“E Leʻi Oo i Loʻu Taimi”

Sa lē mafai e le avetaavale o se loli telē laʻu lapisi ona faatonutonu le alu a lana taavale. Na iʻu ina oso le loli i luga o le auala e savavali ai tagata, ma lavevea ai se ulugalii ma se alii e 23 ona tausaga sa savavali i luga o le auala. E tusa ai o le lipoti a se nusipepa i Niu Ioka, na maliliu ai lava i le taimi lenā le ulugalii ae na lē iloa e le tauleʻaleʻa se mea. Ina ua toe malamalama le tauleʻaleʻa ma iloa le mea na tupu, o lona manatu muamua lava e faapea: ‘Ou te lē talitonu na tupu lenei mea. Le Atua e, faamolemole ou te fia ola.’ Sa ia faapea mai, “E leʻi oo i loʻu taimi.”

ATONU sa e faalogo foʻi i na ituaiga faamatalaga. Pe afai e toetoe lava a oti se tagata i se faalavelave, e fai mai tagata, ‘E leʻi oo i lona taimi,’ ae pe a oti se tasi i se faalavelave faafuaseʻi, e latou te fai mai, ‘Ua oo foʻi i lona taimi,’ ia pe faapea ‘O le finagalo o le Atua.’ E tusa pe latou te faafesootaʻia le iʻuga o le mea na tupu i iʻuga tuupōina, se laki, o mea e tutupu i le olaga, po o le Atua, ae e tasi lava le talitonuga. O le toʻatele o tagata e talitonu faapea o mea e tutupu i o latou olaga ma iʻuga e maua mai ai, ua uma ona tuupōina ma e leai se mea e mafai ona latou faia i ai. Ma e lē na o taimi e feoti ai tagata ma taimi o faalavelave faafuaseʻi e lāgā ai lea ituaiga manatu; o se manatu ua leva ona iai.

O se faataʻitaʻiga, sa talitonu tagata Papelonia anamua e taaʻina mataupu fai a tagata i fetu ma lo latou fegasoloaʻiga. O le pogai lea e latou vāai atu ai i le lagi mo faailoga ma saʻili faailoga o mea o le a tutupu, ina ia taʻitaʻia ai i latou. Sa tapuaʻi tagata Eleni ma tagata Roma i atua fafine o iʻuga tuupōina, lea e iai le mana e tuupōina ai iʻuga o tagata pe lelei pe leaga, ma o nisi taimi e foliga mai ai ua sili atu lo latou malolosi nai lo o o latou atua malolosi, o Seu ma Iupita.

I atunuu i Sasaʻe, e talitonu tagata Hinitū ma tagata lotu Puta e faapea, o mea e fesagaʻia e se tagata i le taimi nei, e māfua mai ona o mea na ia faia i le taimi ua tuanaʻi, ma o ana gaoioiga i lenei olaga o le a fua i ai le mea o le a tupu i le isi olaga i le lumanaʻi. O isi lotu, e aofia ai ma le tele o lotu ua faapea o Kerisiano—e latou te taliaina foʻi na talitonuga e ala i a latou aʻoaʻoga e faatatau i iʻuga tuupōina.

O lea la, e lē o se mea e faateʻia ai ona e oo lava foʻi i o tatou taimi ua malamalama ma ua faavae talitonuga o tagata i mea moni ua tutupu, ae o loo talitonu pea le toʻatele o tagata e faapea o o latou tulaga i le olaga, o iʻuga o a latou mataupu fai i aso taʻitasi ma o latou iʻuga, e pulea uma e iʻuga tuupōina ma e itiiti lava se mea e mafai ona latou faia i ai. Po o lou lagona lenā e faatatau i le olaga? Pe e moni ua uma ona tuupōina mea e tutupu i le olaga, mea e mafai ona fai ma mea e lē mafai ona fai, faapea foʻi le fananau mai ma le feoti? Po o pulea lou olaga e iʻuga tuupōina? Seʻi o tatou vāai pe faapefea ona fesoasoani mai le Tusi Paia iā i tatou e tali nei fesili.

[Ē Ana le Ata i le itulau 3]

Ken Murray/New York Daily News