Po o Iai se Isi o Manatu Mai?

Pe na iai se taimi na e lagona ai le tuua toʻatasi ma le lotovaivai ona ua leai se tasi e malamalama i faafitauli ua e fesagaʻia? Ae e tusa foʻi pe latou te iloa, e te lagona e latou te lē manatu moni iā te oe.

PE A mapuna aʻe faafitauli, e ono tai pei o tatou olaga o se afā e agi pea e lē taitai teʻa. E iai taimi e tatou te ono manatu ai o mea o loo tatou aafia ai e ese le leaga ma lē tonu, ma ua lē mafai ona tatou tatalia. O le tulaga masani lenā e oo i ai pe a tatou mafatia mai faalogona ootia, lotovaivai, faalavelave ogaoga, maʻi faaumiumi, ma le tele lava o isi mea. E tatou te lagona le lotomafatia ma le lē taulau, ma tau saʻili ai po o fea o le a tatou liliu atu i ai mo se faamāfanafanaga. Po o iai ea se isi o manatu moni mai?

E Manatu Mai “le Atua o Faamāfanafanaga Uma”

O loo faamatalaina e le Tusi Paia le Atua o le “Tamā o le alofa mutimutivale, ma le Atua o faamāfanafanaga uma.” (2 Korinito 1:3) E silafia e le Atua, o lē o lona suafa o Ieova, o loo tatou manaʻomia se faamāfanafanaga. E sili atu ma le faaselau taimi o loo faaaogā ai e le Tusi Paia le upu “faamāfanafanaga” i ona vala eseese, ma ua tatou mautinoa ai e lē gata e malamalama le Atua i mea o tatou fesagaʻia, ae e na te finagalo foʻi e faamāfanafanaina i tatou. Ua taʻu mai e lenā mea iā i tatou e tusa lava pe lē malamalama ma lē ano mai isi i o tatou faafitauli, ae o loo manatu mai Ieova le Atua.

O loo faaalia manino mai i le Tusi Paia le manatu mai o Ieova i tagata taʻitoʻatasi. Fai mai le Tusi Paia: “O loo i mea uma lava fofoga o Ieova; o loo matuā silasila i ē amio leaga ma ē amio lelei.” (Faataoto 15:3) E faapena foʻi le Iopu 34:21, o loo faapea mai: “Ua silasila o ia i ala o tagata taʻitoʻatasi, ua ia silafia foʻi ona savaliga uma.” E silasila mai Ieova i a tatou amio—pe lelei pe leaga—ma e na te silafia foʻi o tatou tulaga ina ia gaoioi mai e tusa ma lona finagalo. Na faamaonia lenei tulaga i upu a Hanani le tagata vāai, po o le perofeta, na fai iā Asa le tupu o Iuta. Fai mai o ia: “Auā o fofoga o Ieova e fetaufetuliaʻi i le lalolagi uma, na te fesoasoani iā te i latou o ē ua sao o latou loto iā te ia.”—2 Nofoaiga a Tupu 16:7, 9.

E iai foʻi le isi māfuaaga e manatu mai ai Ieova iā i tatou. Na faapea mai Iesu: “E lē mafai ona sau se tagata iā te aʻu pe a lē tosina mai o ia e le Tamā o lē na auina mai aʻu.” (Ioane 6:44) E manatu mai Ieova e ala i le suʻesuʻeina o le loto o se tagata e fia manaʻo moni lava e iloa o ia. Afai e fia iloa lelei e se tagata le Atua, e gaoioi la le Atua i ni auala e sili ona mataʻina. O se faaaʻoaʻoga, i le Dominican Republic, na iai se fafine i le falemaʻi e fai lona taotoga ona o le kanesa. Na ia ōle atu i le Atua e faasino mai iā te ia le tapuaʻiga moni. E leʻi umi, ae alu atu loa lana tane ma avatu se polosiua o loo iai le ulutala, O le ā e Manaʻomia e le Atua mai iā i Tatou? * lea na ia maua mai se Molimau a Ieova na asiasi atu i lona fale. Na faitau e le fafine le polosiua ma iloa ai, o le tali lea a le Atua i lana tatalo. Sa ia manaʻo e fai sana lesona faale-Tusi Paia, ma e leʻi atoa le ono masina  ae tuuina atu loa lona ola i le Atua ma papatisoina.

I le tusi o le Tusi Paia o Salamo, e tatou te maua ai le tele o faaupuga faamāfanafanaloto na tusia e faisalamo Eperu anamua, e pei o le tupu o Tavita, lea e faamatala mai ai le manatu alofa mai o Ieova i ana auauna. I le Salamo 56:8, e tatou te maua ai le ʻaiʻoiga a le tupu o Tavita i le Atua e faapea: “Ia e utu oʻu loimata i lau fagu; e lē o i ai ea i lau tusi?” Ua faaalia mai i lenei faatusatusaga, na iloa e Tavita e manatu mai Ieova e lē gata i mea na ia mafatia ai, ae faapea foʻi ona faalogona ootia ona o na mea. Na silasila Ieova i le tigā na feagai ma Tavita ma manatua mea sa faapogaia ai le maligi o loimata o Tavita. Ioe, e silasila Lē na faia i tatou iā i latou e taumafai e faia lona finagalo, “o ē ua sao o latou loto iā te ia.”

O le isi mau o le Tusi Paia o loo faamatala ai le manatu alofa mai o le Atua, o le mau lea ua lausilafia uma, o le Salamo e 23. I upu amata o le mau, o loo faatusa ai le Atua i se leoleo mamoe alofa: “O Ieova, o loʻu leoleo mamoe o ia; e leai se mea ou te mativa ai.” E tausia e se leoleo mamoe i Sasaʻe Tutotonu ana mamoe taʻitasi, ma e na te iloa uma foʻi igoa o ana mamoe. I aso taʻitasi, e na te valaau mamoe taʻitasi ma milimili ma vaai po o iai ni ona manuʻa. Pe a ia maua se manuʻa i lona tino, e na te faaaogā le suāuu po o se kulimi e toe faaleleia ai le manuʻa. Pe a maʻi le mamoe, e ono faainu faamalosi e le leoleo mamoe le mamoe i se vai ma faatū i luga ina ia aua neʻi taoto i lalo ma pē ai. O se talafaatusa lelei tele lea e faaāta mai ai le auala e tausia ai e Ieova i latou e faalagolago iā te ia.

 Tatalo ma le Toetū—Faamaoniga o le Manatu Mai o le Atua

O nei salamo ma isi salamo matagofie, e leʻi tusia i le Tusi Paia e tau ina faitau ma fiafia i ai. O loo faailoa mai ai le auala na sasaa atu ai e auauna anamua a le Atua o latou loto iā Ieova, e faaali atu ai lo latou manaʻomia o le fesoasoani a le Atua faapea ma lo latou lotofaafetai mo le taʻitaʻiga ma faamanuiaga mai iā te ia. Ua tatou iloa mai lea tulaga, na talitonu moni lava auauna anamua a le Atua e manatu mai le Atua iā i latou. O le faitauina ma manatunatu i nei upu faagaeeloto, o le a tatou manatu ai foʻi faapena i le Atua. O le mea moni e faapea e faafofoga mai Ieova i a tatou tatalo, o se faamaoniga mautū lea o le manatu mai o le Atua.

Peitaʻi, e iai taimi e tatou te lofia ai i se faafitauli e tatou lē iloa le auala e tatalo atu ai. Po o le a mafai e lenā mea ona taofia Ieova mai le silafiaina o o tatou mafatiaga? O loo taʻua i le Roma 8:26 e faapea, ‘E fesoasoani le agaga i o tatou vaivaiga; auā o le faafitauli, e tatou te lē iloa po o ā mea e ao ona tatou tatalo atu ai, a ua ʻaiʻoi atu le agaga mo i tatou ma le ōi e lē mafai ona faamatalaina.’ Ua taʻu mai e lenei mau e faapea, o tatalo faagaeeina a auauna anamua a le Atua, e ono faaalia atu ai o tatou faalogona, ma e talia e “Le faafofoga tatalo” o Ieova na tatalo e mai iā i tatou.—Salamo 65:2.

O le faamoemoe o le toetū, o le isi lea faamaoniga o le manatu mamafa o le Atua i tagata taʻitoʻatasi. Na fetalai Iesu Keriso e faapea: ‘E oo mai le itula e faalogo ai i latou uma o loo i tuugamau i le leo o Iesu, ma latou ō mai ai.’ (Ioane 5:28, 29) O le upu Eleni o loo faaliliuina “tuugamau” i inei, e lē na o le tuugamau e faauiga atu i ai. O loo faailoa mai ai le manatu faapea, e manatuaina e le Atua le talaaga o le olaga o le tagata ua maliu.

Seʻi manatu foʻi, ina ia toe faatūina mai se tagata ua maliu, e ao ona silafia e le Atua mea uma e uiga i lenā tagata, e aofia ai ona foliga, o ona uiga na fanau mai ma ia ma ana masaniga, faapea foʻi mea uma e na te manatua! (Mareko 10:27) E lē faagaloina e Ieova lenā tagata e tusa lava pe faitau afe tausaga e maliu ai. (Iopu 14:13-15; Luka 20:38) O lea la, o le manatua pea e Ieova le Atua o mea uma e faatatau i le tagata ua maliu, ua faamaonia ai le manatu mamafa mai o Ieova iā i tatou taʻitoʻatasi!

O Ieova o Lē na te Tauia

O le ā e ao ona tatou faia ina ia maua ai le tausiga alofa a le Atua? Muamua lava, e ao ona tatou faalagolago ma usiusitai iā te ia, o loo tatou faatuatuaina o ia. Na taʻu mai e le aposetolo o Paulo le fesootaʻiga o le iai o le faatuatua ma le mauaina o le tausiga a le Atua? Na ia faapea mai: “A aunoa ma le faatuatua e lē mafai ona faafiafiaina ai o ia, auā o lē e faalatalata atu i le Atua, e tatau ona ia talitonu o loo soifua o ia, ma e na te tauia ē e matuā saʻili iā te ia.”—Eperu 11:6.

Ioe, e lua vala e aofia ai i le ituaiga faatuatua lea e faafiafiaina ai le Atua. Muamua, e ao ona tatou “talitonu o loo soifua o ia,” o lona uiga e tatau ona tatou talitonu o loo soifua le Atua ma o ia o lo tatou Pule Silisili ese i le aoao o mea, lea e tatau ona usiusitai ma tapuaʻi i ai. Lona lua, e ao ona tatou talitonu o ia “na te tauia ē e matuā saʻili iā te ia.” O le faatuatua moni, e aofia ai le talitonu e naunau mai le Atua mo le lelei o ē matuā saʻili iā te ia e fai lona finagalo ma e na te tauia i latou. O lou suʻesuʻeina o le Afioga a le Atua ma faatasitasi ma ē e usiusitai iā te ia, o le a e maua ai foʻi le ituaiga faatuatua lea e tāua mo le mauaina o le taui ma le tausiga alofa a le Atua.

E toʻatele tagata i aso nei e talitonu e lē manatu mamafa mai le Atua i meafai a tagata. Ae e pei ona tatou iloa, o loo faailoa manino mai i le Tusi Paia e manatu mamafa mai le Atua iā i latou e faatuatua moni iā te ia. E ui lava ua tumu lenei olaga i mafatiaga, popolega, faanoanoaga, ma le tigā, e lē manaʻomia ona tatou faavaivai. O loo manatu moni mai Ieova le Atua. O loo ia valaaulia ma le alofa i tatou e liliu atu iā te ia mo le fesoasoani. Fai mai le faisalamo: “Ia e tuuina atu iā Ieova o mea e te popole vale ai; o ia lava na te tausia oe; na te lē tuuna e faavavau le amiotonu ia faagaeetia.”—Salamo 55:22.

[Faaopoopoga i lalo]

[Pusa/Ata i le itulau 29]

Mau e Faamalosia ai Lou Faatuatua i le Tausiga Alofa a le Atua iā te Oe

“Auā o fofoga o Ieova e fetaufetuliaʻi i le lalolagi uma, na te fesoasoani iā te i latou o ē ua sao o latou loto iā te ia.”—2 NOFOAIGA A TUPU 16:9

“Ia e utu oʻu loimata i lau fagu; e lē o i ai ea i lau tusi?”—SALAMO 56:8

“O Ieova, o loʻu leoleo mamoe o ia; e leai se mea ou te mativa ai.” —SALAMO 23:1

“Le faafofoga tatalo e, e ō atu iā te oe tagata uma lava.”—SALAMO 65:2

“Ia e valaau mai, ona ou tali atu ai lea iā te oe; ia e finagalo alofa i le galuega a ou aao.”—IOPU 14:15

“Auā o lē e faalatalata atu i le Atua, e tatau ona ia talitonu o loo soifua o ia, ma e na te tauia ē e matuā saʻili iā te ia.”—EPERU 11:6

“Ia e tuuina atu iā Ieova o mea e te popole vale ai; o ia lava na te tausia oe; na te lē tuuna e faavavau le amiotonu ia faagaeetia.”—SALAMO 55:22