4 Ia Tuu le Masalosalo

“Aiseā ua e masalosalo ai? Ua matuā laʻitiiti tele lou faatuatua!”—Mataio 14:31.

AISEĀ E FAIGATĀ AI? Sa iai foʻi taimi na masalosalo ai soo o Iesu. (Mataio 14:30; Luka 24:36-39; Ioane 20:24, 25) O lea la, o loo faamatala e le Tusi Paia le lē lava o le faatuatua o le “agasala o loo faigofie ona faalavelave mai iā i tatou.” (Eperu 12:1) Na tusi le aposetolo o Paulo: “E lē o tagata uma e iai le faatuatua.” (2 Tesalonia 3:2) E lē faapea e lē o mafai ona faaalia e isi lenei uiga. Nai lo lea, e toʻatele e lē o taumafai ia maua. Ae o le a faamanuia e le Atua i latou e taumafai ia maua.

E FAAPEFEA ONA E MANUMALO MAI AI?Ia iloa po o ā māfuaaga e masalosalo ai. O se faaaʻoaʻoga, na masalosalo le soo o Toma i le toetū mai o Iesu, e ui na faapea mai isi soo ua latou vāai iā te ia. Sa manaʻo Toma i  se faamaoniga. O le ā le iʻuga? Na tuuina atu e Iesu le faamaoniga na manaʻomia e faamalosia ai lona faatuatua.—Ioane 20:24-29.

E ala mai le Tusi Paia, ua tuuina mai ai e Ieova le Atua tali moomia e aveesea ai o tatou masalosaloga. O se faaaʻoaʻoga, e toʻatele ua lē o toe faatuatua i le Atua ona o lo latou tuuaʻia o ia i taua, sauāga, ma mafatiaga o loo aafia ai tagata. O le ā le faamatalaga a le Tusi Paia i lenei mataupu?

E lē auala mai le pule a le Atua i malo o tagata. Na faasino atu Iesu i le agaga lē vaaia e igoa iā Satani, o ia o le “pule o le lalolagi.” (Ioane 14:30) Sa ofo atu e Satani iā Iesu le pule i malo uma o le lalolagi mo se gaoioiga tau tapuaʻiga e tasi, na ia faapea atu: “Ou te avatua iā te oe nei malo uma ma o latou mamalu auā ua tuuina mai iā te aʻu, ma ou te foaʻiina atu i lē ou te loto i ai.” E leʻi teena e Iesu faapea e leai se pule o iā Satani. Nai lo lea, na Ia faapea atu: “Ua tusia, ‘E tatau ona e tapuaʻi iā Ieova lou Atua, ma e na o ia foʻi e tatau ona e avatu i ai le auaunaga paia.’” (Luka 4:5-8) O Satani ma malo a tagata e tuuaʻia mo puapuaga o le lalolagi, ae lē o le Atua.—Faaaliga 12:9, 12.

Ua toeitiiti ona aveesea atoatoa lea e Ieova le Atua pogai o mafatiaga uma. Ua māeʻa ona ia faatulagaina se Malo, po o se pulega, i lalo o le taʻitaʻiga a lona Alo, o Keriso Iesu, e puleaina tagata. (Mataio 6:9, 10; 1 Korinito 15:20-28) I le faataunuuga o valoaga o le Tusi Paia, ua talaʻia nei i le lalolagi aoao le tala lelei e faatatau i le Malo. (Mataio 24:14) E lē o toe umi ae aveesea lea e le Malo o i latou uma e tetee atu, ma o le a aveesea ai ma pogai uma o mafatiaga o tagata.—Tanielu 2:44; Mataio 25:31-33, 46; Faaaliga 21:3, 4.

O LE Ā LE TAUI? O i latou e lolo atu i masalosaloga ua pei o peau o le sami o loo fesouaʻiina e “matagi o aʻoaʻoga eseese, e ala i togafiti a tagata.” (Efeso 4:14; 2 Peteru 2:1) Ae e lē faapena i latou o loo maua tali faamalie loto i a latou fesili, ona e mafai ona latou “tutū mausalī i le faatuatua.”—1 Korinito 16:13.

O Molimau a Ieova, lea e lomia le mekasini lenei, e latou te fia fesoasoani iā te oe ina ia maua tali i fesili e ono luʻia ai lou faatuatua. E latou te valaaulia oe ina ia outou auaufaatasi ma e iloa ai a latou aʻoaʻoga. O lou faia faapea o le a faamalosia ai lou faatuatua i le Atua.

Mo nisi faamatalaga, tagaʻi i le mataupu e 8, “O le ā le Malo o le Atua?” ma le mataupu e 11, “Aiseā ua Lē Taofia ai e le Atua Puapuaga?” i le tusi O ā Aʻoaʻoga Moni a le Tusi Paia? *

[Faaopoopoga i lalo]

[Ata i le itulau 9]

O i latou e maua tali faamalieloto i a latou fesili, e iai se faavae malosi mo latou faatuatua