Ia Mafuta Atu i le Atua

E Magafagafa o Ia i Mea e Gata ai lo Tatou Mafai

Levitiko 5:2-11

“SA OU taumafai malosi, ae ou te iloa e lē taitai lava.” O le faamatalaga lenā a se fafine o loo taumafai e faafiafia le Atua. Pe faamata e talia e Ieova le mea sili ua mafaia e ona tagata tapuaʻi? Pe faamata e amanaʻia e le Atua le taumafaiga a le tagata e tusa ma lona mafai ma lona tulaga? Ina ia tali nei fesili, e lelei pe a tatou iloiloina mea na taʻua i le Tulafono a Mose e faatatau i nisi o taulaga, lea e maua i le Levitiko 5:2-11.

E tusa ai ma le Tulafono, sa manaʻomia e le Atua le ofoina atu o taulaga eseese ina ia magalo ai agasala. I le mau lenei, o loo faia ai e se tagata se agasala ma le lē iloa. (Fuaiupu e 2-4) Pe a iloa e le tagata lana agasala na fai, e ao ona ia faaali atu lana agasala ma ofo atu lana taulaga mo le agasala—“o se tamaʻi mamoe, po o se tamaʻi ʻoti.” (Fuaiupu e 5, ma le 6) Ae ā pe afai e mativa le tagata ma e leai se mamoe po o se ʻoti e ofo atu ai lana taulaga? Pe na faamalosia e le Tulafono lona alu e nonō mai se manu ma oo ai ina nofoaitalafu? Pe tatau ona ia faigaluega seʻia oo ina maua le tau o se manu, ma tuai ai lava ona faia le taulaga?

Ua faaalia i le Tulafono le magafagafa o Ieova, ona ua taʻua ai e faapea: “A lē maua e ia se tamaʻi mamoe, ona au mai ai lea e ia iā Ieova ona o lona sesē ua ia agasala ai, o le uluga manutagi, po o tamaʻi lupe e lua fua.” (Fuaiupu e 7) O le fasi fuaiupu lea e faapea, “a lē maua e ia,” e ono faaupu foʻi faapenei, “pe a lē mafai ona ia gafatia.” Pe afai e lē gafatia e se tagata Isaraelu se mamoe ona o le mativa, sa fiafia le Atua e talia mea e mafai ona ia maua, e pei o manutagi e lua po o tamaʻi lupe e lua.

Ae ā pe afai e lē gafatia e se tagata se mea e oo lava i ni manulele se lua? Na taʻua i le Tulafono: “Ona au mai ai lea e lē ua agasala o lana taulaga, o lona vaega e sefulu o le efa [valu pe iva ipu] o falaoa lelei e fai ma taulaga mo le agasala.” (Fuaiupu e 11) Ae o se tagata e lē gafatia se mea, sa fetuutuunaʻi Ieova ma faataga o ia e ofo atu le taulaga o le agasala e aunoa ma le toto. * I Isaraelu, e leʻi taofia e le mativa le mauaina o faamanuiaga o le togisala po o le avanoa e faia ai se leleiga ma le Atua.

O le ā ua tatou aʻoaʻoina mai iā Ieova e uiga i le tulafono o taulaga mo agasala? Ioe, o ia o se Atua e agaalofa ma malamalama o lē magafagafa i mea e gata mai ai le mafai o ana tagata tapuaʻi. (Salamo 103:14) E finagalo o ia e tatou te mafuta vavalalata atu iā te ia ma atiaʻe se faiā māfana ma ia e tusa lava pe tatou te feagai ma luʻi, e pei o le tino mātua, maʻi, o matafaioi i aiga po o isi matafaioi. O se faamāfanafanaga le iloa, e faafiafiaina Ieova le Atua pe a tatou faia le mea sili e tatou te mafaia.

[Faaopoopoga i lalo]