Olioli e ui i Faalētonu o le Tino

Faamatalaina e Paulette Gaspar

E ui ina toetoe lava ono pauna loʻu mamafa ina ua ou fanau mai, ae sa iloa e le fomaʻi e iai se faalētonu telē o loo tupu iā te aʻu. Na gaui oʻu ponaivi i le taimi na ou fanau mai ai. Na ou maua i le maʻi e taʻu o le osteogenesis imperfecta, lea e iloa, o ivi maʻaleʻale. Sa faatopetope ona avatu aʻu i le mea e fai ai taotoga, ae na manatu fomaʻi ou te lē ola. Na latou manatu ailoga e atoa se 24 itula o oʻu ola pea.

SA OU fanau i Canberra, le laumua o Ausetalia, iā Iuni 14, 1972. E ui lava i nei manatu, ae na uma lenā aso o oʻu ola pea. Peitaʻi, na oo ina ou maua i le niumonia. Talu ai sa manatu fomaʻi o le a ou oti, e leai la ni togafitiga na latou aumaia iā te aʻu ma sa filifili ai e “tuu pea seʻi iloa po o le ā le mea e tupu.” Ioe, sa iai le mea na tupu, na ou ola pea.

Pagā le faigatā tele mo oʻu mātua o loʻu tulaga i lenā taimi. Ona e foliga mai ou te lē ola, na fautuaina ai e fomaʻi oʻu mātua e aua le soona māfana mai iā te aʻu. Na faasā ona papaʻi mai oʻu mātua iā te aʻu a o oʻu iai i le falemaʻi mo le tolu masina. Sa faaeteetegatā le vaaiga o aʻu. Ina ua manino mai ou te ola, sa manatu loa fomaʻi e tatau ona ave aʻu e oʻu mātua i se fale e tausia ai tamaiti e lē atoatoa le malosi.

Ae na mananaʻo oʻu mātua e ave aʻu i le fale. O le taimi lenā faatoʻā amata ona suʻesuʻe loʻu tinā ma Molimau a Ieova i le Tusi Paia. O mea na ia aʻoaʻoina mai lana suʻesuʻega, na atili ai ona ia iloa e tatau ona ia tausia aʻu. Ae pagā le faigatā ona ia māfana mai, ona sa faaalu uma lona taimi ma le malosi i le tausia ma le faaeteete o aʻu neʻi teʻi ua gau se ponaivi. E fai ma ave aʻu i le falemaʻi. E oo lava i le faataeleina o aʻu, e mafai lava ona gau ai se ponaivi o loʻu tino. E oo lava i le mafatua, e mafai foʻi ona gau ai se ponaivi.

Sa oo Ina Ou Lotomafatia

A o oʻu tuputupu aʻe, sa ou faaaogāina le nofoa faataavalevale i le tele o taimi. Sa lē mafai ona ou savali. E ui i na tulaga, ae sa lelei ona tausia aʻu e oʻu mātua.

E lē gata i lea, sa taumafai si oʻu tinā e aʻoaʻo aʻu i le feʻau o le Tusi Paia. O se faataʻitaʻiga, sa ia taʻu mai iā te aʻu o le a faia e le Atua le lalolagi ma parataiso i le lumanaʻi, lea o le a ola fiafia ai tagata i se tulaga lelei atoatoa faaleagaga, faalemafaufau, ma le faaletino. (Salamo 37:10, 11; Isaia 33:24) Peitaʻi, sa taʻutino mai e loʻu tinā, e faigatā ona ia mafaufau i se olaga sologa lelei mo aʻu a o leʻi oo mai lenā taimi.

Sa ou aʻoga muamua i le aʻoga mo tamaiti e  lē atoatoa le malosi. E leʻi faailoa maia e loʻu faiaʻoga ni sini mo aʻu, ma e leʻi faatutūina foʻi ni oʻu sini. O le mea moni, o se luʻi tele iā te aʻu le taumafai e tumau i le aʻoga. O le toʻatele o tamaiti e agaleaga mai. Ona sosoo ai lea ma loʻu auai i le aʻoga mo tamaiti e atoatoa le malosi. Sa ou iloa e tatau ona faaaogā loʻu malosi, ma ia lototele ina ia faifaimea faatasi ai ma isi tamaiti o le aʻoga. E ui i lea sa ou maumauaʻi e faauma lelei oʻu tausaga e 12 faaleaʻoaʻoga.

Sa ou mātauina le leai o se faamoemoe ma le lē faamalieina o tamaiti o laʻu aʻoga, aemaise lava le taimi na ou aʻoga ai i aʻoga maualuluga. Sa ou mafaufau foʻi i le mea na aʻoaʻoina ai aʻu e loʻu tinā e uiga i le Tusi Paia. I loʻu mafaufau, sa ou iloa e moni le mea na taʻu mai e loʻu tinā. Ae e leʻi pāʻia loʻu loto e aʻoaʻoga a le Tusi Paia i lenā taimi. E iai se taimi na ou filifili ai e fai mea ou te fiafia i ai, e aunoa ma le mafaufau i le lumanaʻi.

Ina ua 18 oʻu tausaga, sa ou sifi ese ma le fale o oʻu mātua, ae matou nonofo faatasi ma ni tagata e lē atoatoa le malosi. Sa ou iloa o lenei tulaga na aumaia ai le fiafia faapea foʻi le fefe. Sa ou fiafia i le mauaina o se saʻolotoga, faia o mea ou te loto i ai, le faifaimea faatasi ma uō lea sa avea o se mea e fiafia tele ai. Sa faaipoipo le toʻatele o aʻu uō. Sa ou naunau foʻi e maua se paaga faaipoipo ma le alofa. Ae ona o le faalētonu o loʻu tino, sa faigatā tele ai ona maua se paaga faaipoipo. Na ou lagona ai lava le faanoanoa.

Peitaʻi, ou te leʻi tuuaʻia le Atua ona o loʻu tulaga. Sa ou iloa lelei e lē mafai ona faia e le Atua se mea lē tonu. (Iopu 34:10) Sa ou taumafai e talia loʻu olaga ua iai. E ui i lea, sa oo ina ou maua i le lotomafatia.

Na Faasolosolo Mālie Ona Ou Toe Fiafia

O le mea e faafetai ai, ona na manatu mamafa loʻu tinā i loʻu tulaga, ma sa ia faafesootaʻia se toeaina o le faapotopotoga na nofo latalata mai iā te aʻu. Sa vili mai le toeaina ma valaaulia aʻu ou te auai atu i sauniga i le Maota mo Sauniga a Molimau a Ieova i le vaipanoa lenā. E lē gata i lea, sa amata foʻi ona ma suʻesuʻe le Tusi Paia ma se tasi o tamaʻitaʻi i le faapotopotoga.

Ina ua toe faamanatu mai iā te aʻu upu moni o le Tusi Paia na aʻoaʻo muamua ai aʻu e loʻu tinā, sa toe faaleleia ai laʻu vaaiga i le olaga. Sa ou olioli i aufaatasiga ma le ʻauuso Kerisiano. Peitaʻi, sa ou taumafai e taofia le toe talanoa i oʻu faalogona, ona na ou musu neʻi oʻu toe mafatia. Ou te iloa o le māfuaaga lenā sa faigatā ai ona iai iā te aʻu se alofa loloto mo le Atua. E ui i lea, sa ou talitonu o se mea e talafeagai ona tuuina atu loʻu ola i le Atua. O lea, iā Tesema 1991, sa ou papatiso ai loa e faailoga ai loʻu tuuina atu.

Sa ou tuua le fale sa matou nonofo ai ma aʻu uō e lē atoatoa le malosi, ae siitia atu i se falemautotogi na o aʻu. E iai ni lelei faapea foʻi ma ni faalētonu na aumaia ai i lenei suiga. Mo se faaaʻoaʻoga, sa ou lagona le tuua toʻatasi. Sa ou lagona le fefe ina neʻi osofaʻi aʻu e ni tama leaga. Sa amata foʻi ona ou toe mafatia. E ui lava sa ou taumafai e ʻataʻata ma fiafia, ae sa faalētonu lava le tulaga o mea. Sa ou matuā manaʻomia lava se uō e lelei, e toʻafimālie ma fetuutuunaʻi.

Na ou iloa e na o Ieova le Atua e na te saunia se uō faapena mo aʻu. Sa faatulaga ma le agalelei e toeaina i le faapotopotoga se tamaʻitaʻi ua faaipoipo e igoa iā Susi, e na te toe faaauauina laʻu suʻesuʻega i le Tusi Paia. O Susi, sa lē na o se faiaʻoga iā te aʻu. Sa fai o ia ma aʻu uō mamae ou te alofa faapelepele i ai.

Sa toleniina aʻu e Susi e tufa atu i isi mea na ou aʻoaʻoina—e lē gata i le faiva mai lea fale i lea fale, ae faapea foʻi le molimau atu i se auala lē fuafuaina. Na amata ona ou matuā talisapaia atoatoa uiga o le Atua. E ui lava ua ou  papatiso, ae e leʻi malosi loʻu alofa i le Atua. Na iai se taimi na oo ai lava ina ou lē toe manaʻo e auauna iā te ia. Na ou talanoa iā Susi, ma sa ia fesoasoani mai iā te aʻu e manumalo i lenā faafitauli faigatā.

Sa fesoasoani mai foʻi Susi ina ia ou iloa, o le tele o loʻu lē fiafia, na māfua ona o le faifaimea faatasi ma ē e lē malosi lo latou faatuatua iā Ieova. O lea sa amata loa ona ou faauō atu i tagata e malolosi faaleagaga, aemaise lava ē e matutua. Sa lē lelei foʻi le ma faiā ma loʻu tinā, peitaʻi, sa ou taumafai e toe faalelei le ma faiā ma ia faapea foʻi loʻu tuagane. Sa faateʻia aʻu ina ua ou maua le olioli lea ou te leʻi mauaina muamua. Sa avea oʻu tuagane ma oʻu uso faaleagaga, o loʻu aiga, ae silisili ai o Ieova, ma puna o le olioli ma le malosi mo aʻu.—Salamo 28:7.

Se Galuega Fou

Ina ua uma se fonotaga sa ou auai ai, lea sa ou faalogologo ai i lauga na taʻua ai le olioli, o nisi sa galulue i le auaunaga faataimi atoa faa-Kerisiano, sa ou faapea ifo , ‘E mafai foʻi ona ou faia lenā mea!’ Ioe, na ou iloa o le a avea lenā ma luʻi pe a fua i loʻu malosi. Ae ina ua uma ona fefulifulisaʻi le mataupu ma tatalo e faatatau i lea tulaga, sa ou filifili loa e faatumu se pepa talosaga e avea ma faiaʻoga faataimi atoa o le Tusi Paia, ma iā Aperila 1998, na amata ai loa ona ou galue o se paeonia.

O le a faapefea nei ona ou galue i le galuega talaʻi pe a fua i loʻu malosi? O laʻu masani, ou te fiafia e galue toʻatasi ma ou te lē manaʻo e faalagolago i isi mo le feʻaveaia o aʻu ma isi fesoasoani. O lea, sa manatu ai Susi ma Mika e faatau se pasika! Ae o le a faapefea ona ou aveina se pasika? E pei ona faaalia i le ata, sa fai faapitoa laʻu pasika e fua i loʻu tulaga. Sa lē tau manaʻomia ona ou alu ese ma le nofoa faataavalevale!

O le auala lenā na mafai ai ona ou asiasi atu i tagata ma suʻesuʻe ma i latou i le Tusi Paia, i taimi e fetaui mo i latou ma aʻu foʻi. Ou te taʻutino atu ou te fiafia tele e tiʻetiʻe ma faasavili i laʻu pasika, o se tasi lea o fiafiaga itiiti o le olaga!

Ou te fiafia tele e amata talanoaga lē fuafuaina ma tagata i le auala, o ē e agalelei ma faaaloalo mai iā te aʻu. Ou te fiafia e fesoasoani i isi ina ia iloa le Tusi Paia. Ou te manatua se tasi o mea na tupu a o ma talaʻi ma laʻu paga. Sa faafeiloaʻi e laʻu paga le tagata o le fale, o lē sa pulatoʻa mai iā te aʻu ona fesili mai lea i laʻu paga, “E tautala si teine lenā?” Sa ma toē ma laʻu paga. Ina ua uma ona ou talaʻi atu iā te ia, sa iloa e le fafine e moni lava e mafai ona ou tautala.

I le taimi nei, ua ou lagona le fiafia i le olaga ma ua ou atiaʻe le alofa mo Ieova le Atua. Ou te faafetai ai i loʻu tinā mo le aʻoaʻoina o aʻu i upu moni o le Tusi Paia, ma ou te taulaʻi atu ma le mautinoa i le lumanaʻi i le taimi o le a ‘faia ai e le Atua ia fou mea uma lava,’ lea e aofia ai ma si oʻu tino laʻitiiti.—Faaaliga 21:4, 5.

[Faamatalaga faaopoopo i le itulau 30]

“Sa ou taumafai e talia loʻu olaga ua iai. E ui i lea, sa oo ina ou maua i le lotomafatia”