O se Tusi Mai Aialani

Faia se Saʻiliʻiliga Naunautaʻi

O LE faatimutimu pea o le aso, na ou tau lē iloa atu ai ni mea i le laufanua. Ina ua uma le sefulu maila (16 kilomita) na alu ai le taavale, na ou taunuu ai i le tumutumu o le aʻega ma autilotilo mai i lalo i Westport, o se tamaʻi aai i le itu i sisifo o Aialani. Mulimuli ane, na susulu mai le lā ma ou iloa lelei atu ai le tele o tamaʻi motu tūtū solo i autafa o le vaifagaloa, e matagofie pei o ni maatāua lanu meamata o loo i luga o se veloveta lanu moana. E laiti lava motu sa nofoia e tagata, ae o isi nuu tuloto sa uta atu i ai e le ʻau faifaatoʻaga a latou lafumanu i vaa, ina ia fafaga ai i inā.

Sa iai se faasologa o mea maupuʻepuʻe e mamao atu i le talafatai agaʻi atu i le itu i sisifo. Sa pei nei mea maupuʻepuʻe o ni apa memea ua iila i le susulu o le lā i le aoauli. Sa mafai ona ou iloa lelei atu mai le mea mamao Croagh Patrick, le mauga e foliga pei o se faatumu, lea sa taʻu e tagata o le atunuu o le Reek. Sa ui atu laʻu taavale i auala o Westport e tumutumu i tagata ma vaiti, ma pasia le Reek, ma oo atu i se vaipanoa e seāseā ona asiasi i ai Molimau a Ieova.

E leʻi iloa e le tamāloa lea na ou alu e vaai, ou te alu atu nei. Sa ou mauaina se tusi e faapea e leʻi leva ona siitia mai o ia i inei, ma e manaʻo e faaauau lana talanoaga faale-Tusi Paia ma Molimau. Sa ou taumānatu: ‘O le ā lona matua? E nofofua pe faaipoipo? O ā mea e fiafia i ai?’ Sa ou tepa i lalo i laʻu ato ma toe mafaufau i laʻu Tusi Paia ma lomiga eseese faale-Tusi Paia. Sa ou mafaufau i laʻu tala e ao ona fai atu ina ia faalaeiau ma faamalosia ai lona fiafia i le feʻau o le Malo.

Ua ou pasi atu nei ma le mauga o Reek. Sa ou vaaia ni pā maa o siʻomia ai laufanua valevalenoa seʻia oo atu i le sami, ma o le tele lava o nei pā maa na fausia i le taimi o le Oge Tele i Aialani i le senituri lona 19. Sa feleleaʻi solo i oʻu luga aʻe se manulele e pei o se gogo. Sa ou iloa atu i le tafatafaʻilagi ni laau e talatala e pei o ni rosa, ua fepiʻoaʻi solo e pei o ni toeaiina matutua, ua pipii faatasi ma loʻu ona o le savili.

E leai ni numera o fale po o ni igoa o auala i lenei nuu maotua. Sa iai i le tuatusi o le tamāloa le igoa o le fale ma le igoa o le vaipanoa. * Peitaʻi, o le mea muamua lava sa ou taulaʻi i ai, ia maua le tagata lea e na te iloa lelei mea e nonofo ai tagata uma—o le tufa meli. I le tolu sefulu minute mulimuli ane, na ou tau ai i se fale sa faaaogā e fai ma falemeli. Sa iai i luma o le  faitotoʻa le faailoilo “Ua Tapuni.” Ona ua tapuni le falemeli, na ou alu ai i se faleoloa sa iai i lenā vaipanoa ma fesili i ai, ma na faasino aʻu i se mea e lata ane i le vaipanoa.

Ona ou toe malaga lea i laʻu taavale mo le isi lima maila (8 kilomita), ona ou tau lea i le faailoilo auala lea na ou suʻeina—o se piʻoga i le itu taumatau o loo iai se auala vaiti i le itu agavale. Sa ou tuʻituʻi le faitotoʻa o se fale na latalata ane. Sa tali mai se tinā matua ma faamatala mai ma le fiafia iā te aʻu e faapea, o lona olaga atoa na nofo ai i lenā vaipanoa, ae sa matuā faanoanoa o ia ma taʻu mai e faapea e na te lē iloa le mea e nofo ai le tamāloa lea ou te saʻilia. Na ia faapea mai o le a alu e vili le telefoni, ma na ia valaaulia aʻu i totonu.

A o talanoa o ia, sa fai ma tepa mai iā te aʻu, e lē taumatea o loo taumānatu po o ai aʻu ae po o le ā foʻi le mea ou te manaʻo ai. Sa ou iloa atu se tamaʻi faatusa o le Taupou o Maria i autafa o le faitotoʻa, ma se ata telē o Keriso e pipii i le puipui o le fale. O loo taatia le rosalio i luga o le laulau i le umukuka. Ina ia faamautinoa atu iā te ia, sa ou faapea atu, “E iai se feʻau tāua ou te fia taʻu atu mo ia mai i nisi o ana uō.”

Sa alu ane lana tane ma amata loa ona faamatala mai iā te aʻu lo latou vaipanoa. I lenā taimi, e leai se faamatalaga na maua e le fafine mai lana telefoni muamua, ma na maumauaʻi mai ou te faatali ae seʻi telefoni atu i isi tagata. Na foliga mai e leai se isi na iloa lenei tamāloa po o le mea e nofo ai. Sa ou autilo i laʻu uati. Ua oo nei i le afiafipō. Sa ou mafaufau ou te toe taumafai mai i se isi taimi. Sa ou faafetai atu iā i laʻua mo le la fesoasoani, toe oso i laʻu taavale, ma amata loa le malaga umi e toe foʻi ai i le fale.

Sa ou toe foʻi mai i le vaiaso na sosoo ai. I le taimi lea, na ou feiloaʻi ai i le tufa meli ma faasino saʻo mai le mea ou te alu i ai. I le sefulu lima minute mulimuli ane, na ou tau ai i le fetaulaʻiga o ala lea na ia faamatala mai. Sa ou liliu i le itu tauagavale ma alu i luga ma lalo o le auala vaiti mo sina taimi, ma autilotilo mo le isi faailoilo auala, o se auala laupapa tuai e fau i maa. Ou te leʻi mauaina lenā faailoilo. Na mulimuli ane ou maua le faailoilo mulimuli, ma i inā i le tumutumu o le aʻega, o loo tu ai le fale lea na ou faaaluina le tele o le taimi ma taumafaiga e suʻe ai.

Sa ou mafaufau teisi pe ao faapefea ona ou faailoa atu le tala lelei. Sa tatala mai e se tamā matua le faitotoʻa. Na ia faapea mai, “Faamalie atu, ae o le fale lenā e te suʻea le la e tū mai i o.” Sa ia faasino atu i se fale na pupuni e laau. Sa ou naunau tele ma savali atu i lalo ma tuʻituʻi le faitotoʻa o le fale lenā. A o oʻu faatalitali, sa ou pulatoʻa atu i le Vasa Atalani lea e pe tusa na o ni nai selau iata le mamao. Sa malosi le savili, ma sa papaʻe mai galu a o tatafe mai i le matafaga matagofie lea e faitau maila le umī. E leai se isi na iai ma e leai foʻi se isi na iai i le fale.

E faalua ona ou toe foʻi mai faatoʻā feiloaʻi ai i se tauleʻaleʻa. Na ia faapea mai, “O le fale tonu a lenei, ae ua alu ese le tagata lea sa mautotogi muamua i inei, le tamāloa lenā e te suʻeina, ma ou te lē iloa po o fea ua alu i ai.” Sa ou faamatala atu le māfuaaga o loʻu alu atu, ma na ou iloa ane e leʻi talanoa muamua lava lenei tauleʻaleʻa i Molimau a Ieova. Sa gaoia e tagata ana meatotino, ma sa taumānatu pe aiseā ua faataga ai e le Atua lenei tulaga ma isi faiga lē tonu e tutupu. Sa ia talia ma le fiafia lomiga fou o le Olomatamata ma le Ala Mai! lea sa iai mataupu e faatatau i lenā mataupu.

Ua faatonu mai le Tusi Paia i a i tatou ina ia saʻili ma le naunautaʻi i latou o ē pei ni mamoe. O le mea e faanoanoa ai, ona ou te leʻi mauaina le tamāloa lea na ou saʻilia. Ae ui i lea, ou te iloa e leʻi alu vale aʻu taumafaiga. I Aialani, e toʻatele tagata e naunau e aʻoaʻoina le feʻau o le Malo, ma faatasi ai ma le faamanuia a Ieova, atonu i se aso o le a talia ai e lenei tauleʻaleʻa le feʻau o le Malo ma faamatala atu i isi.

[Faaopoopoga i lalo]