Pe e Talia e le Atua Tapuaʻiga Uma?

Tali masani:

▪ “E eseese uma lotu, ae taunuu uma lava i le Atua.”

▪ “E lē tāua le mea e te talitonu ai, pau lava le mea ia e faamaoni.”

O ā fetalaiga a Iesu?

▪ “Ia outou ulu atu i le faitotoʻa vaitiiti, auā e vatele ma lautele le auala e tau atu i le faaumatiaga, ma e toʻatele foʻi i latou e ui ai. Ae e vaitiiti le faitotoʻa ma e lauitiiti foʻi le auala e tau atu i le ola, e toʻaitiiti foʻi i latou o ē maua.” (Mataio 7:13, 14) E leʻi talitonu Iesu e taunuu uma auala i le Atua.

▪ “E toʻatele e fai mai iā te aʻu i lea aso, ‘Le Alii e, le Alii e, pe matou te leʻi faia ea ni valoaga ma tutuli temoni, ma faia le tele o galuega mamana i lou suafa?’ Ona ou taʻutino atu lea iā i latou: Ou te leʻi iloa lava outou! Inā ō ese ia iā te aʻu, o outou o ē faia mea leaga.” (Mataio 7:22, 23) E lē talia e Iesu i latou uma e faapea mai o loo mulimuli iā te ia.

O LE toʻatele o tagata mapolotu e pele iā i latou a latou talitonuga ma tū masani. Ae faapefea pe afai e lē ōgatusa na aʻoaʻoga ma mea o loo maua i le Afioga a le Atua, le Tusi Paia? Na faaalia mai e Iesu le lamatiaga o le mulimuli i tū masani a tagata, ina ua ia fetalai atu i taʻitaʻi lotu o ona aso: “Ua outou faalēaogā ai le afioga a le Atua i a outou tū masani.” Ona ia toe taʻua lea o isi fetalaiga a le Atua: “Ua āva mai nei tagata iā te aʻu i o latou laugutu, a ua mamao ese lava o latou loto mai iā te aʻu. E lē aogā la latou tapuaʻiga o loo fai mai iā te aʻu, auā ua faavae a latou aʻoaʻoga i mataupu a tagata.”—Mataio 15:1-9; Isaia 29:13.

E lē na o talitonuga e tāua, ae e tāua foʻi amio. Ua faapea mai le Tusi Paia i nisi ua faapea mai o loo tapuaʻi i le Atua: “Ua latou taʻutino atu i luma o tagata ua latou iloa le Atua, ae peitaʻi, ua latou faafitia o ia e ala i a latou galuega.” (Tito 1:16) O le mea moni, ua faapea mai le Tusi Paia iā i latou o loo ola i le taimi nei: “Nai lo le alolofa i le Atua, ua latou fiafia i mea faafiafia. E ui e latou te foliga mai e mapolotu, e lē moni la latou tapuaʻiga. Aua neʻi e faifaimea faatasi ma tagata faapena.”—2 Timoteo 3:4, 5, Contemporary English Version.

E manaʻomia le faamaoni, ae e lē lava. Aiseā? Auā e mafai ona faamaoni se tagata ae sesē. O lea, e matuā tāua lava le poto saʻo i le Atua. (Roma 10:2, 3) O le aʻoaʻoina o lenā poto saʻo ma gaoioi e ōgatusa ma mea o loo fai mai ai le Tusi Paia, o le a mafai ai ona tatou faafiafiaina le finagalo o le Atua. (Mataio 7:21) O lea la, o le tapuaʻiga saʻo e aofia ai le saʻo o le uunaʻiga, saʻo o talitonuga, ma gaoioiga saʻo. O gaoioiga saʻo, o lona uiga ia faia le finagalo o le Atua i aso uma!—1 Ioane 2:17.

Pe a e fia iloa atili e faatatau i faamatalaga a le Tusi Paia e uiga i le Atua, faafesootaʻi Molimau a Ieova mo sau lesona faale-Tusi Paia e aunoa ma se totogi.

[Faamatalaga faaopoopo i le itulau 9]

O le tapuaʻiga saʻo e aofia ai le saʻo o le uunaʻiga, saʻo o talitonuga, ma gaoioiga saʻo