Maua e Tagata na Aafia i le Afā i Myanmar se Fesoasoani

IĀ ME 2, 2008, na taia ai e le Afā matuā malosi o Nargis le atunuu o Myanmar ma faaleagaina ai le atunuu, ma sa vave lava ona faasau i tala faavaomalo. * E toetoe lava 140,000 tagata na lipotia mai na maliliu pe na leiloloa ai ina ua taia e le afā mataʻutia lea foʻi na tai ōʻoōʻo ai le vaipanoa o Irrawaddy Delta.

O le mea e maofa ai, e leai ma se tasi o Molimau a Ieova i lenā vaipanoa na afāina ai. Sa mafai ona faasaoina i latou ona na latou sulufaʻi atu i lo latou Maota mo Sauniga ua fausiaina lelei. I se tasi nofoaga, sa nonofo ai Molimau e toʻa 20 ma isi tagata o le nuu e toʻa 80, i luga o le taualuga o le Maota mo Sauniga mo le iva itula a o alu aʻe pea le vai i luga i le 15 futu. Na faasaoina uma i latou. Ae o le mea e faanoanoa ai, ona e toʻa 300 tagata o le nuu lava lenā na maliliu ai. I le tele o nuu, e na o le pau lava le fale na tū pea, o le Maota mo Sauniga.

I le lua o aso talu ona uma le afā, ae aauina atu loa e le ofisa o le lālā o Molimau a Ieova i Yangon, tagata e avatu fesoasoani laveaʻi i le faapotopotoga i Bothingone. A o ui atu i vaipanoa na matuā aafia i le afā, na taumafai e ʻalofia le ʻaugaoi, ma a o pāsia tino oti o tagata, na taunuu atu le ʻau fesoasoani lavaeʻi i Bothingone ma le tele o sapalai araisa, saimini, vai, ma molīgaʻo. O i latou le ʻau fesoasoani muamua lava na taunuu i lea vaipanoa. Ina ua uma ona latou tufatufaina mea manaʻomia i Molimau o lenā nuu, ona latou faia lea o ni lauga faale-Tusi Paia e faalaeiauina ai Molimau, ma avatu Tusi Paia ma lomiga faale-Tusi Paia iā i latou, ona na leiloloa uma a latou meatotino i le afā.

Sa matuā mataʻina uiga na faaalia e Molimau na aafia i le afā. Sa taʻua e se  tasi mai le faapotopotoga na aafia i le afā i le vaipanoa o Irrawaddy e faapea: “Ua matuā leai uma mea sa iā i matou. Ua faaleaga uma o matou fale. E oo foʻi i a matou faatoʻaga ua faaleagaina uma. Ua matuā palapalā uma foʻi vai e feinu ai ona o tafega. Peitaʻi, e lē o soona popole tele uso ma tuafāfine e pei o isi na aafia. E latou te faalagolago iā Ieova ma lana faalapotopotoga. E matou te usitaʻia lava so o se faatonuga e aumai, pe matou te nonofo i lo matou nuu pe matou te ō atu i se isi mea.”

O se vaega o Molimau e toʻa 30, na leiloloa uma a latou meatotino, na latou usuina ma le olioli pese o le Malo a o latou malaga atu mo le sefulu itula, i le nofoaga o loo iai le ʻau fesoasoani lea e maua ai ni meaʻai, lavalava, ma se mea latou te malu ai. A o leʻi taunuu atu i latou i inā, na latou faalogo o loo faia se fonotaga matagaluega a Molimau a Ieova i se nuu e latalata ane. Sa latou mananaʻo e auai muamua i le fonotaga, ina ia maua ni meaʻai faaleagaga ma olioli i faalaeiauga i aufaatasiga faa-Kerisiano.

I le vaipanoa atoa na taia e le afā, e 35 fale o Molimau na faaleagaina, e 125 fale na faaleagaina se vaega, ma e 8 Maota mo Sauniga na itiiti mea na faaleagaina. O le mea e faafetai ai, e leʻi aafia tele fale o le lālā.

Ona o le afā, na lē mafai ai ona tuua pe sau se tasi i le ofisa o le lālā auā sa poloka le auala e laau tetele na palalasi i ai. E leʻi umi lava talu ona uma le afā, ae ō ane loa le silia ma le 30 tagata o le lālā e aveese laau e aunoa ma le faaaogāina o ni meafaigaluega tetele. A o latou faia lea galuega, sa maofa tagata na matamata ane. E leʻi umi ae taunuu ane loa se vaega o tuafāfine Molimau ma vaiinu mālūlū ma fualaau taumafamata mo le ʻau faigaluega faapea foʻi ma tuaoi, o ē na maofa i mea ua latou vaaia. Ina ua vaaia e se tusitala le galuega na faia e uso, na ia fesili e faapea: “O ai nei tagata o loo galulue mamafa ma le maopoopo i inei?” Ina ua ia iloa o Molimau a Ieova, na ia toe faapea mai, “Maʻimau pe ana faaalia e tagata uma le agaga moni e tatau ona iai i se nuu e pei ona faaalia e Molimau a Ieova!”

Na vave lava ona faatūina e Molimau ni komiti se lua mo fesoasoani laveaʻi i vaega eseese o le atunuu na aafia i le afā. E toʻatele tagata tauofo na galulue i le faia o fesoasoani laveaʻi. I totonu o ni nai aso, na fausia ai ni fale fou mo Molimau na faaleagaina o latou fale i le afā. Ina ua taunuu atu se ʻau fesoasoani laveaʻi e fausia se fale fou o se Molimau, na faataupupula ane ona tuaoi ma le lē talitonu. Na taʻua e se tasi o tuaoi: “Ua toe fausia le fale o se fafine Molimau e lana lotu. E leai ma se tasi o aʻu uō i le lotu Puta na ō mai e fesoasoani iā te aʻu. Pe ana iloa lava e avea aʻu ma Molimau ina ua talaʻi mai o ia iā te aʻu!”

I le taimi na suʻesuʻeina ai e le ʻau faufale ma le komiti o le ʻau fesoasoani, se tasi o fale o se aiga Molimau i Thanlyn lea na toetoe faaleagaina atoa e le afā, na matuā faagaeetia i latou ina ua faapea mai le aiga Molimau: “E leai se mea o tupu. O lea e lelei lava la matou fale. E mafai lava ona matou nonofo i inei, e leai se afāina. O loo iai isi Molimau e lē o iai ni fale e nonofo ai. Ō e fesoasoani iā i latou!”

I se tasi vaipanoa o Yangon, sa taumafai nisi tagata e ō e lalafi i totonu o se tasi o falesā i lenā vaipanoa. Peitaʻi, sa loka le faitotoʻa o le falesā ma sa lē mafai ona alu se tasi i totonu. Sa matuā lē fiafia tagata ma na mananaʻo e talepe le faitotoʻa o le falesā. Peitaʻi, i le taimi o le afā, sa fesoasoani Molimau a Ieova i le toʻatele o tagata ina ia sulufaʻi atu i Maota mo Sauniga. O se faataʻitaʻiga, i le Maota mo Sauniga i Dala, sa avatu i totonu e se ulugalii Molimau ia ni tuaoi na mafatia lea na sulu atu i inā mo se mea e malu ai. E malama aʻe le taeao, ua leai ni fale o na aiga e toe foʻi i ai ma ua fia aai. Sa maua e le tane se tasi o loo faatau atu le araisa, ona ia faatauina mai lea o le araisa e lava lelei, e fafaga ai tagata uma.

O se tasi o aiga i Yangon, e Molimau a Ieova nisi o le aiga, a o isi e eseese lotu e auai ai. Ina ua uma le afā, sa auai atu le aiga atoa i le sauniga i le Maota mo Sauniga. Aiseā? Na faamatala mai e se tasi o le aiga e faapea: “Na faapea mai tagata o le matou lotu o le a ō mai e asiasi  mai iā i matou pe a uma le afā, peitaʻi e leʻi ō mai lava. E na o Molimau na ō mai. Na outou aumai araisa ma vai mo matou. E matuā ese lava outou mai isi lotu!” Sa matuā fiafia sui o le aiga e lē o ni Molimau, i le talanoaina o le Olomatamata i le mataupu “E Faafofoga Mai Ieova i a Tatou Tatalo mo se Fesoasoani” ma sa fai foʻi a latou tali.

O se tasi o fafine na suʻesuʻeina le Tusi Paia ma Molimau, sa auai atu i le sauniga a le faapotopotoga i le vaiaso ina ua uma le afā. I le taimi o le sauniga, na faitau ai se tusi mai le ofisa o le lālā, o loo faamatala mai ai mea ua faia e fesoasoani ai iā i latou na faasaoina mai le afā, ma faamatala mai ai foʻi mea na tutupu iā i latou na. A o faitau le tusi, na amata ona tagi le fafine. Sa matuā faagaeetia o ia ma fiafia ina ua faalogo, ua maua ma o loo saogalemu Molimau uma. Ina ua uma le sauniga, sa avatu i ai se fesoasoani e aogā iā te ia ma faatū se faleʻie mo ia i autafa o lona fale. Na ia faapea mai e na te lagona sa tausia moni o ia e Molimau.

Na fetalai Iesu: “O le mea lea e iloa ai e tagata uma o oʻu soo outou, pe afai tou te fealofani.” (Ioane 13:35) Ma na faamamafa e le soo o Iakopo e faapea, o le faatuatua moni e vaavaalua ma galuega lelei. (Iakopo 2:14-17) E matuā talisapaia e Molimau a Ieova na upu ma o loo taumafai e faaalia atu lenā alofa e ala i le fesoasoani ma lagolagosua atu iā i latou o loo manaʻomia le fesoasoani.

[Faaopoopoga i lalo]

[Faamatalaga faaopoopo i le itulau 11]

Ua taʻua i le Tusi Paia e faapea, o le faatuatua moni e vaavaalua ma galuega lelei