E Lē na o Meaʻai e Ola ai le Tagata—Le Auala na Ou Sao Mai ai i Nofoaga mo Faasalaga Mamafa i Siamani

Faamatalaina e Joseph Hisiger

“O ā au mea na e faitau?” O laʻu fesili lea i se isi pagota. Sa ia tali mai: “O le Tusi Paia,” ma faapea atili mai, “E mafai ona ou avatu ma oe, ae aumai au meaʻai o le vaiaso ma aʻu.”

SA OU fanau iā Mati 1, 1914, i Moselle, a o avea lea ma vaega o Siamani. I le māeʻa o le Taua Muamua a le Lalolagi i le 1918, sa toe avea ai Moselle ma vaega o Falani. I le 1940, sa toe pulea ai e Siamani. Ae i le māeʻa o le Taua lona Lua a le Lalolagi i le 1945, na toe avea ai ma vaega o Falani. I taimi a o tutupu na mea, na suia ai loʻu tagatānuu, ma ou iloa ai tautala i gagana Falani ma le Siamani.

O oʻu mātua o tagata mapolotu Katoliko. I pō uma lava ae matou te leʻi momoe, sa tootutuli lo matou aiga ma tatalo. I Aso Sa ma aso mālōlō a le malo, na matou ō ai i le lotu. Sa ou naunau tele i laʻu lotu ma na ou auai atu ai i se mafutaga Katoliko.

Fai Loʻu Sao i le Talaʻiga

I le 1935 na asiasi atu ai Molimau a Ieova e toʻalua i oʻu mātua. Na faaautū le talanoaga i le aafia o lotu i le taua muamua a le lalolagi. I le māeʻa o lenā talanoaga, na tuputupu ai loa loʻu naunau i le Tusi Paia, ma i le 1936, na ou talosaga atu ai loa i le patele mo saʻu Tusi Paia. Na ia faapea mai, e tatau ona ou aʻoga faafaifeʻau ina ia malamalama ai. Peitaʻi, na atili ai ona ou manaʻo i saʻu Tusi Paia ma loʻu faanaunauga e faitau ai.

Iā Ianuari 1937, sa amata ai ona talatalanoa mai saʻu uō i le galuega o Albin Relewicz, ma o ia o se Molimau, e faatatau i mea o loo aʻoaʻoina i le Tusi Paia. Sa ou fesili atu, “faamata e iai sau Tusi Paia?” Sa iai lana kopi, ma e leʻi leva ae ia faasino mai iā te aʻu le suafa o le Atua, o Ieova, i se Tusi Paia Siamani e taʻua o le Elberfelder, lea na ia tuuina mai mo aʻu. Sa ou matuā fiafia lava e faitau ma na amata ona ou auai i sauniga a Molimau i le taulaga e latalata ane o Thionville.

Iā Aokuso 1937, na ma ō ai ma Albin i se tauaofiaga faavaomalo a Molimau i Paris. O i inā na amata ai ona ou talaʻi mai lea fale i lea fale. E leʻi umi, ae ou papatiso loa, ma i le amatamataga o le 1939 na avea ai aʻu o se paeonia, o se auauna Kerisiano faataimi atoa. Sa auina atu aʻu i le taulaga o Metz. Sa ou mauaina se valaaulia iā Iulai ou te galue ai i le ofisa o le lālā o Molimau a Ieova i Paris.

Faigatā i Taimi o le Taua

E leʻi umi laʻu auaunaga i le lālā, ona iā Aokuso 1939, na valaauina ai aʻu mo tiute tauave i le ʻautau a Falani. Ona o loʻu lotofuatiaifo na lē mafai ona ou faia lenā tulaga, ma na ou falepuipui ai. Iā Me o le tausaga na sosoo ai a o ou iai pea i le falepuipui, sa osofaʻia faafuaseʻi ai e Siamani ia Falani. E oo atu iā Iuni, ua toʻilalo Falani,  ma na toe avea foʻi aʻu ma tagatānuu o Siamani. Ina ua faasaʻolotoina aʻu mai le falepuipui iā Iulai 1940, na ou toe foʻi atu ai e nonofo ma oʻu mātua.

Ona sa matou ola i lalo o le pulega sauā a Siamani, na matou feiloaʻi faalilolilo mo a matou suʻesuʻega faale-Tusi Paia. Sa matou mauaina Le Olomatamata mai iā Maryse Anasiak, o se fafine Kerisiano lototele na fai ma ma fetaui i se fale falaoa e ana e se Molimau. Seʻia oo atu i le 1941, sa mafai pea ona ou ʻalofia le tele o faigatā na fesagaʻia e Molimau i Siamani.

I se tasi aso na asiasi mai ai Leoleo Faananā (Gestapo) iā te aʻu. I le māeʻa ona faamalamalama mai e le leoleo iā te aʻu ua faasāina Molimau, na ia fesili mai ai po o fia avea pea aʻu ma Molimau. Ina ua ou tali atu “Ioe,” na ia faapea mai e mulimuli atu iā te ia. Na matapogia si oʻu tinā ona o le ootia o ona faalogona. Ina ua vaai le leoleo i le mea ua tupu, na ia faapea mai ou te nofo e vaai loʻu tinā.

I le fale faigaluega na ou galue ai, ou te leʻi faamālō i le pule e ala i le faamālō lotonuu lea e faapea atu “Heil Hitler!” Sa ou teena foʻi le avea o aʻu ma vaega o le patī a Nazi. O le aso na sosoo ai, na taofia ai aʻu e leoleo. A o fesiligia aʻu e le Gestapo, sa ou musu e faailoa i ai igoa o oʻu uso Molimau. Sa tā loʻu tuāua i le muli o le fana e le leoleo na fesiligia aʻu, ma ou lē iloa ai se mea. Iā Setema 11, 1942, na faasalaina ai aʻu e le Sondergericht (Faamasinoga Faapitoa) i Metz mo le tolu tausaga i le falepuipui, ona o “le avea ma sui o Molimau a Ieova ma Tagata Aʻoga o le Tusi Paia e faasalalauina faamatalaga taufaasesē.”

I le lua vaiaso mulimuli ane ai, sa ou tuua ai le falepuipui i Metz ma faimalaga atu i se nofoaga mo faasalaga mamafa i Zweibrücken. O i inā na ou galue ai i le vaega e faaleleia auala mo nofoaafi. Sa matou suia ālā nofoaafi mamafa, toe faamaumau nati, ma toe faagatasi maamaa i auala. E na o le pau a matou meaʻai na maua o se ipu kofe ma le lua aunese o le falaoa i le taeao, ma se ipu supo i le aoauli ma le afiafi. Ona auina atu lea o aʻu i le falepuipui i se taulaga e lata ane, ma na ou galue ai i le fale faiseevae. I le mavae o nai masina, sa toe auina atu aʻu i Zweibrücken, ma na ou galue ai i faatoʻaga.

 E Lē na o Meaʻai na Ou Ola Ai

Na ma toʻalua i le falepuipui ma se tama talavou mai Holani. I loʻu aʻoaʻoina o sina vaega o lana gagana, sa mafai ai ona ou faamatala atu oʻu talitonuga iā te ia. Sa lelei lona agaʻigaʻi i luma faaleagaga, ma na ia manaʻo ou te papatisoina o ia i le vaitafe. Ina ua tulaʻi o ia mai le vai, sa ia fusi mai ma faapea mai, “Joseph, o aʻu o lou uso!” Na ma valavala ina ua toe auina atu aʻu e galue i auala mo nofoaafi.

Ua ma toʻalua nei ma se pagota Siamani. I se tasi afiafi na amata ai ona ia faitauina se tamaʻi tusi, o le Tusi Paia! O le taimi lenā na ia ofo mai ai lana Tusi Paia mo aʻu meaʻai o le vaiaso. O laʻu tali, “Manaia tele!” E ui e telē se faataulagaina na ou faia, ae ou te leʻi salamō ai. Ua amata ona ou iloa le uiga o fetalaiga a Iesu: “E lē na o meaʻai e ola ai le tagata, ae o afioga uma e tulei mai i le fofoga o Ieova.”—Mataio 4:4.

O lea ua iai nei laʻu Tusi Paia, ae o le luʻi ua tulaʻi mai, pe faapefea ona ou nanāina. I le lē pei o isi pagota, e lē mafai ona iai se Tusi Paia a Molimau. Ou te faitauina faananā i le pō, ma nanā i lalo o ʻie afu. Pe a oo i le ao, ou te alu ma nanā i totonu o loʻu ofutino. Ou te lē tuuina i totonu o le falepuipui ona e fai ma ō atu leoleo e suʻe uma sela.

A o faia le tauvalaauga i se tasi aso, na ou iloa ai ua galo laʻu Tusi Paia i le potu. I lenā afiafi, na ou faatopetope atu ai i loʻu sela ae ua leai se Tusi Paia. Ona ou tatalo ai lea i le Atua ma ou alu atu loa e vaai le leoleo, ma ou faamatala atu i ai ua ave e le tagata laʻu tusi ma ou te toe manaʻo e aumai. Sa faalēano o ia i ana mea o loo fai ma na mafai ona toe maua mai laʻu Tusi Paia. Sa ou faafetai atu iā Ieova mai le taʻele o loʻu fatu!

O le isi mea na tupu, na tuli aʻu i le fale tāʻele. Ina ua aveese oʻu ofu palapalā, sa ou faapaʻū mālie le Tusi Paia i le fola o le fale tāʻele. O le taimi na tilotilo ese ai le leoleo, sa ou tago ʻeu i loʻu vae agaʻi i autafa o le fale tāʻele. A o oʻu tāʻele, sa ou nanāina le Tusi Paia i autafa. Ina ua uma ona ou tāʻele, ona ou ʻeuina lea o le Tusi Paia i le mea o loo iai ofu mamā.

O Mea Lelei ma Mea Lē Lelei i le Falepuipui

E iai se taeao na fai ai se laina a pagota ma na ou vaaia ai Albin! O loo taofia foʻi o ia i le falepuipui. Sa ia tilotilo mai ma tuu lona lima i lona fatu, e faailoa mai ai le autasi o le ʻauuso. Ona fai mai lea o ana taga o le a tusi mai sana tusi. I le aso na sosoo ai, sa ia pasi ane ma faapaʻū mai se fasi pepa. Ae sa iloa mai e le leoleo, ma na lokaina i maʻua i se sela mo le lua vaiaso. E na o falaoa mafu ma le vai na ma mauaina, ma na ma momoe i luga o pailate laupapa e aunoa ma ni ʻie afu.

Ina ua māeʻa na faasalaga sa auina atu loa aʻu i le falepuipui i Siegburg, ma na ou galue ai i le fale uʻamea. Na mamafa galuega ae lē lava meaʻai na maua. Sa ou moemiti i le tele o meaʻai mananaia e pei o keke ma fualaau ʻaina suamalie, ae ou te ala aʻe ua atili mole ai loʻu manava ma mago loʻu faaʻī. E leʻi atoa se selau pauna o loʻu mamafa. Ae i aso uma lava, ou te faitau ai lava laʻu Tusi Paia ma maua ai se māfuaaga ou te ola ai pea.

 Ua Ou Saʻoloto!

I se tasi taeao iā Aperila 1945, sa sosola ai leoleo o le falepuipui ma na matala uma ai faitotoʻa. Ua ou saʻoloto! Ae sa alu se taimi o tau togafiti aʻu i le falemaʻi. I le faaiʻuga o Me, na ou taunuu ai i le fale o oʻu mātua. Na la faapea ai ua ou oti. Na tagi fiafia si oʻu tinā ina ua vaai mai iā te aʻu. O le mea e faanoanoa ai, e leʻi umi ae maliliu nai oʻu mātua.

Na amata ona ou toe auai i le faapotopotoga i Thionville. O se fiafiaga le toe mafuta ma loʻu aiga faaleagaga! O se faalaeiauga le iloaina sa latou faamaoni e ui i le tele o tofotofoga. Sa maliu si aʻu uō pele o Albin i Regensburg, i Siamani. Mulimuli ane, na ou iloa ai na avea loʻu tauusoga o Jean Hisiger ma Molimau, ma na fasiotia o ia ona o lona lē auai i taua. O Jean Queyroi, o lē na ma galulue faatasi i le ofisa o le lālā i Paris, e lima tausaga o ia onosaia faigatā i nofoaga mo galuega mamafa i Siamani. *

Sa vave lava ona ou toe talaʻi i le taulaga o Metz. O le taimi lenā na fai ma ou feiloaʻi ai ma le aiga o Minzani. Na papatiso le la tama teine o Tina iā Novema 2, 1946. Sa ia maelega i le auaunaga, ma na ou tosina atu iā te ia. Sa ma faaipoipo iā Tesema 13, 1947. Iā Setema 1967, na avea ai Tina ma auauna faataimi atoa i le talaʻiga, ma na ia tutumau ai i lenā auaunaga seʻia oo i lona maliu iā Iuni 2003, i le 98 o lona soifua. Ua ou matuā misia lava si aʻu pele o Tina.

I aso nei, i le silia i le 90 o oʻu tausaga, ua ou iloa ai ua ou mauaina le malosi mai le Afioga a le Atua ou te fesagaʻia ai tofotofoga ma manumalo mai ai. Na iai taimi na ou mole manava ai, ae na ou fafagaina pea loʻu mafaufau ma loʻu loto i le Afioga a le Atua. Ma ua faamalosia aʻu e Ieova. Ona o lana “afioga ua faaolaolaina ai aʻu.”—Salamo 119:50.

[Faaopoopoga i lalo]

[Ata i le itulau 21]

Si aʻu uō pele o Albin Relewicz

[Ata i le itulau 21]

Maryse Anasiak

[Ata i le itulau 22]

O le Tusi Paia lea na faatau i laʻu meaʻai mo le vaiaso

[Ata i le itulau 23]

Ma laʻu uō teine o Tina, i le 1946

[Ata i le itulau 23]

Jean Queyroi ma lana avā o Titica