O se Tusi Mai Rusia

Malaga Atu “i le Isi Itu o le Lalolagi”

NA TUUA Yakust e le tamaʻi vaalele na matou malaga ai ma agaʻi ina lele maualuga atu i luga o le Vanu o Tuymaada. A o pasi atu ma vaituloto aisā e eseese foliga ma le lapopoʻa, na matou ō atu ai i luga aʻe o le Verkhoyanskiy, o se faasologa o atumauga aisā, ma o loo sulugia e le lā. E 550 maila (900 kilomita) le mamao o le malaga, ona matou taunuu lea i le nuu o Deputatskiy.

O le amataga lenā o aʻu malaga i le Sakha Republic, lea e iloa foʻi o Yakutia, o se nuu matagofie ae faigatā le olaga o tagata, ma e sili atu lona telē nai lo Europa i Sisifo. O se vaipanoa e oo atu lona vevela i le 105 tikeri Fahrenheit (40°C) pe a oo i le taumāfanafana, ae e –95 tikeri Fahrenheit (-70°C) le mālūlū pe a oo i le taumālūlū, ma e maua ai toega o manu mamate mai anamua i ona laueleele. E ui ua leva tausaga talu mai le taimi mulimuli na ou sau ai, ae ou te manatua e pei o ananafi na ou vaai ai i na nuu lāiti, ua ufitia atoa e le ao māfiafia, ma le malamalama feʻemoemoaʻi aulelei mai i mātū, faapea ma tagata fiafia o Yakut, ua masani ma tulaga faigatā.

E lē o Deputatskiy le nuu mulimuli sa ma ō i ai. Sa ma asiasi atu foʻi ma laʻu paga i isi nuu. O le nuu muamua na ma ō i ai, o Khayyr, e 200 maila (300 kilomita) le mamao i luga i mātū, e latalata i le Sami o Laptev, i Saiperia i mātū. Aiseā na ma mananaʻo ai e malaga atu i Khayyr? Ona sa asiasi muamua atu se Molimau a Ieova i nei nuu, ma sa ia maua ai le toʻatele o tagata e naunau e fia iloa atili le Tusi Paia. O Yakutsk, le nuu lea na matou iai, e 600 maila (1,000 kilomita) le mamao, ma e foliga mai o le nuu pito i sili lea ona latalata i nei nuu! Na ma iloa sa manaʻomia e nei tagata ni faalaeiauga ma le fesoasoani.

Ina ua ma taunuu atu i Deputatskiy, na ma fetaui ai ma se tamāloa sa faimalaga atu i Khayyr i lana taavale, ma sa ia ofo mai e momoli i maʻua i lana taavale i se tau itiiti. Sa ma tau mumusu e talia le ofo ona o le tuai tele o foliga o le taavale toe namu penisini. Ae sa ma ō lava, ma na matou tuua i inā i le afiafi. E lilo i o ma manatu le tulaga o le a oo i ai le faigāmalaga.

Na matuā mālūlū nofoa o le taavale e pei o le mālūlū o fafo, ma e leʻi umi ae o ma iloaina e lē toe teʻa le mālūlū o nofoa. Sa ma talosaga i le tamāloa e taofi le taavale seʻi suʻe mai ni ma ofu māfanafana e toe faaopoopo i ofu na ma oofu ai. Ae e leʻi gafatia e na ofu māfanafana le mālūlū tele o le mea.

O le avetaavale o se tamāloa e masani i le mālūlū o le itu i mātū, ma o se tasi e laufofoga fiafia. Na ma teteʻi i le fesili mai o le tamāloa, “Pe na lua vāai muamua i le malamalama feemoemoaʻi  mai mātū?” Ona ou te leʻi vaai lava i ai, na ia taofi le taavale, ma sa faigatā ona ma ō mai i fafo ona o le mālūlū tele. Na teʻa ai i inā ma le mafaufau i le mālūlū. Na ma vāai i le malamalama mai mātū ma maofa i le felanulanuaʻi mai o le malamalama lea na susulu mai, ma o se vaaiga ofoofogia tele e pei lava o loo ma latalata i ai.

I le vaveao a o pogisā lava, na poloka ai le matou taavale ona o le māfiafia o le aisa. Na ma fesoasoani i le avetaavale e uunaʻi ese le taavale mai le aisa, ma i isi foʻi taimi mulimuli ane, a o matou agaʻi atu i Khayyr i auala ua uma ona sua ese e masini aisa māfiafia. Ina ua malama aʻe le taeao, na ou iloa ai o auala nei o loo matou oso ai, o vaitafe ua aisā! Ae i se taimi o le aoauli faatoʻā matou taunuu i Khayyr, o le 16 ai na o itula talu ona matou tuua Deputatskiy. Sa ma faapea o le a ma mamaʻi mai lenā malaga umi toe faigatā ma mālūlū, ae e oo ane i le taeao, ua toe faafouina le malosi. E na o oʻu tamatamaʻi vae na tau lē lagona se mea ona o le mālūlū. Na aumai e tagata o le nuu se gaʻo o pea e mili ai oʻu vae.

O le mea masani lava e tatou te ō e asiasi i fale o tagata e taʻu atu ai le tala lelei. Ae i nei i Khayyr, o le taimi lava na faalogo ai tagata o le nuu ua ma ō atu, na latou ō mai e suʻe i maʻua! O aso uma o le lua ma le afa vaiaso lea na ma iai i inā, na ma suʻesuʻe ai ma tagata o le nuu i le Tusi Paia, ma o nisi taimi e amata i le vaveao e oo i le leva o le pō. O se fiafiaga le feiloaʻi ma le toʻatele o tagata māfana ma talimālō, o ē naunau i mea faaleagaga. Na fai mai nisi loomatutua Yakut iā i maʻua: “E matou te talitonu i le Atua. O le lua oo mai i nei i le isi itu o le lalolagi, e taʻu mai ai o loo iai se Atua!”

Na faateʻia i maʻua i masaniga a tagata o le nuu. O se faataʻitaʻiga, e faaputuputu e tagata poloka aisa e pei ni fafie i autafa o o latou fale. Po o le ā lava le taimi e latou te fia manaʻo ai i se vai, na o le aumai lava o le poloka aisa ma tafu i le kitata e faaliusuavai ai. Na aumai e tagata o le nuu le iʻa e taʻu o le chir, lea e manaia i le taumafa pe a kukaina i le latou lava auala, lea e vaai i ai o se taumafa faapitoa a le nuu e taʻu o le stroganina. E muamua ona faamalō le iʻa pe a maua mai, ona tipitipi lea faamanifinifi ma faauumi, loiloi i le pepa ma le masima, ona ai loa lea. E fiafia foʻi tagata o le nuu e faamatala mai toegamea o meaola mamate e pei o nifo elefane, ma laau mai anamuā lea e masani ona latou maua i lenā vaipanoa.

Sa faaauau laʻu malaga mai Khayyr, o le tele o taimi e ala i vaalele, ina ia asiasi i ē naunau i le Tusi Paia i isi nuu i Yakutia, ma e faitau selau maila ou te malaga ai. Maʻeu le māfana ma le alolofa o tagata i inei! Na ma feiloaʻi ma se tamaitiiti sa ia iloaina ou te popole pe a ou alu i le vaalele. Sa ia tusia se pepa mo aʻu e faateʻa ai loʻu popole. Na ia tusia se ata o ni tamaʻi manulele e lua ma se tamaʻi vaalele, ma se faamatalaga e faapea: “Sasha, a e toe alu i se vaalele, aua le popole pe a paʻū. Mataio 10:29.” Sa pāʻia loʻu loto ina ua ou faitau i le mau! Sa ou maua ai fetalaiga a Iesu e uiga i tamaʻi manulele: “Pe a paʻū se tasi o na tamaʻi manulele i le eleele, e silafia lava e lo outou Tamā.”

O lea ua ou faamatala atu nisi o mea mananaia mai le tele o mea mananaia i Yakutia. O lenei nuu mālūlū ma faigatā ona ola ai, ou te manatua ai pea le māfana ma le lelei o tagata o loo nonofo “i le isi itu o le lalolagi.”

[Ata i le itulau 25]

E māfana ma talimālō tagata Yakut