Ua Fesili Mai le ʻAufaitau

Po o se Faasalaga Mai i le Atua Mafatiaga o le Olaga?

Pe na tupu se tulaga faigatā i lou olaga, ma ua e tuufesili ai pe faamata ua faapuapuagatia oe e le Atua? Atonu e oo ifo se manatu e faapea, ua tuu mai e le Atua faasalaga iā i tatou, ona ua faafuaseʻia se maʻi, po o se faalavelave ua faataotolia ai, po o se maliu faafuaseʻi i le aiga.

Ae e lē faapena le Atua, ona e finagalo o Ia ia fiafia tagata e aunoa ma ni faafitauli, o le mea lea e ao ona faamāfanafanaina ai i tatou. Ua manino lea tulaga, ona na faia e le Atua uluaʻi tagata ma tuu i laʻua i le parataiso e pei o se paka, i le “faatoaga i Etena,” ia aunoa ma ni faafitauli e oo i ai.—Kenese 2:15.

O le tulaga faanoanoa, ona na fulitua le uluaʻi ulugalii i lenei fuafuaga matagofie ma filifili ia lē usitaʻi i le Atua. E ogaoga se iʻuga na oo iā i laʻua ma ua aafia ai a la fanau uma, faapea foʻi ma i tatou. Aiseā? E mafai ona faatusaina i le mea na tupu i se tamā o se aiga ua lē taulau ona totogiina le lisi o le fale o loo nonofo ai ma lona aiga, ma iʻu ina tutuli ese uma ai ma oo mai ai tigā ma faigatā iā i latou uma. Ua faapena foʻi ona tutupu mafatiaga i tagata uma, talu mai lava le fouvalega a le uluaʻi tagata. (Roma 5:12) I le tele o tausaga mulimuli ane, na taʻua ai ma le faanoanoa e le tagata amiotonu o Iopu e faapea, ana fua ona puapuaga i se “fua faatautau,” o le a “sili lona mamafa i . . . oneone o le sami.”—Iopu 6:2, 3.   

O se isi māfuaaga o o tatou mafatiaga, ona e gata mai lo tatou uta mamao. O se faataʻitaʻiga, seʻi faapea ua fau ni fale i se vaipanoa e masani ona tutupu ai mū, ma faatau atu i le lautele. E te lē o iloa lea mea, ma ua faatau ai sou fale. Pe faamata la e te lē o tuuina oe ma lou aiga i se tulaga e ono tutupu mai ai ni puapuaga? E lē mafai ona tatou faapea atu o se faasalaga mai le Atua pe afai ae tupu mai ai se faalavelave, a ea? Ua faamatala mai i le Tusi Paia lea mea moni e faapea: “O lē ua faigofie, e talia e ia upu uma; a o lē ua mafaufau, ua faautauta o ia i lona ala.”—Faataoto 14:15.

Ae ua faamāfanafanaina i tatou i le iloaina e faapea, e ui e mafai ona tutupu puapuaga iā i tatou uma, ae ua finagalo le Atua ia faasaʻoloto tagata mai i nei puapuaga i se taimi lata mai. O le a oo mai le taimi e te lē toe feagai ai ma ni puapuaga, pe vaai ma faalogo i ai. O le a “mavae atu” loimata uma o le faanoanoa, o tigā, o le oti, ma le faavauvau. (Faaaliga 21:4) Ma ua faalaeiauina foʻi i tatou i le folafolaga e faapea, e lē toe faaleagaina e taua ma mala fale o le a fauina e tagata faapea a latou mea totō. Ae o le a matuā aogā “uma lava” iā i latou galuega a o latou lima—Isaia 65:21-25.

A o e faatalitali i le Atua e na te faamamā ese puapuaga uma, o le ā e mafai ona e faia e faaitiitia ai lea tulaga? O le mea muamua ma e sili ona tāua, ia “aua le faalagolago i lou lava atamai,” e pei ona fautua mai ai le Tusi Paia, ae “ia e faatuatua iā Ieova ma lou loto atoa.” (Faataoto 3:5) Ia e saʻili atu i lana taʻitaʻiga ma le faamāfanafanaga mai iā te ia. Ia e uaʻi atu i le poto o le Atua o loo i le Tusi Paia. O le a mafai ai ona e filifili ma le poto ma puipuia ai oe mai i puapuaga e mafai ona e ʻalofia.—Faataoto 22:3.