E te Silafia?

Aiseā na faaaogā ai e Iesu le faaupuga “Ava, loʻu Tamā e,” ina ua tatalo iā Ieova?

O le upu faa-Arama ʼab·baʼʹ e mafai ona uiga atu i le “tamā” po o le “Tamā e.” I taimi taʻitasi e tolu ia e aliaʻe mai ai lea faaupuga i le Tusi Paia, e lē gata o le vaega o se tatalo, ae o loo faaaogā foʻi e faasino atu i le Tamā i le lagi, o Ieova. O le ā le uiga o lenei upu?

Ua taʻua i le International Standard Bible Encyclopedia e faapea: “I le gagana i aso faisoo i taimi o Iesu, sa tele lava ina faaaogā le upu ʼAva, le Tama e,ʼ o se faaupuga o se faiā vavalalata, ma o se faaupuga e faaalia ai le faaaloalo o tamaiti i o latou tamā.” O se faaupuga o lagona faapelepele e tautala ai se tasi i sona tamā, ma o se tasi lea o upu e muamua lava ona aʻoaʻoina e se tamaitiiti. Sa faaaogā e Iesu lenei faaupuga i sana tatalo faatauanau i lona Tamā. I le faatoʻaga i Ketesemane, i ni nai itula a o leʻi maliu o ia, na faalagi ai e Iesu Ieova i lana tatalo i upu e faapea, “Ava, loʻu Tamā e.”—Mareko 14:36.

Ua taʻua atili i le lomifefiloi o le Tusi Paia na taʻua i luga e faapea, “O le faaaogāina o le faaupuga ʼAva, le Tamā e,ʼ o se auala e talanoa ai i le Atua, sa seāseā ona faaaogāina i tusi faa-Iutaia sa iai i vaitaimi o Eleni ma Roma, ona e foliga mai o se lē faaaloalo le talanoa i le Atua i lenei faaupuga soona māfana tele.” Peitaʻi, “o le faaaogāina . . . e Iesu o lenei faaupuga i lana tatalo, o se faamautinoaga lea e taʻu mai ai le iai o se la faiā vavalalata ma le Atua.” O isi mau e lua o loo taʻua ai le upu “Ava, le Tama e,”—i tusitusiga uma a le aposetolo o Paulo—ua faaalia mai ai sa faaaogā foʻi e Kerisiano i le uluaʻi senituri lea faaupuga i a latou tatalo.—Roma 8:15; Kalatia 4:6.

Aiseā na tusia ai se vaega o le Tusi Paia i le Gagana Eleni?

Na taʻua e le aposetolo o Paulo e faapea, na tuuina atu i tagata Iutaia “afioga paia a le Atua.” (Roma 3:1, 2) O lea la, sa tele lava ina tusia le vaega muamua o le Tusi Paia i le gagana Eperu, o le gagana a tagata Iutaia. Peitaʻi, sa tusia Tusitusiga Kerisiano i le gagana Eleni. * Aiseā?

I le senituri lona fā T.L.M., o fitafita sa auauna i le pulega a Alesana le Sili, sa eseese auala e latou te tautatala ai ma faaleo ai upu o le gagana Eleni anamua, lea na faasolo atu ai ina palu faatasi nei vaega o le gagana ma fafau aʻe ai le gagana taatele Eleni (Koine). O le faatoʻilaloina e Alesana o atunuu na iʻu ai ina avea le Koine ma gagana faavāo atunuu i na aso. E oo ane i le taimi o na manumalo, ua taapeape solo tagata Iutaia. O le toʻatele o i latou e leʻi toe foʻi i Palesitina mai lo latou faaaunuua ai i Papelonia, lea na māeʻa i senituri muamua atu. O le iʻuga, o le toʻatele o tagata Iutaia ua lē toe tautatala i le gagana Eperu, ae ua latou faaaogā le gagana Eleni. (Galuega 6:1) Ina ia fesoasoani iā i latou, sa faia ai loa le Septuagint, o se faaliliuga o Tusitusiga Eperu i le gagana taatele Eleni.

Ua faapea mai le Dictionnaire de la Bible, e leai se isi gagana e sili ona “tele upu, fetuutuunaʻi, ma e sili ona fiafia i ai ma faigofie ona fesootaʻi ai tagata o atunuu eseese, nai lo le gagana Eleni.” Ona o le telē ma le saʻo o le lisi o upu o le gagana, le tele o faamatalaga o le kalama, ma veape e faamatala ai le uiga o upu, sa avea ai “o se gagana o fesootaʻiga, ma fai ai faasalalauga—ma o le gagana tonu lea sa manaʻomia e Kerisiano.” Pe ua lē talafeagai ai la ona faapea atu, na tusia le vaega Kerisiano o le Tusi Paia i le gagana Eleni?

[Faaopoopoga i lalo]

[Ata i le itulau 13]

Le vaega o se manusikulipi o le faaliliuga Faa-Eleni o tusitusiga Eperu

[Ē Ana le Ata]

Courtesy of Israel Antiquities Authority