O Lesona Tatou te Aʻoaʻoina Mai iā Iesu

E Faatatau i “le Iʻuga”

O le ā o le a iʻu?

Na fesili atu soo o Iesu iā te ia e faapea: “O le ā . . . le faailoga o lou faatasi mai, ma le iʻuga o [le] faiga o mea a le lalolagi?” (Mataio 24:3) Ina ua taliina lenā fesili, e leʻi faapea atu Iesu o le a faaumatia le lalolagi faitino. I le taimi muamua atu, sa talanoa o ia e faatatau i le “faiga o mea a le lalolagi” ma na ia faaaogā lea faaupuga, e faasino atu ai i le faiga atoa o mea lea e aofia ai faiga faalotu, faapolotiki, ma faiga faapisinisi lea o loo pulea e Satani. (Mataio 13:22, 40, 49) O le faiga la lenā sa faasino atu i ai Iesu ina ua ia fetalai e faapea: ‘O le a oo mai le iʻuga.’—Mataio 24:14.

Na faapefea ona faamatala e Iesu le iʻuga?

O le iʻuga o lenei faiga o mea lē tonu, ua avea lea o se “tala lelei.” Na fetalai Iesu e faapea: “E talaʻiina atu lenei tala lelei o le malo i le lalolagi atoa e fai ma molimau i atunuu uma, ona oo mai ai lea o le iʻuga.” Na faamatala e Iesu le iʻuga o le faiga o mea o loo iai nei i le auala lenei: “E tupu le puapuaga tele lea e leai sona tusa talu le amataga o le lalolagi, e oo mai lava i aso nei, ma e lē toe tupu foʻi se mea faapea. O le mea moni, a lē faapuupuuina na aso, e leai se tagata e faasaoina.”—Mataio 24:14, 21, 22.

O ai o le a faaumatia?

E pau tagata o le a faaumatia o i latou e lē alolofa ma lē auauna iā Ieova ma Iesu. O tagata na e lē o usiusitai i le Atua. Na fetalai Iesu: “E pei lava o aso o Noa, e faapena foʻi le faatasi mai o le Atalii o le tagata. Auā e pei o aso a o leʻi oo i le lolo, . . . latou te leʻi ano i ai seʻia oo mai le lolo ma tafiesea ai i latou  uma.” (Mataio 24:36-39) Na fetalai Iesu e toʻatele i latou o loo ui i le auala e tau atu i le malaia. Peitaʻi, na ia faamautinoa mai e faapea e i ai le ‘auala lauitiiti e tau atu i le ola.’—Mataio 7:13, 14.

O afea o le a iʻu ai lenei faiga o mea?

Ina ua fesiligia e faatatau i le faailoga o lona faatasi mai “ma le iʻuga o [le] faiga o mea a le lalolagi,” na tali atu Iesu e faapea: “E siitaua atu isi atunuu i isi atunuu, ma isi malo i isi malo, e iai foʻi oge ma mafuiʻe . . . ma e maalili le alofa o le toʻatele ona o le faatuputeleina o le amioleaga.” (Mataio 24:3-12) O lea la, o tala faanoanoa uma lava i aso nei e iai sona uiga tāua—ua lē o toe umi ona aumaia lea e le pulega o le Malo o le Atua le filemu i tagata usiusitai. Na fetalai Iesu: “Pe a outou vāai ua tutupu nei mea, ia outou iloa ua latalata mai le malo o le Atua.”—Luka 21:31.

O le ā e ao ona e faia?

Na fetalai Iesu e faapea ‘na foaʻi mai e le Atua lona Atalii e toʻatasi, ina ia lē fano tagata uma e faatuatua iā te ia, a ia maua e ia le ola e faavavau.’ (Ioane 3:16) Ina ia faatuatua i le Atua ma lona Alo, e manaʻomia ona e iloa lelei i laʻua. O le māfuaaga lenā na fetalai ai Iesu e faapea: “Ina ia maua le ola e faavavau, e tatau ona latou iloa lelei oe, le Atua moni e toʻatasi, atoa ma Iesu Keriso, o lē na e auina mai.”—Ioane 17:3.

Ia faaeteete ina ia lē avea popolega ma faafitauli, ma māfuaaga e taofia ai oe mai le aʻoaʻoina o le auala e faaalia ai lou alofa mo le Atua. Na fetalai Iesu: “Ia outou uaʻi atu iā te outou lava, ina neʻi faamamafaina o outou loto i le . . . popole i mea o le olaga nei, neʻi oo faafuaseʻi mai lenā aso iā te outou e pei o se mailei. Auā e oo mai [lava].” Pe afai e te usitaia le lapataʻiga a Iesu, o le a mafai ona e “sao mai i nei mea uma o le a oo mai.”—Luka 21:34-36.

Mo nisi faamatalaga atili, tagaʻi i le mataupu e 9, “Po ua Tatou Ola i ‘Aso e Gata Ai’?,” o le tusi O ā Aʻoaʻoga Moni a le Tusi Paia? *

[Faaopoopoga i lalo]