“Ua Ou Iloa Fo‘i lo Latou Tigā”
Ia Mafuta Atu i le Atua
“Ua Ou Iloa Foʻi lo Latou Tigā”
“E PAIA, e paia, e paia Ieova.” (Isaia 6:3) Ua faaalia mai i nei upu faagaeeina le tulaga silisili o le mamā ma paia o Ieova le Atua. E te ono fesili e faapea, ‘Ona o ia o se Atua e paia, po le a faigatā la ona faalatalata atu iā te ia ma e lē popole mai iā tatou?’ ‘Pe e manatu moni mai ea lenei Atua paia iā te aʻu—o se tagata agasala ma lē lelei atoatoa?’ Seʻi o tatou iloiloina le faamautinoaga na fetalai atu ai le Atua iā Mose, lea e faamauina i le Esoto 3:1-10.
A o tausia e Mose mamoe i se tasi aso, na ia vaaia ai se vaaiga e lē masani aʻi—ua mumū se laau talatala i le afi ae e “leʻi faaumatia le laau talatala.” (Fuaiupu e 2) Ona o lona fia iloa, sa ia faalatalata atu loa e vaavaai po o le ā lea mea. Na fetalai ane Ieova iā Mose mai i totonu o le afi e ala i se agelu e faapea: “Aua e te faalatalata mai iinei; ina tō ese ia ou seevae i ou vae, auā ua sā lava le eleele o loo e tū ai nei.” (Fuaiupu e 5) Seʻi mātau foʻi, ona o loo faaāta mai le iai o le Atua paia i le laau talatala ua mumū i le afi, na mafai ai foʻi la ona paia le eleele!
E iai se māfuaaga na talanoa atu ai le Atua paia iā Mose. Na fetalai le Atua: “Ua ou matuā vaai atu i le puapuaga o oʻu nuu o loo i Aikupito, ua ou faalogo foʻi i lo latou alaga ona o ē pule faasauā iā i latou, ua ou iloa foʻi lo latou tigā.” (Fuaiupu e 7) E leʻi faapea na leʻi silafia e le Atua le mafatia o ona tagata; pe faapea foʻi na te leʻi lagona la latou alaga ona o puapuaga. Nai lo lea, na mafatia o ia ona o o latou mafatiaga. Mātau le fetalaiga a le Atua: “Ua ou iloa foʻi lo latou tigā.” E tusa ai ma le faaupuga “Ua ou iloa foʻi,” o loo taʻua i se tasi tusi e faapea: “O loo faaalia mai i lea faaupuga ni lagona māfana, faapelepele, ma le alofa mutimutivale.” Ua tatou iloa mai i fetalaiga a Ieova iā Mose, o ia o se Atua e manatu mamafa ma alofa mai iā i tatou.
O le ā na faia e le Atua? E leʻi faapea e na o le silasila pe na ona faafofoga mai ma le alofa mutimutivale. Sa uunaʻia o ia e faia se gaoioiga. Na ia fuafua e laveaʻi ona tagata mai i Aikupito ma avatu i latou i le “nuu o tafe ai le suāsusu ma le meli.”(Fuaiupu e 8) Ina ia faataunuuina lea fuafuaga, na tofia e Ieova ia Mose i le faapea atu: “Ia e au mai loʻu nuu . . . mai Aikupito.” (Fuaiupu e 10) Sa faamaoni Mose i lea tofiga, ma na ia aveese ai Isaraelu mai Aikupito i le 1513 T.L.M.
E leʻi suia lava Ieova seʻia oo mai i le taimi nei. E mautinoa e ona tagata tapuaʻi i aso nei o loo silasila mai o ia i o latou faafitauli, ma o loo ia faafofoga i a latou alaga mo se fesoasoani. E na te silafia lelei lo latou tigā. Peitaʻi, e lē na ona lagona e Ieova o le alofa mo ana auauna faamaoni. E uunaʻia i le alofa le Atua ina ia gaoioi mo i latou “auā o loo manatu mamafa mai o ia.”—1 Peteru 5:7.
O le alofa faapelepele o le Atua ua aumaia ai se faamoemoe mo i tatou. E ala mai i lana fesoasoani, e mafai ai e i tatou o tagata lē lelei atoatoa ona ola e tusa ai ma tapulaa mamā a le Atua, ma taliaina ai i tatou e ia. (1 Peteru 1:15, 16) Sa faamāfanafanaina se fafine Kerisiano na tauivi ma le tulaga o le lotomafatia ma le lotovaivai, i le tala e faatatau i le mea na tupu iā Mose i le laau talatala. Sa faapea mai o ia: “Afai e mafai e Ieova ona faapaiaina le eleele, o lona uiga la e ono maua foʻi sina oʻu faamoemoe. Na matuā fesoasoani lenei manatu iā te aʻu.”
Pe e te fia aʻoaʻoina atili e faatatau i le Atua paia o Ieova? E mafai ona tatou mafuta atu iā Ieova, auā “ua silafia lava e ia le mea na fai aʻi i tatou; ua manatu ia o le efuefu lava i tatou.”—Salamo 103:14.