaʻomia e le Atua Mai i Tagata Isaraelu?

Ina ua faasaʻolotoina e Ieova le Atua Isaraelu mai Aikupito, sa ia avatu iā i latou faatonuga manino i le auala e tapuaʻia ai o ia. O loo taʻua i le tulafono lona lua o Tulafono e Sefulu e faapea: “Aua e te fai mo oe se tupua ua tā, po o se faatusa lava o se mea o i le lagi i lugā, po o i le fanua i lalo, po o i le sami o i lalo o le fanua; aua e te ifo i ai, aua foʻi e te auauna i ai; auā o aʻu o Ieova lou Atua, o le Atua fuā, o lē taui atu i fanau o le amiolētonu a o latou mātua, e oo i le tupulaga e tolu ma le fā o ē ʻinoʻino mai iā te aʻu.”—Esoto 20:4, 5.

Ae o le taimi lava na tuuina atu ai e le Atua nei faatonuga iā Mose, na faia ai e tagata Isaraelu se tamaʻi povi auro, atonu e faataʻitaʻi ai i tapuaʻiga i manu a tagata Aikupito. E latou te leʻi faaigoa le tupua i le igoa o se atua Aikupito. Nai lo lea, sa latou faia e tapuaʻi atu ai iā Ieova. (Esoto 32:5, 6) O le ā sa faia e Ieova? Sa matuā toʻasā le Atua iā i latou na tapuaʻi i lenā tupua, ma sa faaleagaina e Mose lenā tupua.—Esoto 32:9, 10, 19, 20.

Mulimuli ane, ona toe faamalamalama atili atu lea e Ieova le Atua le tulafono lona lua. E ala atu iā Mose, na faamanatu atu ai e le Atua i tagata Isaraelu, e lē tatau ona latou faia “se tupua ua tā, o le faatusa o se tupua e tasi, o le faatusa o se tane, po o se fafine; o se faatusa o se tasi manu e tataa, o se faatusa o se manu lele e lele i lugā, o se faatusa o se tasi mea e totolo i le eleele, po o se faatusa o se tasi iʻa o i le sami i lalo o le laueleele.” (Teuteronome 4:15-18) E manino lava le faatonuga, sa lē tatau i tagata Isaraelu ona faaaogā faatusa po o so se isi lava ituaiga o mea e tapuaʻi ai i le Atua.

Peitaʻi, na ifo i tupua Isaraelu. Ina ia toe faasaʻoina i latou, na auina atu e Ieova perofeta e lapataʻia i latou i le faasalaga ogaoga ona o lo latou tapuaʻi i tupua. (Ieremia 19:3-5; Amosa 2:8) Sa lē amanaʻia e le nuu o Isaraelu lapataʻiga a le Atua. O lea la, i le 607 T.L.M., na faataga ai e Ieova Papelonia e faaumatiaina Ierusalema ma ave faatagataotauaina i latou i lenā nuu.—2 Nofoaiga a Tupu 36:20, 21; Ieremia 25:11, 12.

 O le ā sa Talitonu i ai Kerisiano i le Uluaʻi Senituri?

Ina ua liliu ē e lē o ni Iutaia e avea ma Kerisiano i le uluaʻi senituri, latou te leʻi toe faaaogāina tupua i la latou tapuaʻiga i le Atua. Mātau le faamatalaga a Temetiu, o se tagata fai mea siliva na fausiaina tupua i Efeso, na fai e faatatau i le talaʻiga a le aposetolo o Paulo: “Alii e, ua outou iloa lelei o le pisinisi lenei ua tatou manuia ai. Ua outou vāai ma faalogo foʻi, ua faatalitonuina e Paulo le toʻatele o tagata i Efeso ma toetoe lava o le itumalo atoa o Asia, ma ua ia faaliliuina i latou i se isi talitonuga, ma ua ia faapea mai e lē o ni atua mea ua faia i lima.”—Galuega 19:25, 26.

Na faamaonia i upu a Paulo le sesē o le tuuaʻiga a Temetiu. Ina ua ia tautala atu i tagata Eleni i Atenai, na faapea atu Paulo: ‘⁠E lē tatau ona tatou manatu ua tusa le Atua i se mea ua vaneina i le auro, po o le siliva, po o le maa lea ua faia i le poto ma le atamai o tagata. E moni, sa faapalepale le Atua i lo latou valea, a o le taimi nei, ua ia faatonuina tagata uma lava ina ia salamō.’ (Galuega 17:29, 30) I le mataupu lava lenei, sa tusi atu Paulo i ē na i Tesalonia ma faamālō atu iā i latou i upu nei: ‘Ua outou liliu atu i le Atua mai i tupua.’—1 Tesalonia 1:9.

E lē gata o Paulo, ae sa lapataʻia foʻi e le aposetolo o Ioane ia Kerisiano e faatatau i le faaaogāina o faatusa i a latou tapuaʻiga. I le faaiʻuga o le senituri muamua, na taʻu atu ma le maumauaʻi e Ioane iā i latou: “Ia leoleo outou mai i tupua.”—1 Ioane 5:21.

E usiusitai Molimau a Ieova i le faatonuga manino a le Atua e faapea, e lē tatau ona faaaogā so o se ituaiga faatusa i vala uma o le tapuaʻiga iā te ia. E latou te usiusitai iā Ieova le Atua e tusa ai o lana fetalaiga: “O aʻu o Ieova, o loʻu igoa lea; o loʻu mamalu foʻi ou te lē avatua lea i se tasi, ma loʻu viiga ou te lē avatua i tupua ua tā.”—Isaia 42:8.

[Faaopoopoga i lalo]

[Faamatalaga faaopoopo i le itulau 31]

“O aʻu o Ieova, o loʻu igoa lea; o loʻu mamalu foʻi ou te lē avatua lea i se tasi, ma loʻu viiga ou te lē avatua i tupua ua tā.”—Isaia 42:8