Ia Mafuta Atu i le Atua

O le Tamā o Ē ua Mātuaoti

Esoto 22:22-24

“O LE Tamā ia o ē ua mātuaoti, . . . o le Atua lea o loo i lona afioaga paia.” (Salamo 68:5) O loo taʻu mai i lenei afioga faagaeeina se lesona faagaeeloto e faatatau iā Ieova le Atua—o ia o se Atua e manatu mamafa i manaʻoga o ē mafatia. Na faamaonia manino mai i le Tulafono na avatu e le Atua iā Isaraelu, e manatu mamafa o ia i tamaiti ua mātuaoti. Seʻi o tatou vāai nei i le faamaumauga muamua a le Tusi Paia e faatatau i “ē ua mātuaoti,” * lea o loo i le Esoto 22:22-24.

Ua lapataʻi mai le Atua: “Aua le agaleaga i . . . sē mātuaoti.” (Fuaiupu e 22) O lenei mea, e lē o se talosaga na avatu i tagata ae o se faatonuga a le Atua. E matuā mafatia se tamaitiiti pe a oti lona tamā, o lē sa ia faalagolago i ai e puipuia ma tausia o ia. E lē tatau la ona “agaleaga” se tasi i lenā tamaitiiti i soo se auala lava. O loo faaliliuina i isi faaliliuga o le Tusi Paia le upu “agaleaga” i le “faileagaina,” “faataumaʻoi,” ma le “faaaogāina o se tasi mo lou lava lelei.” E matuiā i le silafaga a le Atua le faia o se mea sesē i se tamaitiiti ua oti lona tamā. E faapefea ona tatou iloa?

O loo faapea mai le Tulafono: “Afai e te agaleaga lava i ai, ona alaga mai lea o ia iā te aʻu, ou te faalogo lava i lona alaga mai.” (Fuaiupu e 23) I le fuaiupu e 22, o loo faatonuina ai tagata e toʻatele i le faapea mai “aua le agaleaga,” ae i le fuaiupu e 23, o loo faasino atu i le tagata e toʻatasi i le faapea mai, “afai e te agaleaga.” O loo faailoa mai ai, e tatau i se nuu atoa ma tagata taʻitoʻatasi ona usitaia lenei faatonuga mai le Atua. E silasila ma faafofoga mai Ieova i ē ua mātuaoti, ma e mautinoa e nofo sauni o ia e tali mai i la latou alaga atu mo se fesoasoani.—Salamo 10:14; Faataoto 23:10, 11.

O le ā la e tupu pe a agaleaga se tagata i sē ua mātuaoti, ma māfua ai ona alaga atu lenā tamaitiiti i le Atua? Na fetalai Ieova: “E matuā tupu ai loʻu ita, ou te fasioti ai foʻi iā te outou i le pelu.” (Fuaiupu e 24) O loo taʻua e se tasi Tusi Paia e faapea “o le uiga moni o le manatu, ‘o le a mūmū ai loʻu isu,’ o se tala e fai pe a ova le ita o se tagata.” Mātau foʻi, e leʻi tuu atu e Ieova le tulafono ina ia faamalosia e faamasino i Isaraelu. O le a faaumatia e le Atua lava ia so o se tagata e faaaogā sē ua mātuaoti mo lona lava lelei.—Teuteronome 10:17, 18.

E lē o suia lava Ieova i aso nei. (Malaki 3:6) E tigāalofa o ia i ē ua mātuaoti. (Iakopo 1:27) Ia manatua, e matuā toʻasā le Tamā o ē mātuaoti ona o le aafia fua o i latou. O i latou uma o ē taumafai e faileagaina se tamaitiiti ua maliu lona tamā, e mautinoa o le a lē sao i latou mai “le toʻasā tele o Ieova.” (Sefanaia 2:2) O le a iloa e na tagata amioleaga, “o se mea e mataʻutia le paʻū atu i aao o le Atua soifua.”—Eperu 10:31.

[Faaopoopoga i lalo]