Peteli i Brooklyn—100 Tausaga o le Talafaasolopito
Peteli i Brooklyn—100 Tausaga o le Talafaasolopito
O LE tausaga e 1909 o se tausaga mataʻina i le Aai o Niu Ioka. Sa tatalaina ai le auala laupapa o Queensboro, e fesootaʻi ai le vaipanoa o Queens ma Manhattan, ma na tatala ai foʻi le auala laupapa o Manhattan, ma faia ai se isi auala e fesootaʻi ai Manhattan ma Brooklyn.
O se tausaga foʻi e mataʻina i Molimau a Ieova. Muamua atu, na iloa ai e Charles Taze Russell, o le peresitene o le Watch Tower Bible and Tract Society, le faalapotopotoga faaletulafono a Molimau a Ieova e faapea, ua manaʻomia ona faalautele atu le talaʻia o le tala lelei o le Malo o le Atua. (Mataio 24:14) Sa ia manatu o le siitia atu o le ofisa ulu o le Sosaiete mai i Pittsburgh, Pennsylvania, e faatū i Brooklyn, i Niu Ioka, o se laasaga tāua tele lea ina ia faia ai faapea. Sa amata i le 1908 ona fai tapenapenaga mo le siitia atu, ma na siitia atu i le amataga o le tausaga na sosoo ai.
Aiseā na Siitia ai i Brooklyn?
Sa iloa e i latou na taʻimua i le galuega talaʻi i tuā i na taimi e faapea, o le talaʻi atu e ala i lauga e lolomia i nusipepa, o se auala lelei lea e faasalalau atu ai le upu moni o le Tusi Paia. O lea la, e oo ane i le 1908, ua 11 nusipepa ua lomia ai lauga faale-Tusi Paia a Russell, ma e 402,000 kopi na lolomia i vaiaso taʻitasi.
Peitaʻi, na tusi Russell e faapea: “Na manatu uso o ē na malamalama i le auala e fetufaaʻi ai mataupu a le isi nusipepa i le isi nusipepa . . . afai e lomia mai lauga o vaiaso taʻitasi i se nusipepa mai se [aai telē], o le a iʻu ina faasalalauina atu lauga i le Iunaite Setete atoa; ma atonu i le tausaga e tasi, o le a faitau selau pepa e latou te faasalalauina e lē aunoa.” O lea la, sa amata loa ona latou saʻilia se nofoaga e sili ona lelei ina ia faalautele atu ai le galuega talaʻi.
Aiseā na filifilia ai Brooklyn? Na faapea mai Russell: “Ina ua uma ona saʻili mo le taʻitaʻiga a le Atua, sa matou malilie uma ai e faapea, o Brooklyn, N.Y., o le nofoaga sili lea ona talafeagai mo i matou mo le galuega o le seleselega . . . ona o le toʻatele o le faitau aofaʻi o ona tagata ma sa iloa foʻi ‘O le Aai o Lotu.’” O iʻuga na oo i ai, na taʻu atu ai iā i latou o se filifiliga atamai lea. I sina taimi puupuu, ae ua 2,000 nusipepa na faasalalauina ai lauga a Russell.
E iai foʻi se isi māfuaaga na lelei ai le filifilia o Niu Ioka. E oo ane i le 1909, ua faavaeina ofisa o lālā i Peretania, Siamani, ma Ausetalia, ma e tele isi lālā na faavaeina mulimuli ane ai. O lea la, ua talafeagai lelei ona faatū le ofisa ulu i se taulaga e taula uma i ai vaa, ma e tele ona auala ma auala o nofoaafi e fesootaʻi ai i isi nofoaga.
Aiseā na Taʻua ai o Peteli?
Sa faavaeina le uluaʻi ofisa ulu o le Watch Tower Bible and Tract Society i vaitausaga o le 1880, i Allegheny (lea ua avea nei ma vaega o Pittsburgh), i Pennsylvania. I na taimi, sa taʻu le ofisa ulu o le Bible House (Fale o le Tusi Paia). E oo ane i le 1896, e toʻa 12 i latou ua galulue ai i lenei fale.
O lea la, ina ua siitia atu i Brooklyn i le 1909, sa taʻu le fale fou mo le ʻaufaigaluega o le Bethel (Peteli). * Aiseā ua taʻu ai o Bethel? O le fale lea na faatau e le Sosaiete o le Olo Matamata i le 13-17 Hicks Street, o le fale o le faifeʻau lauiloa e igoa iā Henry Ward Beecher, ma sa iloa i le igoa o le Beecher Bethel (Peteli a Beecher). Sa faatau foʻi ma le fale lea na nofo muamua ai Beecher, lea sa i le 124 Columbia Heights. Na taʻua i le Watch Tower o Mati 1, 1909, e faapea: “E foliga mai o se mea e matuā mataʻina lo matou mauaina o le Peteli tuai a Beecher, ma i tulaga e leʻi fuafuaina na matou mauaina ai ma le fale sa nofo muamua ai o ia. . . . E tatau ona matou taʻu le fale fou o ‘Peteli,’ ae taʻu le ofisa fou ma le fale e faapotopoto faatasi ai ‘O le Maota Tapuaʻi i Brooklyn’; o nei igoa o le a suia ai le taʻu o le ‘Bible House.’”
I aso nei, ua taʻua fale tetelē i Brooklyn ma isi nofoaga e lua i le Setete o Niu Ioka, i Wallkill ma Patterson, e aofia ai ma fale e lua e nonofo ai, le fale lomitusi ma ofisa, o Peteli. Ma i aso nei o loo iai aiga Peteli i atunuu e 113. O loo galulue ai le silia i le 19,000 o tagata talaʻi o ē o loo fesoasoani e faasoa atu faamatalaga o le Tusi Paia.
Se Faafeiloaʻiga Māfana i Tagata Asiasi
Sa faapaiaina nei fale iā Ianuari 31, 1909. O le Aso Gafua, Setema 6, i le 1909, o le aso lea na faatulaga e asiasi atu ai tagata i le Peteli. E faitau selau Tagata Aʻoga o le Tusi Paia, e pei ona sa faaigoa ai Molimau a Ieova i na aso, na maimoaina le maota. O le toʻatele o i latou na ō mai saʻo lava mai i se tauaofiaga faa-Kerisiano sa faia i Saratoga Springs, e tusa ma le 200 maila (320 kilomita) i le itu i mātū o le Aai o Niu Ioka. Sa talia fiafia e Charles Taze Russell tagata na asiasi atu ma faafeiloaʻi i latou. *
O loo faaauau pea ona talia tagata e asiasi atu i Peteli. O le mea moni, i tausaga taʻitasi, e silia i le 40,000 tagata e asiasi atu e maimoa i fale i Brooklyn. O loo faaauau pea ona faia se matafaioi tāua a le Peteli i Brooklyn i le faalauteleina atu o manaʻoga o le Malo o Ieova, mo le faamanuiaina o le faitau miliona o tagata.
[Faaopoopoga i lalo]
^ pala. 11 O le upu Eperu “Peteli” o lona uiga “O le Fale o le Atua.” I le Tusi Paia, o Peteli o se aai lauiloa o tagata Isaraelu. E na o le aai o Ierusalema o loo fai ma taʻua soo mai.
^ pala. 14 Mo nisi faamatalaga atili i le talafaasolopito, tagaʻi i le tusi Jehovah’s Witnesses—Proclaimers of God’s Kingdom, itulau e 718-723, lomia e Molimau a Ieova.
[Pusa/Ata i le itulau 25]
O le ā ua e Iloa e Faatatau i le Watch Tower Bible and Tract Society?
Sa faavaeina i le 1884 le faalapotopotoga lea ua iloa i aso nei, o le Watch Tower Bible and Tract Society of Pennsylvania, ae i lenā taimi sa taʻua o le Zionʻs Watch Tower Tract Society. O lona fuafuaga ina ia faasalalau atu ai i le lalolagi aoao upu moni o le Tusi Paia, aemaise lava e ala atu i lomiga ua lomia. I aso nei, o loo tumau pea ona avea le Watch Tower Bible and Tract Society, o se tasi o auala faaletulafono o loo faaaogā i le lalolagi aoao e Molimau a Ieova. *—Filipi 1:7.
Ua lomia e le Watch Tower Bible and Tract Society, ia Tusi Paia ma lomiga faale-Tusi Paia i gagana e 473. Ua lolomiina atoa po o se vaega foʻi, ia le silia i le 150 miliona kopi o le Tusi Paia o le Lalolagi Fou, i gagana e 72. E faaopoopo atu i le Tusi Paia o le Lalolagi Fou, ua lomia foʻi e le Sosaiete i ana lava masini lomitusi pe totogi foʻi le lomiaina o faaliliuga o le Tusi Paia o loo mulimuli mai: le American Standard Version, The Bible in Living English, The Emphatic Diaglott, Holman’s Linear Parallel Edition, le King James Version (e aofia ai ma le lomiga a Tagata Aʻoga o le Tusi Paia), ma le New Testament Newly Translated and Critically Emphasized, Lomiga Lona Lua.
E ese mai i le lomiaina o Tusi Paia, i le silia laʻitiiti i le sefulu tausaga ua mavae, na faia ai e Molimau a Ieova le silia i le 20 piliona o isi mea, e pei o tusi, mekasini, savali, CD, DVD, ma lomiga faale-Tusi Paia faapena. * O le tele o nei mea ua lolomia, faopusa, ma auina mai i vaa mai i aiga Peteli i atunuu e pei o Ausetalia, Aferika i Saute, Anitenitina, Iapani, Iunaite Setete, Initia, Italia, Filipaina, Finilani, Mekisikō, Myanmar, Nigeria, Pasili, Peretania, Sepania, Siamani, Kanata, Kolomepia, ma Korea.
[Faaopoopoga i lalo]
^ pala. 21 I le 2008, e 7,124,443 le aofaʻi o Molimau a Ieova i atunuu e 236. Sa faamaopoopoina i latou i faapotopotoga e 103,267.
^ pala. 23 O nei mea e lē o faatauina. O le galuega tau aʻoaʻoga o le Tusi Paia a Molimau a Ieova, o loo lagolagoina e foaʻi tauofo.
[Siata]
MEA NA FAIA MAI LE 1998-2008
Tusi 458,230,708
Mekasini 11,292,413,199
Savali 7,996,906,376
Polosiua 862,050,233
CD/MP3 34,621,130
DVD 13,500,125
O isi mea 129,083,031
Aofaʻiga 20,786,804,802
[Ata i le itulau 22]
Fale Peteli 122-124 Columbia Heights
[Ata i le itulau 22]
13-17 Hicks Street (1909-1918)
[Ata i le itulau 22]
Lauga a Russell sa tusia i nusipepa
[Ata i le itulau 22]
35 Myrtle Avenue (1920-1922)
[Ata i le itulau 23]
18 Concord Street (1922-1927)
[Ata i le itulau 23]
117 Adams Street (1927 e oo mai i le taimi nei)
[Ata i le itulau 24]
25-30 Columbia Heights
[Ata i le itulau 24]
Fale Lomitusi i Wallkill
[Ata i le itulau 24]
Nofoaga Autū Tau Aʻoaʻoga i Patterson